༢༠༡༢ ཟླ་ ༦ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༨ ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཡུལ་གྱི་གྲོང་ཁྱེར་མན་ཆེ་སི་ཊར་རྩེད་ཐང་ཆེན་མོའི་ནང་མང་ཚོགས་ལ་དོན་དམ་གྱི་འགྱུར་བ་ནང་སེམས་ནས་ཡོང་དགོས། ཞེས་པའི་བརྗོད་གཞིའི་ཐོག་བཀའ་སློབ་སྩལ་གྲུབ་མཚམས་མང་ཚོགས་ཀྱི་དྲི་བར་བཀའ་ལན་སྩལ་ཡོད།
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། སྐབས་དེར་ཆོས་ཞུ་བ་རྒྱ་རིགས་སློབ་མ་ཞིག་གིས་དྲི་བ་ཕུལ་བར། མགོན་པོ་གང་ཉིད་མཆོག་གིས་བཀའ་ལན་སྩལ་དོན། དེང་དུས་འཛམ་གླིང་གི་ཁ་ཕྱོགས་འདི་བཞིན་དོན་དམ་གྱི་མང་གཙོ་དང་ཆོས་དད་རང་དབང་། མི་སྒེར་གྱི་རང་དབང་གི་ཕྱོགས་སུ་སྐྱོད་བཞིན་ཡོད། དེར་བརྟེན་རྒྱ་ནག་ནང་བསྒྱུར་བ་འགྲོ་ངེས་ཡིན། རྒྱ་ནག་གཞུང་གི་འགོ་ཁྲིད་ཚོས་རྒྱ་ནག་གི་ཁྲིམས་ལུགས་དེ་རྒྱལ་སྤྱིའི་ཚད་གཞི་དང་མཐུན་པ་ཞིག་བཟོ་དགོས། རྒྱ་ནག་མི་དམངས་ལ་དངོས་ཡོད་ཀྱི་གནས་ཚུལ་གང་ཡིན་པ་དེ་ཤེས་རྟོགས་བྱ་རྒྱུའི་ཐོབ་ཐང་ཆ་ཚང་ཡོད་སྟབས། རྒྱ་ནག་གཞུང་ནས་གནས་ཚུལ་གྱི་སྒོ་མོ་ཕྱེ་ངེས་པར་དུ་འབྱེད་དགོས། དེ་བཞིན་རྒྱ་ནག་གཞུང་ནས་གནས་ཚུལ་བརྒྱུད་ལམ་ལ་དམ་བསྒྲགས་དང་བཀག་འགོག་བྱས་དང་བྱེད་མུས་ཡིན་པའི་སྲིད་བྱུས་དེ་དག་ཕྱིར་བསྡུ་བྱེད་དགོས་ཞེས་བཀའ་ལན་སྩལ་ཡོད།
ཡང་༸གོང་ས་མཆོག་གི་གང་སྐུའི་ཡང་སྲིད་ཕེབས་ཕྱོགས་སྐོར་གྱི་དྲི་བར་བཀའ་ལན་སྩལ་དོན། མི་འགའ་ཤས་ཀྱིས་ཏཱ་ལའི་བླ་མ་སྐུ་ཕྲེང་རིམ་བྱོན་མུ་མཐུད་ཡོང་དགོས་རྒྱུ་དེ་བོད་པའི་རིག་གཞུང་སྲུང་སྐྱོབ་བྱ་རྒྱུར་དགོས་ངེས་ཅན་ཞིག་ཡིན་པ་བསམ་གྱི་ཡོད། འོན་ཀྱང་ཡང་སྲིད་ཀྱི་གནད་དོན་དེའི་ཐོག་དྲི་བ་གཉིས་ཡོད། དང་པོ། ངོས་ཀྱི་ཡང་སྲིད་མུ་མཐུད་ཡོང་དགོས་ཀྱི་ཡོད་མེད་དང༌། གཉིས་པ། གལ་ཏེ་ཡང་སྲིད་ཡོང་དགོས་ཚེ་ཡང་སྲིད་རྗེས་མ་དེ་ཇི་ལྟར་ངོས་འཛིན་ཞུ་དགོས་ཀྱི་ཡོད་མེད་གཉིས་རེད། གནད་དོན་དེའི་སྐོར་སྔ་ལོ་ངོས་ཀྱིས་འགྲེལ་བཤད་ཞིབ་ཕྲ་བརྒྱབ་ཟིན། སྤྱིར་བཏང་ངོས་རང་ལོ་ ༨༩ སླེབས་སྐབས་བོད་བརྒྱུད་ནང་བསྟན་གྱི་ཆོས་ལུགས་ཁག་གི་བླ་ཆེན་རྣམ་པ་ཚོ་དང་གོ་བསྡུར་བྱེད་རྩིས་ཡོད་སྐོར་བཀའ་ལན་སྩལ་འདུག་པ་བཅས། །