༢༠༡༢ ཟླ་ ༥ ཚེས་ ༡༨ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཆོས་རིག་ལས་ཁུངས་ནས་གོ་སྒྲིག་འོག་ཕྱི་ལོ་ ༢༠༡༢ ཟླ་ ༥ ཚེས་ ༡༨ ནས་ ༡༩ བར་ཉིན་གྲངས་གཉིས་རིང་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་ཕྱག་འཁྱེར་གནང་ཕྱོགས་སྐོར་བཀའ་བསྡུར་གནང་རྒྱུའི་ལྷན་ཚོགས་ཐེངས་དང་པོ་རྡ་ས་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་དབུ་འཛུགས་གནང་བར་ཆོས་རིག་བཀའ་བློན་མཆོག་གིས་ཚོགས་འདུ་ངོ་སྤྲོད་ཀྱི་གསུང་བཤད་གནང་དོན། དེ་རིང་འདིར་ཆོས་རིག་ལས་ཁུངས་ནས་གོ་སྒྲིག་ཐོག་བསླབ་པ་མཐར་སོན་བཙུན་མ་རྣམས་ལ་དགེ་བཤེས་མའི་ཕྱག་འཁྱེར་གནང་ཕྱོགས་སྐོར་བཀའ་བསྡུར་གནང་རྒྱུའི་ལྷན་ཚོགས་བསྐོངས་ཡོད། ལྷན་ཚོགས་འདིའི་མཛད་སྒོར་བཀའ་ཁྲི་མཆོག་མཛད་བྲེལ་ཡོད་ཀྱང་འདི་གར་ཕེབས་པར་ཐུགས་རྗེ་ཆེ་ཞུ་རྒྱུ་དང་ཆབས་ཅིག་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་གིས་གཙོས་འདི་གར་ཕེབས་པའི་སྐུ་ཚབ་ཚང་མར་ངས་ཆོས་རིག་ལས་ཁུངས་ཀྱི་ཚབ་ཞུས་ཏེ་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། བསླབ་པ་མཐར་སོན་པའི་བཙུན་མར་ཕྱག་འཁྱེར་འབུལ་རྒྱུའི་སྐོར་ལ་དེ་སྔ་ནས་བཀའ་བསྡུར་གང་ཙམ་བྱུང་འདུག དེ་བཞིན་ཆོས་རིག་ལས་ཁུངས་ཐོག་ནས་སྙན་གསེང་རབ་དང་རིམ་པ་ཞུས་འདུག འོན་ཀྱང་རང་ཉིད་དང་འབྲེལ་བ་ཁ་སྔོན་ཕྱི་ཟླ་ ༩ ཚེས་ ༢༢ ནས་ ༢༤ བར་ཆོས་བརྒྱུད་ཁག་གི་བླ་ཆེན་རྣམ་པའི་ཚོགས་འདུ་སྐབས་ལ་བཀའ་བསྡུར་བྱུང་ཡོད། སྐབས་དེར་ངས་ང་ཚོ་དུས་རབས་ཉེར་གཅིག་ནང་སླེབས་ཡོད། དེའི་ནང་ང་ཚོ་བོད་མི་ས་ཡ་དྲུག་ཡོད་པའི་ནང་ནས་ཕྱེད་ཀ་བུད་མེད་ཡིན་པས་དེར་ཐོབ་ཐང་འདྲ་མཉམ་ཡོད་པ་མ་རེད་ཅེས་གསལ་བཤད་བྱེད་ཐབས་མེད། སྔར་མེད་ཀྱང་ང་ཚོས་གསར་བཟོ་བྱ་རྒྱུའི་དུས་ལ་བབས་ཡོད་པ་རེད་ཅེས་ཞུས་པ་ཡིན། ང་ཚོས་ཆོས་རིག་ལས་ཁུངས་ནས་ལྷན་ཚོགས་འདི་གོ་སྒྲིག་བྱེད་དགོས་དོན་ནི་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༡༩༩༥། ༢༠༠༥། ༢༠༠༨། ༢༠༡༠། ༢༠༡༡། ༢༠༡༢ བཅས་སོ་སོར་དགེ་བཤེས་མའི་ཕྱག་འཁྱེར་སྐོར་ལ་བཀའ་སློབ་རབ་དང་རིམ་པ་ཕེབས་འདུག་པ་དེ་དག་གཞི་རྩར་བཞག་ཡོད། དེ་བཞིན་ཉེ་ཆར་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་དང་དགའ་ལྡན་ཁྲི་རིན་པོ་ཆེ་མཆོག་གི་དྲུང་དུ་བཅར་ཏེ་ལྷན་ཚོགས་དེ་འདྲ་ཞིག་གོ་སྒྲིག་ཞུ་འཆར་ཡོད་སྐོར་སྙན་གསེང་ཞུ་སྐབས་དགག་ཆ་གང་ཡང་གནང་གི་མི་འདུག དེང་སྐབས་རྒྱལ་སྤྱིའི་ཐོག་ང་ཚོ་ནང་པའི་ཆོས་འདི་རྩ་ཆེན་ཞིག་དང་དོ་སྣང་བྱེད་དགོས་པ་ཞིག་ཆགས་ཡོད། དེ་སྔོན་རྡ་ས་མཚན་ཉིད་གྲྭ་ཚང་ནས་ཇར་མན་གྱི་བུད་མེད་གཅིག་ལ་རིས་མེད་དགེ་བཤེས་ཀྱི་ཕྱག་འཁྱེར་གནང་སྟེ་འཛམ་གླིང་ནང་དོ་སྣང་དང་ཁྱབ་བསྒྲགས་ཆེན་པོ་བྱུང་ཡོད། དེ་བཞིན་ང་ཚོས་ག་དུས་ཡིན་རུང་༸གོང་ས་མཆོག་གི་བཀའ་གསུང་ཅི་སྒྲུབ་ཞུས་དགོས་ཞེས་མ་ཎི་ལྟར་འདོན་བཞིན་ཡོད་ཀྱང་ཞིབ་ཚགས་ལྟ་སྐབས། ༸གོང་ས་མཆོག་གིས་བཀའ་སློབ་ཕེབས་པ་ལྟར་རང་ཉིད་ནས་གཙོས་མང་པོས་བསྒྲུབ་ཀྱི་མེད་པའི་ཚོར་སྣང་ཞིག་སླེབས་ཀྱི་འདུག གསར་གཏོད་ཅེས་པ་འདིར་བསམ་བློ་རྒྱ་ཆེན་པོ་གཏོང་དགོས་སྟབས། ང་ཚོས་གྲོས་བསྡུར་ཐེངས་མང་བྱས་པ་ཡིན། དེང་སྐབས་འཛམ་གླིང་སྟེང་ངོམ་ཆོག་པའི་ང་ཚོའི་ནང་པ་སངས་རྒྱས་ཀྱི་ཆོས་འདི་རེད། ནང་ཆོས་ལ་བརྟེན་ནས་འཛམ་གླིང་ཐོག་ནས་ང་ཚོར་རྒྱབ་སྐྱོར་རག་གི་ཡོད། དེར་བརྟེན་ང་ཚོས་ནང་ཆོས་དེ་བཞིན་སྤུས་དག་ཅིག་ཡོང་ཆེད་སློབ་གཉེར་གནང་དགོས་ཀྱི་ཡོད། ཁྱེད་རྣམ་པས་ཉིན་གྲངས་གཉིས་རིང་བཀའ་བསྡུར་ལྷུག་པོ་དོན་ལྡན་ཞིག་གནང་སྟེ་ལྷན་ཚོགས་གྲོལ་སྐབས་གསར་གཏོད་གནང་བ་དེ་འགྲིགས་འདུག་བསམ་པ་དང་། མ་འོངས་པར་ང་ཚོས་བྱས་པ་དེར་མི་གཞན་ནས་མིག་དཔེ་ལེན་ཐུབ་པའི་ཕྱག་ལས་གནང་ཐུབ་རྒྱུ་ཞིག་ང་ཚོས་ད་རེས་གནང་དགོས་ཀྱི་ཡོད་པ་ལྟར། གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུང་བཤད་གནང་ཡོད་པ་བཅས། །