༢༠༡༢ ཟླ་ ༥ ཚེས་ ༡༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༥ ཚེས་ ༡༨ ཉིན་གྱི་ཕྱེད་ཡོལ་ཆུ་ཚོད་ ༡ པོའི་ཐོག་ཨོ་སི་ཊོ་རི་ཡའི་གྲོང་ཁྱེར་ཀལ་གེན་ཕ་ཌ་(Klagenfurt)མེ་སེ་ཚོགས་ཁང་གཉིས་པའི་ནང་གསར་འགོད་པ་ ༤༠ བརྒལ་བ་ལྷན་འཛོམས་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་མངའ་སྡེའི་བློན་ཆེན་(Drfler)མཆོག་དང་ལྷན་གསར་འགོད་ལྷན་ཚོགས་ཤིག་བསྐྱངས་འདུག
དེ་ཡང་ཐོག་མར་མངའ་སྡེའི་བློན་ཆེན་མཆོག་གིས་ངོ་སྤྲོད་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ང་ཚོའི་ཡུལ་གྲུར་སླར་ཡང་ཆིབས་སྒྱུར་བསྐྱངས་པར་དགའ་སྒོམ་སྐྱེས་དགོས་པའི་རང་བཞིན་ཞིག་ཆགས་ཡོད། གང་ལ་ཞེ་ན། དེ་སྔ་ང་ཚོའི་ཡུལ་འདིའི་ནང་ལས་ཀ་མེད་པའི་མི་མང་པོ་ཡོད། འོན་ཀྱང་ཕྱི་ལོ་ ༢༠༡༢ ནས་བཟུང་ལས་མེད་ཀྱི་གྲངས་ཀ་ཧ་ཅང་ཉུང་དུ་ཕྱིན་ཏེ་དེང་སྐབས་དཔལ་འབྱོར་ཡར་རྒྱས་ཀྱི་ཕྱོགས་སུ་འགྲོ་བཞིན་པའི་སྐལ་བཟང་གི་དུས་སྐབས་འདིར་༸གོང་ས་ཏཱ་ལའི་བླ་མ་མཆོག་ས་གནས་འདིར་ཆིབས་སྒྱུར་བསྐྱངས་པ་ནི་ང་ཚོར་སྐལ་བཟང་གི་གོ་སྐབས་ཐོབ་བྱུང་། དེར་བརྟེན་ངས་ང་ཚོའི་མི་མང་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་། ཞེས་གསུང་བཤད་གནང་ཡོད།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ཚོར་བཀའ་སློབ་སྩལ་དོན། ངོས་རང་དེ་རིང་འདི་གར་མངའ་སྡེའི་བློན་ཆེན་མཆོག་དང་ལྷན་གསར་འགོད་པ་རྣམས་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། གསར་འགོད་པ་ནི་མི་མང་གི་གོ་རྟོགས་གོང་འཕེལ་གཏོང་མཁན་ཡིན་པ་མ་ཟད། ཆབ་སྲིད་པ་དང་ཚན་རིག་པ། ཆོས་པ་གང་ཞིག་ཡིན་རུང་ནོར་འཁྲུལ་གྱི་ལས་ཀ་སུས་བྱས་ཀྱང་ཐེར་འདོན་བྱ་རྒྱུའི་འགན་འཁྲི་ཡོད། དེ་བཞིན་གསར་འགོད་པ་རྣམ་པ་ཧ་ཅང་གནད་འགག་ཆེན་པོ་ཡིན་པར་བརྟེན། གསར་འགོད་པ་རྣམས་ནས་དུས་རྒྱུན་དུ་གླང་པོ་ཆེའི་སྣ་ལྟར་ས་ཕྱོགས་གང་སར་བརྐྱངས་ནས་འཁྱོག་བཤད་སྤངས་ཏེ་གནས་ཚུལ་མཁོ་སྒྲུབ་བྱ་རྒྱུ་ནི་གཡོལ་ཐབས་མེད་པའི་གསར་འགོད་པའི་ལས་འགན་རེད། ཅེས་བཀའ་སློབ་སྩལ་ཡོད། དེ་ནས་བློན་ཆེན་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་དང་༸གོང་ས་མཆོག་གིས་ཨོ་སི་ཊོ་རི་ཡའི་རྒྱལ་དར་བསྣམས་ཏེ་སྐུ་པར་ལྷན་སྒྲོན་རྗེས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། ཁ་སང་ངོས་རང་འདི་གར་འབྱོར་སྐབས་མི་མང་པོ་ཞིག་གིས་བོད་ཀྱི་རྒྱལ་དར་ཁྱེར་ཏེ་དགའ་བསུ་གནང་བྱུང་། སྤྱིར་བཏང་བོད་ཀྱི་རྒྱལ་དར་སྒྲེང་འཛུགས་བྱེད་སྐབས་རྒྱ་ནག་གཞུང་ཕྱོགས་ནས་རྒྱུན་དུ་སྐྱོན་བརྗོད་བྱེད་ཀྱི་ཡོད། འོན་ཀྱང་ཕྱི་ལོ་ ༡༩༥༤ ལོར་ངོས་རང་རྒྱ་ནག་ཏུ་བསྐྱོད་སྐབས་ཉིན་གཅིག་མའོ་ཙེ་ཏུང་གིས་ངོས་ལ་ཁྱེད་རང་ཚོར་རྒྱལ་དར་ཞིག་ཡོད་འདུག་པས་དེ་རེད་དམ་ཞེས་དྲིས་བྱུང་། སྐབས་དེར་ངོས་ཀྱིས་ང་ཚོར་རྒྱལ་དར་ཡོད་ཅེས་བརྗོད་པས། ཁོང་གིས་རྒྱལ་དར་དེ་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་དར་དང་མཉམ་དུ་སྒྲེང་འཛུགས་བྱས་ན་འགྲིག་གི་རེད་ཅེས་བརྗོད་བྱུང་། དེར་བརྟེན་མ་འོངས་པར་རྒྱ་ནག་གཞུང་ཕྱོགས་ནས་བོད་ཀྱི་རྒྱལ་དར་སྒྲེང་འཛུགས་བྱས་ཆོག་གི་མ་རེད་ཅེས་རྙོག་གྲ་བཤད་ན། མའོ་ཀྲུའུ་ཞིས་ཏཱ་ལའི་བླ་མར་བོད་ཀྱི་རྒྱལ་དར་སྒྲེང་འཛུགས་བྱས་ཆོག་པའི་ཆོག་མཆན་སྤྲད་ཡོད། ཅེས་འགྲེལ་བཤད་རྒྱག་དགོས་ཤེས་སོང་ངམ། ཞེས་བཀའ་སློབ་སྩལ་ཡོད་པ་བཅས། །