༢༠༡༢ ཟླ་ ༥ ཚེས་ ༩ རེས་གཟའ་ཕུར་བུ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་ཀྱིས་ཕྱི་ལོ་ ༢༠༡༢ ཟླ་ ༥ ཚེས་ ༩ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༡ ཉིན་བོད་ཨ་མདོ་རྔ་པའི་རྔ་སྟོད་ཨ་འདུས་མཐའ་བ་དང་རྒྱ་སྡེ་ཚོ་གསུམ་སོགས་ཀྱི་བུད་མེད་ ༢༠༠ མ་ཟིན་ཙམ་གྱིས་དེ་སྔོན་ཨ་འདུས་སྡེ་བ་ཁག་གི་མི་མང་པོ་ཞིག་འཛིན་བཟུང་བྱས་ཡོད་ པ་རྣམས་གློད་བཀྲོལ་གཏོང་དགོས་པའི་རེ་འདུན་འདོན་པར་རྔ་པ་རྫོང་སྲིད་དུ་སོང་ཡོད་ཀྱང་། ཨ་འདུས་སྡེ་བ་ནས་མར་སྤྱི་ལེ་བདུན་ཙམ་གྱི་སར་ཡོད་པའི་མཚམས་རིང་སྡེ་འདབ་ཏུ་དྲག་ཆས་ཉེན་རྟོག་པ་དང་། སྤྱི་བདེ་ཉེན་རྟོག་པ་སོགས་ཀྱིས་བཀག་འགོག་བྱས་ཏེ་འགྲོ་ཐུབ་མེད་ཀྱང་། སྐབས་དེར་དུས་ཡུན་རིང་པོར་ཨ་འདུས་སྡེ་བའི་བུད་མེད་ཚོ་དང་དྲག་ཆས་ཉེན་རྟོག་པ་སོགས་ ཀྱི་བར་དུ་འཁྲུག་རྩོད་ཆེན་པོ་བྱུང་ཞིང་མདུན་བསྐྱོད་ཉེན་རྟོག་པ་སོགས་ལ་རྔ་པ་རྫོང་ཐོག་ནས་རྒྱབ་དཔུང་དུ་དྲག་ཆས་ཉེན་རྟོག་པ་འབོར་ཆེན་འབྱོར་ཏེ་ཛ་དྲག་གི་གདོང་ཐུག་བྱུང་ཉེའི་སྐབས་ཨ་འདུས་དགོན་པའི་ལས་སྣེ་སོགས་ཕེབས་ཏེ་མི་མང་ལ་ཕྱིར་འཐེན་བྱེད་དགོས་པའི་རེ་བ་ནན་གྱིས་བཏོན་པ་ལྟར་མི་མང་གིས་ཕྱིར་འཐེན་བྱས་འདུག དེ་རྗེས་མི་མང་གིས་གྲོས་བྱས་ཏེ་དེང་སྐབས་བཀག་ཉར་འོག་ཡོད་པ་རྣམས་མི་སྒེར་བ་ཞིག་དང་ཁྱིམ་ཚང་གཅིག་གཉིས་ཤིག་གི་ཆེད་དུ་བཙོན་ཁང་དུ་སོང་བ་མ་ཡིན་པར་བོད་སྤྱི་པའི་ཆེད་ཡིན་པ་དང་། དེ་བཞིན་ཨ་འདུས་ཥེ་བ་སྡེ་བའི་རྒྱལ་གཅེས་དཔའ་བོ་འཇམ་དབྱངས་སོགས་ལ་གདུང་སེམས་མཉམ་སྐྱེ་མཚོན་ཆེད་འདི་ལོའི་ས་ཞིང་འདེབས་ལས་མི་བྱེད་པ་དང་། དབྱར་རྩྭ་དགུན་འབུ་མི་བཀོག་རྒྱུ་བཅས་བསམ་པ་གཅིག་མཐུན་གྱིས་ཐག་གཅོད་བྱས་ཡོད་ཀྱང་། ཕྱི་ཟླ་ ༥ ཚེས་ ༥ ཉིན་དེ་སྔོན་འཛིན་བཟུང་བྱས་པའི་མི་བདུན་རྔ་པ་རྫོང་ཐོག་ནས་གློལ་བཀྲོལ་བྱས་ཏེ་ཤང་སྲིད་གཞུང་དུ་ཉིན་གསུམ་རིང་སློབ་གསོ་སྤེལ་དགོས་ཚུལ་གྱིས་བཀག་ཉར་རྗེས་གློད་བཀྲོལ་བཏང་འདུག་པ་དང་། དེ་མིན་ད་དུང་བཀག་ཉར་འོག་ཡོད་པ་རྣམས་ཀྱང་མི་འགྱང་པར་གློད་བཀྲོལ་གཏོང་རྒྱུ་ཡིན་ལུགས་བརྗོད་ཡོད་པར་བརྟེན། དབྱར་རྩྭ་དགུན་འབུ་བཀོག་ཏུ་སོང་ཡོད་ཀྱང་ས་ཞིང་འདེབས་ལས་མ་བྱས་པར་མུ་མཐུད་ལྷག་ཡོད་འདུག ཡང་ཕྱོགས་གཅིག་ནས་ད་ལྟ་བཀག་ཉར་འོག་ཡོད་པ་རྣམས་ལ་ནག་ཉེས་ལྕི་མོ་ཡོད་ཚུལ་ཀྱང་བརྗོད་བཞིན་ཡོད་འདུག ཕྱི་ཟླ་ ༤ ཚེས་ ༢༦ ཙམ་ནས་རྔ་པའི་སྟོད་སྨད་བར་གསུམ་ཚང་མས་ས་ཞིང་འདེབས་ལས་བྱེད་པའི་འགོ་བཙུགས་ཡོད་ལ་ད་ཆ་ཚང་མས་ལས་ཀ་རྫོགས་ཚར་ཡོད་འདུག ཨ་འདུས་སྡེ་བ་ཁག་ནི་འཚོ་བའི་ཡོང་འབབ་གཙོ་བོ་ཞིང་ལས་ཁོ་ན་ཡིན་སྟབས། ས་ཞིང་འདེབས་ལས་མི་བྱེད་པ་ནི་ཞིང་པ་དེ་དག་ལ་མཚོན་ན་འཚོ་བའི་ཡོང་འབབ་གཙོ་བོ་དེ་མེད་པར་གྱུར་ཡོད། དེ་སྔོན་རྨས་སྐྱོན་ཕོག་པ་ཕལ་ཆེ་བ་སྨན་ཁང་ནས་ཐོན་ཏེ་སོ་སོའི་ནང་ལ་སྨན་བཅོས་བྱེད་བཞིན་ཡོད་ཀྱང་ཀླད་ཁྲག་སྲེས་ཡོད་པའི་སློབ་དཔོན་སྐྱབས་ད་དུང་མུ་མཐུད་ སྨན་ཁང་དུ་སྨན་བཅོས་བྱེད་བཞིན་ཡོད་འདུག་པ་བཅས།