༢༠༡༢ ཟླ་ ༥ ཚེས་ ༢༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཕྱི་ཟླ་ ༥ ཚེས་ ༢༣ ཉིན་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་ཊཱ་ལི་ཁུལ་གྱི་མཐོ་སློབ་ཀྱི་དགེ་ལས་སློབ་ཕྲུག་དང་མི་མང་བཅས་ཁྱོན་མི་གྲངས་སྟོང་ཚོ་བརྒལ་བར་ཚན་རིག་ནང་པའི་གྲུབ་དོན་ཐོག་ནས་བློ་སྦྱོང་ཐབས། ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། དེ་རིང་ངོས་རང་འདི་གར་ཁྱེད་རྣམས་དང་ཐུག་བྱུང་བར་ཧ་ཅང་དགའ་པོ་བྱུང། ཁྱེད་རང་ཚོ་ཚང་མར་འཚམས་འདྲི་ཡོད། འདིར་ཡོད་པའི་སློབ་ཕྲུག་ཚོ་ནི་དུས་རབས་ཉེར་གཅིག་གི་མི་རབས་ཤིག་ཡིན་སྟབས། དུས་རབས་འདི་བཞིན་འདས་པའི་དུས་རབས་ཉི་ཤུ་ལྟར་མི་གསོད་ཁྲག་སྦྱོར་གྱི་དུས་རབས་བཞིན་མ་ཡིན་པར་ཞི་བདེ་དང་འཚེ་བ་མེད་པའི་དུས་རབས་ཤིག་བསྐྲུན་རྒྱུར་ང་ཚོ་ཚང་མར་འགན་ཡོད། ཅེས་སོགས་ཀྱི་བཀའ་སློབ་སྩལ་རྗེས་ཁོང་རྣམ་པར་དྲི་བ་ཞུ་རྒྱུའི་གོ་སྐབས་སྩལ་བ་ལྟར་སློབ་ཕྲུག་གི་དྲི་བ་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ད་ལྟའི་བོད་མིའི་སྙིང་སྟོབས་ནི་ལོ་ངོ་ཉིས་སྟོང་ལྷག་གི་ལོ་རྒྱུས་ཡོད་པའི་ནང་པའི་སངས་རྒྱས་པའི་ཆོས་དང་འདྲེས་ཡོད། ད་ཆ་ནང་ཆོས་ལ་ཚན་རིག་ཐོག་ནས་དོ་སྣང་བྱེད་བཞིན་འདུག རྒྱ་ནག་དམར་པོའི་ལྟ་གྲུབ་དེ་ལོ་ངོ་ཉིས་བརྒྱ་ལྷག་ལ་ཕྱིན་མེད། བོད་མིའི་སྙིང་སྟོབས་ནི་ནང་པ་སངས་རྒྱས་པའི་ཆོས་ལ་རྟེན་ཡོད་པར་བརྟེན་མི་རབས་ནས་མི་རབས་བར་གནས་ཀྱི་རེད། འདས་པའི་ལོ་ངོ་དྲུག་ཅུའི་ནང་རྒྱ་ནག་གཞུང་གིས་བོད་ཀྱི་དངོས་ཡོད་གནས་ཚུལ་བཀག་སྡོམ་བྱས་མ་ཟད། བོད་མིར་དྲག་གནོན་ཤུགས་ཆེ་བྱས་ཡོད། འོན་ཀྱང་འདས་པའི་བོད་མཐོང་མྱོང་མེད་པའི་རྒྱ་ནག་དམར་པོའི་འོག་འཚར་ལོངས་བྱུང་བའི་བོད་པའི་གཞོན་སྐྱེས་རྣམས་སྙིང་སྟོབས་ཞུམ་པ་མེད་པར་གནས་ཡོད། དེ་དག་ནི་དམག་དང་སྟོབས་ཤུགས་ཀྱི་མེད་པ་བཟོ་ཐབས་མེད། རྒྱ་ནག་རྒྱལ་ཁབ་དེ་བཞིན་རྒྱ་ནག་མི་མང་ལ་དབང་ཡོད་པ་ལྟར། ཡུལ་གྲུ་གང་དང་གང་ཞིག་ཡིན་རུང་ཡུལ་གྲུ་དེའི་མི་མང་ལ་དབང་ཡོད་པར་བརྟེན། མང་གཙོ་དང་འདྲ་མཉམ། གཅིག་སྡུད་རིང་ལུགས་ལ་ཁ་གཏད་ཆེད་འབོད་སྒྲ་སྒྲོག་བཞིན་ཡོད། ཅེས་བཀའ་ལན་ཕེབས་ཡོད། ལྷག་པར་༸གོང་ས་མཆོག་གིས་དྲི་བ་གཞན་ཞིག་ལ་བཀའ་ལན་སྩལ་དོན། ངོས་རང་གི་ཡང་སྲིད་དང་དགའ་ལྡན་ཕོ་བྲང་དགོས་མིན་དེ་འབྲེལ་ཡོད་བོད་མི་དང་དེ་མཚུངས་ཀྱི་གནས་སྟངས་ལ་རག་ལས་ཡོད། ཁོང་ཚོས་དུས་ཚོད་དེར་རན་འཚམ་མི་འདུག་ཅེས་བརྗོད་ན་མེད་པ་བཟོ་རྒྱུ་རེད། ཅེས་སོགས་ཀྱི་བཀའ་ལན་སྩལ་ཡོད་པ་བཅས། །
