༢༠༡༢ ཟླ་ ༥ ཚེས་ ༣༠་རེས་གཟའ་ལྷག་པ།
༄༅། །འདི་གར་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༡༢ ཟླ་ ༥ ཚེས་ ༣༠ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༥ ཚེས་ ༢༨ ཉིན་འཕྲོད་བསྟེན་བཀའ་བློན་མཆོག་གིས་པོ་ལེན་ཌེའི་འཕྲོད་བསྟེན་བློན་ཆེན་ལྷན་ཁང་དང༌། ཚན་རིག་དང་མཐོ་སློབ་བློན་ཆེན་ལྷན་ཁང༌། དེ་བཞིན་ཕྱི་སྲིད་བློན་ཆེན་ལྷན་ཁང་བཅས་སུ་གནད་ཡོད་མི་སྣ་དང་ལྷན་མཇལ་འཕྲད་སྐབས་པོ་ལེན་ཌེ་གཞུང་དང་དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་དབར་འཕྲོད་བསྟེན་དང་སྨན་རིགས་སྐོར་བཀའ་བསྡུར་གནང༌ཡོད།
སྐབས་དེར་བཀའ་བློན་ཚེ་རིང་དབང་ཕྱུག་མཆོག་གིས་རང་རིགས་བཙན་བྱོལ་བོད་ཕྲུག་ཚོར་སྨན་གྱི་སློབ་སྦྱོང༌། སོའི་སྨན་པའི་སློབ་སྦྱོང༌། ཕྱི་བཅོས་གསོ་ཐབས་པའི་སློབ་སྦྱོང༌། སྤྱི་ཚོགས་འཕྲོད་བསྟེན་སོགས་ཀྱི་སློབ་སྦྱོང་མཐུན་རྐྱེན་ཡོང་ཐབས་སྐོར་འབོད་སྐུལ་ཞུས་པ་དང་ཆབས་ཅིག་པོ་ལིཤ་སློབ་མའམ་སྨན་པ་དང་། དེ་བཞིན་པི་ཨེཇ་ཌི་སློབ་ཕྲུག་ཚོས་བོད་ཀྱི་ཐུན་མོང་མ་ཡིན་པའི་གསོ་བ་རིག་པའི་ཐོག་སློབ་སྦྱོང་བྱེད་བློ་ཡོད་ཚེ་མཐུན་འགྱུར་གང་ཐུབ་ཞུ་རྒྱུ་ཡིན། ལྷག་པར་པོ་ལིཤ་སྨན་པ་ནས་བཙན་བྱོལ་བོད་མིའི་སྤྱི་ཚོགས་ནང་དྭང་བླང་གི་ཞབས་འདེགས་ཞུ་བློ་ཡོད་རིགས་ལ་དགའ་བསུ་ཞུ་རྒྱུ་ཡིན་ཞེས་གསུངས་ཡོད། ཕྱི་དྲོ་བཀའ་བློན་མཆོག་གིས་ཝར་སོ་(Civitus)མཐོ་སློབ་ཀྱི་སློབ་ཕྲུག་ཚོར་འཕྲོད་བསྟེན་ལས་ཁུངས་ཀྱི་བཙན་བྱོལ་སྤྱི་ཚོགས་ནང་གཞི་རིམ་འཕྲོད་བསྟེན་བལྟ་སྐྱོང་དང༌། ལྷག་པར་བོད་མིའི་སྨན་བཅོས་བལྟ་སྐྱོང་ལས་གཞིའི་ཐོག་གསུང་བཤད་དང་བགྲོ་གླེང་གནང་ཡོད་པ་བཅས། །