༢༠༡༢ ཟླ་ ༥ ཚེས་ ༡༡ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༤ ཉིན་དགུང་གྲངས་ ༤༧ ལ་སོན་པའི་ཨ་མི་རི་ཀའི་རོག་ཅེས་པའི་གླུ་གཞས་གཏོང་མཁན་གྲགས་ཅན་དང་ཡུན་རིང་ནས་བོད་དོན་ལ་རྒྱབ་སྐྱོར་གནང་མཁན་སྐུ་ཞབས་(Adam Yauch) ཨ་ཌམ་ཡའོཀ་ལགས་འདས་གྲོས་སུ་གྱུར་བར་བོད་མིའི་སྒྲིག་འཛུགས་ལ་བློ་ཕམ་ཆེན་པོ་བྱུང་ཡོད། དམ་པ་ཁོང་དང་གྲོགས་པོ་གཞན་གཉིས་ཀྱིས་བཙུགས་པའི་བྷིསི་ཊི་བོ་ཡེ་སི་(Beastie Boys) ཞེས་པའི་རོལ་དབྱངས་ཚོགས་པ་དེར་རྒྱལ་སྤྱིའི་སྟེང་གི་རོལ་དབྱངས་ཀྱི་བྱ་དགའ་ཆེ་ཤོས་གྷར་མི་ཨ་ཝར་ཌི་(Grammy Award)ཞེས་པ་དེ་ཐེངས་གསུམ་ཐོབ་མྱོང་ཡོད་པ་མ་ཟད། དམ་པ་ཁོང་གིས་འགན་འཁུར་གཙོ་བོ་གནང་བའི་ཐོག་ལོ་རབས་དགུ་བཅུ་པའི་ནང་། བོད་རང་དབང་། ཞེས་པའི་རོལ་དབྱངས་འདུ་འཛོམས་ཆེ་ཁག་འགའ་ཞིག་གོ་སྒྲིག་གནང་སྟེ་འཛམ་གླིང་མང་ཚོགས་སྤྱི་དང་ལྷག་པར་གཞོན་སྐྱེས་ཚོའི་ཁྲོད་བོད་དོན་དྲིལ་བསྒྲགས་ཧ་ཅང་ཤུགས་ཆེ་བྱུང་ཡོད། ཁོང་རྣམ་པས་བཟོས་པའི་གླུ་གཞས་འཁོར་ཐག་འཛམ་གླིང་ཁྱོན་ཡོངས་སུ་ས་ཡ་བཞི་བཅུ་ཙམ་ཚོང་འགྲེམས་གནང་ཡོད། དམ་པ་ཁོང་གིས་ཕྱི་ལོ་ ༡༩༩༥ ལོར་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུས་ཡོད་པ་མ་ཟད། དེ་ནས་བཟུང་བོད་བརྒྱུད་ནང་བསྟན་ལའང་དོ་སྣང་སླེབས་ཡོད།
ཕྱོགས་མཚུངས་དམ་པ་ཁོང་གིས་བོད་དོན་རྒྱབ་སྐྱོར་ཆེད་མི་ལ་རས་པའི་ཐེབས་རྩ། (Milarepa Foundation) ཞེས་པ་གསར་འཛུགས་གནང་སྟེ་རྒྱ་ནག་གཞུང་གིས་བོད་ནང་བཙན་འཛུལ་བྱས་རྗེས་བོད་མི་ཚོར་དྲང་བདེན་མིན་པའི་སྲིད་བྱུས་ལག་བསྟར་བྱས་དང་བྱེད་བཞིན་པའི་སྐོར་ལ་གོ་རྟོགས་རྒྱ་ཁྱབ་ཏུ་སྤེལ་ཐབས་གནང་དང་གནང་མུས་ཡིན་འདུག ཐེབས་རྩའི་གོ་སྒྲིག་འོག་ཕྱི་ལོ་ ༡༩༩༦ ལོར་ཨ་རིའི་གྲོང་ཁྱེར་སན་ཕ་རན་སི་སི་ཀོའི་ནང་(San Francisco) དུ་བོད་དོན་གྱི་རོལ་དབྱངས་འདུ་འཛོམས་ཧ་ཅང་རྒྱ་ཆེན་པོ་ཞིག་གོ་སྒྲིག་ཞུ་སྐབས་མང་ཚོགས་ ༡༠༠ ༠༠༠ འདུ་འཛོམས་བྱུང་ཡོད།
འདུ་འཛོམས་དེ་ནི་ཕྱི་ལོ་ ༡༩༨༥ ལོར་ལ་ཡིབ་ཨེ་ཌ1985′s Live Aidཞེས་པའི་འདུ་འཛོམས་རྗེས་གྲགས་ཆེ་ཤོས་གཉིས་པ་དེ་ཆགས་ཡོད། དེ་རྗེས་རིམ་བཞིན་བོད་རང་དབང། ཞེས་པའི་རོལ་དབྱངས་འདུ་འཛོམས་དེ་བཞིན་ཨ་རིའི་གྲོང་ཁྱེར་ནིའུ་ཡོཀ་New York Cityདང་ཝ་ཤིང་ཊོན། Washington DC ཉི་ཧོང་གི་རྒྱལ་ས་ཊོཀ་ཁྱོ། Tokyo ཨོ་སི་ཊོ་ལི་ཡའི་རྒྱལ་ས་སི་ཌི་ནི། Sydney ཧོལ་ལན་ཌིའི་རྒྱལ་ས་ཨེམ་སཊར་ཌམ། Amsterdam ཐེ་ཝན་གྱི་རྒྱལ་ས་ཐེ་པེ་Taipeiབཅས་ཀྱི་ནང་ཚོགས་ཡོད། དེར་བརྟེན་བོད་མིའི་སྒྲིག་འཛུགས་ཀྱིས་དམ་པ་ཁོང་གིས་བོད་དོན་ཆེད་ལྷག་བསམ་རྣམ་དག་ཐོག་ནས་རྒྱབ་སྐྱོར་གནང་བར་བོད་མི་ཚོས་རྟག་ཏུ་བཀའ་དྲིན་སྙིང་བཅངས་ཞུ་རྒྱུ་དང་། རྗེས་ཤུལ་ནང་མི་སྤུན་མཆེད་ཚོར་གདུང་སེམས་མཉམ་སྐྱེའི་སེམས་གསོ་དང་སྨོན་ལམ་ཞུ་རྒྱུ་ཡིན་ཞེས་བཀའ་ཁྲི་བློ་བཟང་སེང་གེ་མཆོག་གིས་གསུངས་ཡོད་པ་མ་ཟད། བཀའ་ཁྲི་མཆོག་གིས་དམ་པ་ཁོང་ཐོག་མར་ཧར་ཝཌ་སློབ་གྲྭར་མཇལ་བ་ནས་བཟུང་གྲོགས་པོ་བློ་ཐུབ་ཆགས་ཡོད་སྐོར་དྲན་གསོ་ཡང་གནང་ཡོད་པ་བཅས།།
