༢༠༡༢ ཟླ་ ༥ ཚེས་ ༢༥ རེས་གཟའ་པ་སངས།
༄༅། །ཡུ་རོབ་མཐུན་ཚོགས་ཀྱི་ཚོགས་གཞོན་པ་དང་ཆེས་མཐོའི་སྐུ་ཚབ་ལྕམ་སྐུ་ཁེ་ཊ་མཆོག་ལ་ཉེ་ལམ་བོད་མི་རང་ལུས་མེར་སྲེག་གཏོང་མཁན་ཚོའི་ཆེད་ཡུ་རོབ་མཐུན་ཚོགས་ངོས་ནས་གང་ཞིག་གནང་ཡོད་མེད་ཀྱི་ཡིག་ཐོག་ལ་དྲི་བ་ཞིག་ཕུལ་བར་ཁོང་གིས་ལན་འདེབས་གནང་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར། ཕྱི་ཚེས་ ༢༢ ཉིན་གནད་དོན་དེའི་ཐོག་ལྕམ་སྐུ་མཆོག་གིས་ཡོངས་ཁྱབ་ཐོག་ལན་འདེབས་གནང་བའི་ནང་འཁོད་དོན། གནད་དོན་དེར་ང་ཚོར་སེམས་འཚབ་ཆེན་པོ་ཡོད་པར་བརྟེན། གནད་དོན་དེའི་ཐད་སྔ་ལོའི་ཕྱི་ཟླ་ ༡༢ ཚེས་ ༩ ཉིན་རྒྱ་ནག་ཏུ་ཕེབས་པའི་ཡུ་རོབ་མཐུན་ཚོགས་ཀྱི་སྐུ་ཚབ་ནས་རྒྱ་ནག་གཞུང་གི་ཕྱི་སྲིད་བློན་ཆེན་ལས་ཁུངས་ལ་ཉེ་ཆར་བོད་མིས་རང་ལུས་མེར་སྲེག་བཏང་དང་གཏོང་བཞིན་པའི་གནད་དོན་དང་། ལྷག་པར་ཀིརྟི་དགོན་པར་དམ་བསྒྲགས་ཤུགས་ཆེ་བྱེད་བཞིན་པའི་གནས་ཚུན་ཐོན་མུས་ཡིན་པའི་ཐོག་ཡུ་རོབ་མཐུན་ཚོགས་ལ་སེམས་འཚབ་ཤུགས་ཆེ་ཡོད་ཅེས་གསུངས་སྐོར་བརྗོད་ཡོད། དེ་བཞིན་ང་ཚོ་ཡུ་རོབ་མཐུན་ཚོགས་ཀྱི་ངོས་ནས་རྒྱ་ནག་གི་དཔོན་རིགས་ཚོར་བོད་མིའི་རང་ལུས་མེར་སྲེག་གི་གནད་དོན་སྤྱི་དང་ཡང་སྒོས་ས་གནས་ཀྱི་འཛུགས་སྐྲུན་ནང་དོན་དམ་གྱི་བོད་མི་མཉམ་ཞུགས་བྱ་རྒྱུར་དཀའ་ངལ་འཕྲད་བཞིན་པ་དེ་དག་གི་རྩ་བའི་རྒྱུ་རྐྱེན་གང་ལ་ཐུག་ཡོད་མེད་རྟོགས་ཞིབ་བྱེད་པའི་འབོད་སྐུལ་གནང་ཡོད་སྐོར་གསུངས་ཡོད། སྔ་ལོའི་ཕྱི་ཟླ་ ༡༢ ཚེས་ ༡༢ རྒྱ་ནག་འཐབ་ཕྱོགས་གཅིག་གྱུར་ལས་ཁུངས་ཀྱི་བློན་ཆེན་གཞོན་པ་ཀྲུའུ་ཝན་ཆོན་བྷ་ར་སེར་དུ་འབྱོར་སྐབས་བོད་ནང་གི་གནད་དོན་ཐོག་ལ་ཡུ་རོབ་མཐུན་ཚོགས་ལ་སེམས་འཚབ་ཡོད་སྐོར་གསལ་སྟོན་བྱས་པ་ཡིན། དེ་བཞིན་ཁོང་གིས། རྒྱ་ནག་གཞུང་ནས་བོད་དོན་དཀའ་ངལ་སེལ་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་གྲོས་མོལ་བྱ་རྒྱུ་འབོད་སྐུལ་དང་བོད་མི་གནས་སྡོད་ས་གནས་ཁག་ཏུ་རྟོག་ཞིབ་ཏུ་བསྐྱོད་རྒྱུའི་རེ་འདུན་བཏོན་ཡོད་ཀྱང་ད་བར་རྒྱ་ནག་གཞུང་ནས་ཁས་ལེན་བྱས་མ་བྱུང་ཞེས་ཀྱང་གསུངས་འདུག་པ་བཅས། །
