༢༠༡༢ ཟླ་ ༥ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༧ ཉིན་རྡ་ས་བོད་ཁྱིམ་སློབ་གྲྭའི་རྩེད་ཐང་དུ་རྒྱལ་ཡུམ་ཆེན་མོར་རྗེས་དྲན་རྐང་རྩེད་སྤོ་ལོའི་འགྲན་བསྡུར་ཐེངས་ ༡༨ པ་དེ་དངོས་སུ་འགོ་འཛུགས་གནང་ཡོད།
དེ་ཡང་ཉིན་དེའི་ཕྱེད་ཡོལ་ཆུ་ཚོད་དང་པོའི་སྟེང་ཐོག་མའི་འགྲན་བསྡུར་གནང་མཁན་རུ་ཁག་གཉིས་ནི་ཀ་ལ་མན་ཊོན་དང་སྦོག་ར་རུ་ཁག་གཉིས་ཡིན་པ་དང་དེ་རྗེས་མོན་གྷོ་དང་སྦེལ་ཀོབ་རུ་ཁག་གཉིས་ཡིན་འདུག དབུ་འབྱེད་མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། རྒྱ་གར་རྒྱལ་ཡོངས་རྐང་རྩེད་སྤོ་ལོའི་རུ་ཁག་གི་འགན་འཛིན་ཟུར་པ་རྐང་སྤོལ་མཁས་ཅན་འབྲས་ལྗོངས་པ་བུ་ཆུང་བྷོ་ཊའི་ཡ་ལགས་དང་། ནེའུ་ཛི་ལན་ཌའི་རྐང་སྤོལ་རྩེད་འགྲན་པ་ཌེམ་བྷི་རོན་ལགས་གསུམ་གཙོས་བོད་མི་མང་སྤྱི་འཐུས་ཁག་གཅིག་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། གཟིགས་མོར་ཕེབས་པའི་སེར་སྐྱ་མང་ཚོགས་བཅས་མི་གྲངས་སྟོང་ཕྲག་མང་པོ་འཛོམས་བྱུང་ཡོད། མཛད་སྒོའི་ཐོག་མར་རྡ་སྟེང་བོད་ཁྱིམ་རོལ་ཆའི་རུ་ཁག་གིས་རོལ་དབྱངས་ཀྱིས་རུ་སྣེ་ཁྲིད་ནས་འགྲན་ཞུགས་རུ་ཁག་རྣམས་རྩེད་ཐང་སྟེང་རུ་སྒྲིག་བཏང་རྗེས། མི་མང་ཡོངས་རྫོགས་ཡར་བཞེངས་ཏེ་བོད་རྒྱལ་ཁབ་ཆེན་མོའི་རྒྱལ་གླུ་དང་རྒྱ་གར་གྱི་རྒྱལ་གླུ་བཏང་སྟེ་རྒྱལ་དར་གཉིས་སྔ་རྗེས་སྒྲེང་འཛུགས་དང་། བོད་མི་རིགས་ཀྱི་བདེན་པའི་འཐབ་རྩོད་ཆེད་བོད་ནང་རང་ལུས་མེར་སྲེག་གཏོང་མཁན་རྣམས་ཀྱིས་གཙོས་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་མཚོན་ཆེད་དུས་ཡུན་སྐར་མ་གཅིག་རིང་ངག་བཅད་མྱ་ངན་དང་བདེན་ཚིག་སྨོན་ལམ་གསུང་འདོན་གནང་། དེ་ནས་བོད་རྒྱལ་ཡོངས་རྩེད་རིགས་ཚོགས་པའི་སྐལ་བཟང་དོན་གྲུབ་ལགས་ཀྱིས་ཐེངས་འདིའི་རྐང་རྩེད་སྤོ་ལོའི་འགྲན་བསྡུར་དབུ་འཛུགས་ཀྱི་གསུང་བཤད་དང་། སྐུ་མགྲོན་གཙོ་བོ་བུ་ཆུང་བྷོ་ཊི་ཡ་དང་ཌེམ་བྷི་རོན་ལགས་གཉིས་ཀྱིས་ཀྱང་གསུང་བཤད་གནང་ཡོད།
རྒྱལ་ཡུམ་ཆེན་མོའི་རྗེས་དྲན་རྐང་རྩེད་སྤོ་ལོའི་འགྲན་བསྡུར་དངོས་གཞིའི་འགོ་འཛུགས་མ་བྱས་གོང་ཀང་ར་རྫོང་གི་རྒྱ་གར་བུ་མོའི་རུ་ཁག་དང་། བོད་ཁྱིམ་མཉམ་འབྲེལ་བུ་མོའི་རུ་ཁག་གཉིས་ཀྱི་བར་དུས་ཡུན་སྐར་མ་ ༣༠ རིང་མཛའ་འབྲེལ་རྐང་རྩེད་སྤོ་ལོའི་འགྲན་བསྡུར་ཞིག་གནང་ཡོད།དེ་ནས་ཕྱེད་ཡོལ་ཆུ་ཚོད་ ༢།༣༠ སྟེང་རྒྱལ་ཡུམ་ཆེན་མོར་རྗེས་དྲན་རྐང་རྩེད་སྤོ་ལོའི་འགྲན་བསྡུར་ཐེངས་ ༡༨ དངོས་སུ་འགོ་འཛུགས་ཀྱིས་ཐོག་མར་ཀ་ལ་མན་ཊོན་དོན་གྲུབ་གླིང་རུ་ཁག་དང་སྦོག་ར་བཀྲ་ཤིས་འཕེལ་རྒྱས་གླིང་གི་རུ་ཁག་གཉིས་བར་རྩེད་འགྲན་གནང་སྟེ་ཕྱོགས་གཉིས་ནས་སྤོ་ལོ་ ༡ རེ་བླུགས་ཏེ་འདྲ་མཉམ་ཆགས་ཡོད། ཕྱི་དྲོ་ཆུ་ཚོད་ ༤།༣༠ མོན་གྷོ་འདོད་དགུ་གླིང་དང་སྦེལ་ཀོབ་བདེ་སྐྱིད་སླར་གསོའི་རུ་ཁག་གཉིས་བར་རྩེད་འགྲན་གནང་སྟེ། མོན་གྷོ་འདོད་དགུ་གླིང་རུ་ཁག་གིས་སྤོ་ལོ་༡ བླུགས་ཐུབ་ཡོད་པ་དང་བྷེལ་ཀོབ་བདེ་སྐྱིད་སླར་གསོའི་རུ་ཁག་གིས་གཅིག་ཀྱང་བླུགས་མ་ཐུབ་པར་སོང་མོན་གྷོ་འདོད་དགུ་གླིང་རུ་ཁག་རྒྱལ་ཡོད།
