༢༠༡༢ ཟླ་ ༥ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༥ ཉིན་བཞུགས་སྒར་ཀིརྟིའི་བྱེས་པ་གྲྭ་ཚང་དུ་ཀིརྟི་རིན་པོ་ཆེ་སྐུ་ཕྲེང་རིམ་བྱོན་གྱིས་མདོ་རོང་གི་ཡུལ་དུ་བསྟན་པ་སྤེལ་ནས་མི་ལོ་དྲུག་བརྒྱ་ཧྲིལ་པོ་འཁོར་བའི་དུས་དྲན་མཛད་སྒོ་རྒྱ་ཆེ་ཞིག་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༩ ཐོག་སྐུ་མགྲོན་གྱི་གཙོ་བོ་དགའ་ལྡན་ཁྲི་པ་རི་རྫོང་རིན་པོ་ཆེ་མཆོག་དང་། ཀིརྟི་རིན་པོ་ཆེ་མཆོག་གིས་དབུས་མཁན་བླ་སྤྲུལ་དགེ་འདུན་རྣམ་པ། བོད་མི་མང་སྤྱི་འཐུས་དང་སྤྱི་ཟུར་རྣམ་པ། དྲུང་ཆེ་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། མདོ་སྨད་མི་མང་བཅས་ཁྱོན་མི་གྲངས་ ༡༠༠༠ བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གི་སྣང་གསལ་ཞལ་ཕྱེ་གནང་རྗེས་འདུས་ཚོགས་ཡོངས་ཀྱིས་རྒྱུན་ཆགས་གསུམ་པ་དང་། དཀོན་མཆོག་རྗེས་དྲན། རྟོགས་བརྗོད་འདུན་ལེགས་མ་བཅས་གསུང་འདོན་གནང་མུར་གསོལ་ཇ་འབྲས་སིལ་ཕུལ། དེ་ནས་དུས་དྲན་གོ་སྒྲིག་ཚོགས་ཆུང་གི་ཚོགས་གཙོ་དགེ་རྒན་དཀོན་མཆོག་རྒྱ་མཚོ་ལགས་ཀྱིས་དུས་དྲན་སྲུང་བརྩིའི་ངོ་སྤྲོད་གསུང་བཤད་གྲུབ་མཚམས་ཀིརྟི་དགེ་རྩ་ཚོགས་པའི་སྤྱི་ཁྱབ་རྒྱུན་ལས་ལྷན་ཚོགས་ཀྱི་ཚོགས་གཙོ་འབྲིང་བ་དཀོན་མཆོག་འཇིགས་མེད་ལགས་ཀྱིས་ཀིརྟི་སྐུ་ཕྲེང་དང་པོ་རོང་ཆེན་དགེ་འདུན་རྒྱལ་མཚན་དཔལ་བཟང་པོ་ནས་བཟུང་སྐུ་ཕྲེང་རིམ་བྱོན་གྱིས་མདོ་རོང་ཡུལ་དུ་བསྟན་པ་སྤེལ་ཞིང་རྒྱས་པར་མཛད་དེ་མི་ལོ་ཧྲིལ་པོ་དྲུག་བརྒྱ་འཁོར་བའི་དུས་དྲན་ངོ་སྤྲོད་ཀྱི་གསུང་བཤད་གནང་གྲུབ་བསྟུན་ཀིརྟི་རིན་པོ་ཆེ་མཆོག་གིས་དུས་དྲན་དང་འབྲེལ་བའི་གསུང་བཤད་གནང་དོན། དེ་རིང་རྗེས་དྲན་མཛད་སྒོར་ཕེབས་པ་རྣམས་ལ་འཚམས་འདྲི་ཞུ་རྒྱུ་ཡིན། དུས་དྲན་འདི་ཐོག་མར་ང་ཚོའི་ངོས་ནས་དུས་དྲན་ཞིག་ཞུ་རྩིས་མེད། འོན་ཀྱང་ལོ་དྲུག་བརྒྱ་འཁོར་བའི་དུས་དྲན་འདི་ཕ་ཡུལ་ཕྱོགས་ནས་བསམ་ཚུལ་བཏོན་ཏེ་ང་ཚོའི་དགེ་རྩ་ཚོགས་པའི་ངོས་ནས་གྲོས་ཆོད་བཞག་སྟེ་ལོ་གཅིག་གི་རིང་དུས་དྲན་སྲུང་བརྩི་ཞུ་རྒྱུ་གནང་བ་དེ་ཡང་ཁྲ་ཁྲ་ཟིང་ཟིང་མིན་པ་ཆོས་ཕྱོགས་ཐོག་ནས་རྗེས་དྲན་ཞུ་རྒྱུ་བྱས་པ་ཡིན། དུས་དྲན་འདིའི་ཐོག་མར་འབྱུང་ཁུངས་ནི་རོང་ཆེན་དགེ་འདུན་རྒྱལ་མཚན་མི་སྐྱ་ཡིན་པའི་སྐབས་ནས་ལོ་མང་པོའི་རིང་རྗེ་ཙོང་ཁ་པའི་ཞབས་ལ་གཏུགས་ནས་ལྷ་ལྡན་སྨོན་ལམ་ཆེན་མོ་ཚུགས་པའི་སྐབས་ལ་གཙུག་ལག་ཁང་གི་སྐུ་གསུང་ཐུགས་རྟེན་ཉམས་གསོ་བྱེད་རྒྱུ་དང་དགའ་ལྡན་རྣམ་པར་རྒྱལ་བའི་དགོན་ཕྱག་བཏབ་དུས་ཨར་པོའི་འགོ་ལས་སོགས་གནང་སྟེ་དུས་ཚོད་ནམ་ཡོད་སྐབས་གསན་བཞེས་འཆད་ཉན་སྒོམ་སྒྲུབ་གནང་ཡོད། ཕྱིས་སུ་རྗེ་རིན་པོ་ཆེས་མདོ་རོང་ཡུལ་དུ་བསྟན་པ་སྤེལ་དགོས་པའི་བཀའ་མངགས་ལྟར་མདོ་སྨད་ཡུལ་དུ་ཀིརྟི་མ་དགོན་ཕྱག་བཏབ་ནས་སྐུ་ཕྲེང་རིམ་པས་ད་བར་ལོ་ ༦༠༠ རིང་སངས་རྒྱས་ཀྱི་བསྟན་པ་རྒྱས་པའི་ཞབས་འདེགས་ཞུ་རྒྱུའི་གོ་སྐབས་བྱུང་བའི་ལོ་རྒྱུས་གནད་བསྡུས་དང་། ང་རང་ལ་ཆ་བཞག་ན་ཀིརྟི་ཚང་དུ་སྐྱེས་ཀྱང་སེམས་སྐྱོ་དགོས་པ་ཞིག་ལ་རང་ཡུལ་བཞག་ནས་བླ་སློབ་དབར་ཁ་གྱེས་ཏེ་ས་མཐར་འཁྱམས་དགོས་བྱུང་ཡོད་ཀྱང་། ལོ་ངོ་དྲུག་ཅུའི་རིང་༸སྐྱབས་མགོན་རྒྱལ་བའི་ཞབས་ལ་གཏུགས་ཏེ་ཆོས་དང་སྲིད་ཀྱི་བསླབ་བྱ་ཐོབ་ནས་ཆོས་སྲིད་གཉིས་ཀྱི་འགན་དབང་བཞེས་ཏེ་འཁོར་ལོས་བསྒྱུར་བའི་རྒྱལ་པོ་མཛད་པའི་སྐབས་བཀའ་ཡི་བློན་པོ་བྱེད་པའི་གོ་སྐབས་བྱུང་ཡོད། ཕ་ཡུལ་གྱི་དགེ་འདུན་པ་དང་བླ་སྤྲུལ་མཁན་པོ་ལས་སྣེ་སློབ་གཉེར་ཡོང་རྫོགས་ཀྱིས་ཆོས་འཆད་ཉན་དང་བསླབ་པ་སློབ་གཉེར་ཐོག་ཤུགས་བསྐྱོན་ཏེ་དགེ་འདུན་པ་མིང་དོན་མཚུངས་པ་ཞིག་ཡོང་བའི་ཐབས་ཤེས་གནང་དགོས་ཞེས་ཞུ་རྒྱུ་ཡིན། དེ་བཞིན་ཕ་ཡུལ་ཕྱོགས་ལ་རྒྱ་དང་བོད་འབྲེལ་ནས་བསྡད་ཡོད་པས་མི་རིགས་གཉིས་དབར་མཐུན་ལམ་བྱེད་རྒྱུ་དེ་ཧ་ཅང་གལ་ཆེན་པོ་ཡིན། བོད་རྒྱ་གཉིས་བདེ་སྐྱིད་དགོས། རྒྱ་མི་རིགས་དུང་ཕྱུར་མང་པོར་ང་ཚོའི་དགོན་པ་ཁག་གིས་ཆོས་ཕྱོགས་ཐོག་ནས་ཕན་ཐོགས་དང་རྒྱ་ནག་མི་མང་ལ་ཞི་བདེ་ཡོང་བ་བྱེད་དགོས་སྐོར་སོགས་ཀྱི་གསུང་བཤད་གནང་རྗེས་སྐུ་མགྲོན་གཙོ་བོ་དགའ་ལྡན་ཁྲི་རིན་པོ་ཆེ་མཆོག་གིས་གསུང་བཤད་གནང་དོན། བསྟན་པ་དར་ཞིང་རྒྱས་པ་ཡོང་རྐྱེན་གཙོ་བོ་ནི་ང་ཚོའི་བསོད་ནམས་དང་དད་པ་ཉམས་ལེན་ལ་རག་ལུས་ཡོད། ཆོས་ལ་རྨོངས་དད་ཙམ་གྱི་འཇུག་པ་མ་ཡིན་པར་མི་མང་གི་ཆོས་ཀྱི་ནང་དོན་ཡག་པོ་ཤེས་དགོས་པ་མ་ཟད། ཆོས་ཀྱི་ཕན་ཡོན་ཤེས་རྒྱུ་དེ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་རྗེས་དུས་དྲན་གོ་སྒྲིག་ཚོགས་ཆུང་གི་ཚོགས་གཞོན་བློ་བཟང་མདོ་སྔགས་ལགས་ཀྱིས་ཐུགས་རྗེ་ཆེ་གསུང་བཤད་གནང་སྟེ་བསྟན་འབར་མ་དང་དགེ་ལྡན་བསྟན་པ་རྒྱས་པའི་སྨོན་ལམ་གསུང་འདོན་གནང་ནས་དུས་དྲན་གྱི་མཛད་སྒོ་དངོས་གཞི་གྲོལ།
ཉིན་རྒྱབ་དུས་དྲན་སྲུང་བརྩི་དང་འབྲེལ་དགའ་ལྡན་ཁྲི་རིན་པོ་ཆེ་མཆོག་དབུ་བཞུགས་ཐོག་འཕགས་ཡུལ་ཀིརྟིའི་བྱེས་པ་གྲྭ་ཚང་དུ་ཐེངས་དང་པོའི་ཕར་ཕྱིན་དབྱར་ཆོས་ཆེན་མོ་གསར་ཚུགས་དབུ་འབྱེད་ཀྱི་དྲང་ངེས་དམ་བཅའ་ཆེན་མོ་ཚུགས་གནང་ཡོད། ཀིརྟི་སྐུ་ཕྲེང་དང་པོ་འཇམ་མགོན་བླ་མ་ཙོང་ཁ་པ་ཆེན་མོའི་དངོས་སློབ་མདོ་རོང་མཁས་པ་མི་བཞིའི་ཡ་གྱལ་བསྟན་པ་ཕྱོགས་མཐར་སྤེལ་བའི་དར་ཆེན་བདུན་གྱི་ནང་ཚན་རོང་ཆེན་དགེ་འདུན་དཔལ་བཟང་པོ་མཆོག་གིས་ཕྱི་ལོ་ ༡༤༢༡ ནང་ཀིརྟིའི་མ་དགོན་ཐོག་མ་ཀཱ་ལ་རིའི་དགོན་བཀྲ་ཤིས་ལྷུན་འགྲུབ་གླིང་ཕྱག་བཏབ་མཛད་པ་ནས་བཟུང་ཀིརྟི་སྐུ་ཕྲེང་རིམ་བྱོན་གྱིས་མདོ་རོང་ཡུལ་དུ་སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་མཐར་དར་ཞིང་རྒྱས་པར་མཛད་པ་མ་ཟད། རྒྱ་གར་དུ་ཕེབས་ཏེ་༸གོང་ས་གི་བཀའ་དགོངས་འོག་ཆོས་རིག་བཀའ་བློན་དང་། ཀིརྟིའི་བྱེས་པ་གྲྭ་ཚང་གི་ཆེས་མཐོའི་སློབ་གཉེར་ཁང་གསར་འཛུགས། སྔ་མོའི་ཀིརྟིའི་བླ་བྲང་དེ་ཉིད་མང་གཙོའི་འགྲོ་ལུགས་ཀྱི་དགེ་རྩ་ཚོགས་པ་ཞིག་ཏུ་བསྒྱུར་གནང་བ་བཅས་ཀྱི་མི་ལོ་དྲུག་བརྒྱ་ཧྲིལ་པོ་འཁོར་བར་དུས་དྲན་ཞིག་ཡིན་འདུག་པ་བཅས།།