༢༠༡༢ ཟླ་ ༥ ཚེས་ ༢༢ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༢༢ ནས་ ༢༧ བར་ཆོས་རིག་བཀའ་བློན་པདྨ་ཆོས་འབྱོར་མཆོག་དང་ལྷན་བཅར་ཆོས་རིག་དྲུང་ཆེ་ཆོས་ཁྲི་སྟེང་པ་ངག་དབང་ཆོས་གྲགས་ལགས་བདེ་སྐྱིད་གླིང་ས་གནས་འགོ་འཛིན་གྱི་ཁྱབ་ཁོངས་མི་མང་དང་དགོན་སྡེ། སློབ་གྲྭ་ཁག་བཅས་སུ་འཚམས་གཟིགས་སུ་ཕེབས་འདུག
དེ་ཡང་ཁོང་རྣམ་པ་གཉིས་ཕྱི་ལོ་ ༢༠༡༢ ཟླ་ ༥ ཚེས་ ༢༢ ཉིན་གྱི་སྔ་དྲོ་རྡ་ས་ནས་བདེ་སྐྱིད་གླིང་ས་གནས་སུ་ཕེབས་ཐོན་གནང་ཡོད། ཕྱི་ཚེས་ ༢༣ ཉིན་གྱི་སྔ་དྲོ་དཔལ་སྐྱའི་བཙུན་དགོན་རིན་ཆེན་ཆོས་གླིང་གི་བཙུན་མ་རྣམས་དང་བདེ་སྐྱིད་གླིང་མི་མང་ལ་གསུང་བཤད་གནང་རྗེས་དགོན་དེར་འཚམས་གཟིགས་གནང་རྒྱུ་ཡིན་འདུག ཉིན་རྒྱབ་འབྲི་གུང་བྱང་ཆུབ་གླིང་དགོན་པ་དང་འབྲི་གུང་བཤད་གྲྭ སྲོང་བཙན་དཔེ་མཛོད། དེ་བཞིན་འབྲི་གུང་བཙུན་དགོན་བསམ་གཏན་གླིང་དུ་འཚམས་གཟིགས་གནང་གྲུབ་མཚམས་དེའི་གྲྭ་བཙུན་དང་མི་མང་ལ་གསུང་བཤད་གནང་རྗེས་འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭར་འཚམས་གཟིགས་གནང་རྒྱུ་ཡིན་འདུག ཕྱི་ཚེས་ ༢༤ ཉིན་གྱི་སྔ་དྲོ་ངེས་དོན་དགའ་ཚལ་གླིང་དང་། བཀའ་བརྒྱུད་བདེ་ཆེན་ཆོས་འཁོར་གླིང། དཔལ་བཀྲིས་འཁྱིལ་བཅས་དགོན་སྡེ་ཁག་གསུམ་ལ་འཚམས་གཟིགས་གནང་སྟེ་དགེ་འདུན་པ་དང་གཞིས་སྒར་མི་མང་ལ་གསུང་བཤད་གནང་རྒྱུ་ཡིན་འདུག ཉིན་རྒྱབ་ངོར་ཨེ་ཝམ་དགོན་དང་། བཀའ་བརྒྱུད་ཀུན་སྐྱབས་གླིང། ས་སྐྱའི་བཙུན་མའི་བཤད་གྲྭ ཛ་མན་གཡུང་དྲུང་གླིང་བཅས་སུ་འཚམས་གཟིགས་གནང་སྟེ་གྲྭ་བཙུན་དང་མི་མང་ལ་གསུང་བཤད་གནང་རྒྱུ། ཕྱི་ཚེས་ ༢༥ སྔ༌དྲོ་ཚེ་རིང་དོན་ལྡན་གཞིས་ཆགས་སུ་འཚམས་གཟིགས་དང་མི་མང་ལ་གསུང་བཤད། དེ་བཞིན་དཔལ་ས་སྐྱའི་ཆོས་སྒར་ལ་འཚམས་གཟིགས་གནང་རྒྱུ་ཡིན་འདུག ཉིན་རྒྱབ་ར་ཇི་སྤུར་མཉམ་ལས་བཟོ་གྲྭ་དང་སློབ་གྲྭ ཁ་འཐོར་མི་མང་ལ་གསུང་བཤད་གནང་རྒྱུ། ཕྱི་ཚེས་ ༢༦ ཉིན་སྔ་དྲོ་དཔལ་ས་སྐྱ་མཐོ་སློབ་དང་རྙིང་མའི་བཙུན་དགོན་དུ་འཚམས་གཟིགས་གནང་རྗེས་མ་སུ་རི་གཏན་སློབ་དང་བོད་ཁྱིམ་སློབ་གྲྭར་འཚམས་གཟིགས་ཀྱིས་དགེ་ལས་སློབ་ཕྲུག་རྣམས་ལ་གསུང་བཤད་གནང་རྗེས་ཕྱི་ཚེས་ ༢༧ ཉིན་བདེ་སྐྱིད་གླིང་ནས་རྡ་སར་ཕྱིར་ཕེབས་གནང་རྒྱུ་ཡིན་འདུག་པ་བཅས། །
