༢༠༡༢ ཟླ་ ༥ ཚེས་ ༢༡ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གོ་སྒྲིག་འོག་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་ཕྱག་འཁྱེར་གནང་ཕྱོགས་སྐོར་བཀའ་བསྡུར་གནང་རྒྱུའི་ལྷན་ཚོགས་ཐེངས་དང་པོ་རྡ་ས་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་ཕྱི་ལོ་ ༢༠༡༢ ཟླ་ ༥ ཚེས་ ༡༨ ཉིན་འགོ་འཛུགས་ཀྱིས་ཕྱི་ཚེས་ ༡༩ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད།
དེ་ཡང་ཉིན་གྲངས་གཉིས་རིང་ཚོགས་ལྷན་ཚོགས་ནང་གྲོས་གཞི་དོན་ཚན་གསུམ་ཐོག་བཀའ་བསྡུར་ཞིབ་ལྷུག་གནང་མཐར་གྲོས་ཆོད་ཁག་གཏན་འབེབས་བྱུང་བ་རྣམས་ཚོགས་དྲུང་གིས་སྒྲོགས་སྦྱང་ཞུས་རྗེས་གྲོས་ཆོད་སྟེང་སྐུ་ཚབ་རྣམ་པས་མཚན་རྟགས་ལས་ཐམ་བཀོད་ཡོད།
དེ་ནས་ཆོས་རིག་བཀའ་བློན་མཆོག་གིས་ལྷན་ཚོགས་མཇུག་སྡོམ་གྱི་གསུང་བཤད་གནང་དོན། དེ་རིང་འདིར་ང་ཚོས་ཉིན་གྲངས་གཉིས་རིང་བཙུན་མ་རྣམས་ཀྱི་ཆེད་དུ་ལྷན་ཚོགས་སྐོང་ཚོགས་ཤིག་གནང་སྟེ། བོད་ཀྱི་རྒྱལ་རབས་ལོ་རྒྱུས་ནང་གསར་གཏོད་གཟི་བརྗིད་དང་ལྡན་པ་ཞིག་བྱུང་ཡོད། དེ་སྔ་བོད་ཀྱི་རྒྱལ་རབས་ལོ་རྒྱུས་ནང་བྱུང་མ་མྱོང་བ་ཞིག་ང་ཚོས་གསར་གཏོད་བྱས་པ་རེད། དེ་ཡང་ཚང་མས་བཀའ་བསྡུར་ལྷུག་ལེན་ཐོག་སྤྱི་མོས་བྱུང་བ་ཞིག་རེད། ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ཁག་གཞི་རྩར་བཞག་སྟེ་གོ་སྒྲིག་བྱས་ཏེ་གྲུབ་འབྲས་དེ་ལྟར་ཐོན་ཡོད། དགེ་བཤེས་མའི་ཕྱག་འཁྱེར་གནང་རྒྱུའི་ཐག་གཅོད་བྱུང་བ་གཞིར་བཟུང་མ་འོངས་པར་བཙུན་མ་རྣམས་ནས་སློབ་གཉེར་རྒྱག་རྒྱུ་ཧ་ཅང་གལ་ཆེན་པོ་ཆགས་ཡོད། ལོ་ངོ་ལྔ་བཅུ་ང་གྲངས་ཤིག་བཙན་བྱོལ་ནང་བསྡད་ནས་བཙུན་མས་དགེ་བཤེས་གཏོང་སའི་མཚམས་སུ་སླེབས་པ་དེ་ཧ་ཅང་གཟི་བརྗིད་ཆེན་པོ་རེད། བོད་ནང་བཙུན་དགོན་མང་པོ་ཡོད་ཀྱང་དགེ་བཤེས་མ་གཏོང་རྒྱུ་བསམ་བློ་འཁོར་མཁན་དང་སྐད་ཆ་གླེང་མཁན་མེད། འོན་ཀྱང་བཙན་བྱོལ་སྤྱི་ཚོགས་ནང་དེ་འདྲ་བྱུང་བ་ཧ་ཅང་གི་གཟི་བརྗིད་ཆེན་པོ་རེད། དེ་བཞིན་ང་ཚོས་བསླབ་པ་ཚད་ལོན་པའི་བསླབ་ཐོན་ཟིན་པའི་བཙུན་མ་རྣམས་ལ་དགེ་བཤེས་མའི་ཕྱག་འཁྱེར་འབུལ་རྒྱུ་ཐག་གཅོད་བྱས་ཡོད། ཅེས་སོགས་ཀྱི་གསུང་བཤད་གྲུབ་མཚམས་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་གིས་ཀྱང་གསུང་བཤད་གནང་གྲུབ་མཚམས་ཆོས་རིག་དྲུང་ཆེེས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས། །