༢༠༡༢ ཟླ་ ༥ ཚེས་ ༧ རེས་གཟའ་ཟླ་བ།
༄༅།  །འདི་གའི་ཆེད་གཉེར་གསར་འགོད་པ་ངག་དབང་ཐོགས་མེད་ལགས་ཀྱིས་སིམ་ལ་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢  ཟླ་ ༥ ཚེས་ ༥ རེས་གཟའ་སྤེན་པའི་ཉིན་ཧི་མཱ་ཅལ་མངའ་སྡེའི་སིམ་ལར་རྟེན་གཞི་བྱས་པའི་སིམ་ལ་གཏན་སློབ་དབུ་བརྙེས་ནས་མི་ལོ་ ༥༠ ཧྲིལ་པོ་འཁོར་བའི་དགའ་སྟོན་རྟེན་འབྲེལ་གྱི་མཛད་སྒོ་གཟབ་རྒྱས་ངང་སྐོང་ཚོགས་གནང་འདུག
དེ་ཡང་སྔ་དྲོ་ཐོག་མར་སིམ་ལ་གཏན་སློབ་ཀྱི་སློབ་ཟུར་དང་ས་གནས་མང་ཚོགས།  དེ་བཞིན་དེ་སྔའི་སློབ་ཕྲུག་སྤྱི་འཐུས་ཀརྨ་པ་ཆོས་འཕེལ་ལགས་དང་ཡེ་ཤེས་ཕུན་ཚོགས་སོགས་ཚང་འཛོམས་ཀྱི་ཐོག་མར་སློབ་གྲྭའི་རྩེད་ཐང་གི་རྒྱབ་ཏུ་དར་ཆེན་བླངས་ཏེ་བསང་གསོལ་གནང་བ་དང་ཆབས་ཅིག་སྨོན་ལམ་གསུང་འདོན་གནང།  དེ་རྗེས་དངོས་གཞིའི་མཛད་སྒོར་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་དང་ཧི་མཱ་ཅལ་མངའ་གཞུང་གི་གྲོང་ཚོ་ཡར་རྒྱས་ལྷན་ཁང་གི་བློན་ཆེན་སྐུ་ཞབས་ཇེ་རམ་ཐཱ་ཀུར་མཆོག་སྐུ་མགྲོན་གཙོ་བོར་མགྲོན་འབོད་ཞུས་ཡོད།  སྐབས་དེར་ལྡི་ལིར་རྟེན་གཞི་བྱས་པའི་བོད་མིའི་གཏན་སློབ་ཀྱི་ཚོགས་གཙོ་སྐུ་ཞབས་རཱ་བ་ཌ་མཆོག་བཅས་ཀྱང་ཕེབས་ཡོད།  མཛད་སྒོའི་ཐོག་མར་བཀའ་ཁྲི་ཟུར་པ་མཆོག་དང་སྐུ་ཞབས་ཇེ་རམ་ཐཱ་ཀུར་མཆོག་གཉིས་ཀྱིས་རྩེད་ཐང་གི་མདུན་དུ་སིམ་ལ་སློབ་ཟུར་རྣམས་ཀྱིས་མཐུན་འགྱུར་འོག་སྡིངས་ཆ་གསར་སྐྲུན་བྱས་པ་དེ་དབུ་འབྱེད་གནང་རྗེས། མཛད་གཙོ་རྣམ་གཉིས་དང་སྐུ་ཞབས་རཱ་བ་ཌ་མཆོག་སྡིངས་ཆའི་སྟེང་ཕེབས་ཏེ་མཆོད་མེ་ཞལ་ཕྱེ་གནང། དེ་རྗེས་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མྱ་ངན་གུས་འདུད་དང་ངག་བཅད་སྐར་མ་གཅིག་ཞུས། དེ་ནས་སྐུ་ཞབས་རཱ་བ་ཌ་ལགས་ཀྱིས་ཕེབས་བསུའི་གསུང་བཤད་གནང་ཡོད།  དེ་རྗེས་མཛད་སྒོ་གོ་སྒྲིག་ཚོགས་ཆུང་གི་ཚོགས་གཙོ་སིམ་ལ་སློབ་གྲྭའི་སློབ་ཟུར་བསོད་ནམས་དཔལ་འབྱོར་ལགས་ཀྱིས་ངོ་སྤྲོད་གསུང་བཤད་གནང་གྲུབ་བསྟུན། ལོ་ལྔ་བཅུ་འཁོར་བའི་གླུ་དབྱངས་འཁྲབ་སྟོན་གནང་། དེ་ནས་སློབ་གྲྭའི་སློབ་སྤྱི་སྐུ་ཞབས་པིར་ཏམ་སིང་ལགས་ཀྱིས་སློབ་གྲྭའི་སྙན་ཐོ་ཞིག་སྒྲོགས་སྦྱང་གནང་། དེ་རྗེས་ཧིན་སྐད་ཐོག་ལོ་ལྔ་བཅུ་འཁོར་བའི་གླུ་གཞས་ཁག་གཅིག་འཁྲབ་སྟོན་གྲུབ་མཚམས་རིམ་བཞིན་བོད་དང་རྒྱ་གར་གྱི་སྲོ་རྒྱུན་གཞས་སྣ་འཁྲབ་སྟོན་གནང། དེ་ནས་སྐུ་ཞབས་ཇེ་རམ་ཐཱ་ཀུར་མཆོག་གིས་སིམ་ལ་གཏན་སློབ་དབུ་བརྙེས་ནས་ལོ་ངོ་ལྔ་བཅུ་འཁོར་བའི་དུས་དྲན་དང་འབྲེལ་བའི་དཔེ་དེབ་དབུ་འབྱེད་གནང་བ་དང་སྦྲགས་སློབ་གྲྭའི་ཆོས་དགེ་དང་བོད་དགེ་གཅིག་ལྕོགས་གནང་མྱོང་མཁན་སློབ་དགེ་ཟུར་པ་མཁས་དབང་ཟམ་གདོང་རིན་པོ་ཆེ་མཆོག་ལ་ཕྱག་རྟགས་ཤིག་ཕུལ་བ་མ་ཟད།  རིན་པོ་ཆེ་མཆོག་དང་བོད་མིའི་གཏན་སློབ་ཀྱི་ཚོགས་གཙོ་སྐུ་ཞབས་རཱ་བ་ཌ་མཆོག་གཉིས་ཀྱིས་སིམ་ལ་གཏན་སློབ་ཀྱི་སློབ་དགེ་དང་ལས་བྱེད་ཟུར་པ་ཁག་གཅིག་ལ་ལེགས་སྐྱེས་ཕྱག་རྟགས་གནང་ཡོད་པ་བཅས། །