༢༠༡༢ ཟླ་ ༤ ཚེས་ ༢༤ རེས་གཟའ་མིག་དམར།
༄༅། །ཨོ་སི་ཊོ་ལི་ཡའི་ཡི་ཤུའི་ཆོས་དཔོན་མཆོག་དབུ་བཞུགས་ཐོག་བོད་བསྟན་པ་ཆབ་སྲིད་ཆེད་རང་ལུས་མེར་སྲེག་གཏོང་མཁན་ཚོའི་སླད་སྨོན་ལམ་ཚོགས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གསལ་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༤ ཚེས་ ༢༢ ཉིན་གྱི་སྔ་དྲོ་ཆུ་ཚོད་ ༡༠ ནས་ ༡༡ བར་ཨོ་སི་ཊོ་ལི་ཡའི་གྲོང་ཁྱེར་སི་ཌི་ནི་ཡི་ཤུ་མཆོད་ཁང་གི་ཆོས་དཔོན་ཕྷ་ངྷར་ཝེ་ཀུ་རུ་ལགས་ཀྱིས་བོད་ཕྱི་ནང་གཉིས་སུ་རྒྱ་ནག་གཞུང་གི་གདུག་རྩུབ་ཆེ་བའི་སྲིད་བྱུས་ལ་ངོ་རྒོལ་གྱིས་རང་ལུས་མེར་སྲེག་གཏོང་མཁན་རྣམ་པ་གཙོ་བོར་གྱུར་བའི་བོད་མི་ཆབ་སྲིད་བཙོན་པ་འདས་གསོན་ཡོངས་ཀྱི་ཆེད་རེས་གཟའ་ཉི་མའི་ཉིན་ཡི་ཤུ་ཆོས་ལུགས་ཀྱི་རྒྱུན་སྲོལ་ལྟར་སྨོོན་ལམ་གོ་སྒྲིག་གནང་སྟེ་ཚོགས་ཡོད། སྨོན་ལམ་དེའི་ཐོག་ས་གནས་བོད་མི་དང་ཡི་ཤུ་མི་མང་སོགས་ཁྱོན་མི་གྲངས་ ༡༠༠ བརྒལ་བ་ལྷན་འཛོམས་ཐོག་རོལ་དབྱངས་ཀྱི་ལམ་ནས་སྨོན་ལམ་གསུང་འདོན་གནང་ཡོད། དེ་རྗེས་ཆོས་དཔོན་མཆོག་གིས་གསུང་བཤད་གནང་དོན། དེང་སྐབས་འཛམ་གླིང་འདིའི་ཐོག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་མི་མང་རྣམས་ཀྱི་མྱངས་དང་མྱོང་བཞིན་པའི་སྡུག་བསྔལ་ལ་གཟིགས་དང་། དཀའ་སྡུག་ནང་གནས་པའི་བོད་མི་ཚོར་ངའི་སྟོན་པ་ཡི་ཤུ་གིས་གསུང་དོན་ལ་ཁྱེད་རང་ཚོ་ཁེར་རྐྱང་དུ་གནས་མེད་པས་དཀོན་མཆོག་ཁྱེད་རང་ཚོ་དང་ལྷན་དུ་ཡོད། གལ་སྲིད་མུན་ནག་གི་སྤྱི་ཚོགས་ནང་ལྷུང་ཡོད་ཀྱང་དཀོན་མཆོག་གིས་ཁྱེད་རང་ཚོར་བྱམས་བརྩེ་སྦྱིན་ངེས་ཡིན། ནག་ཕྱོགས་དཔུང་སྟོབས་ཀྱིས་ཁྱེད་རང་ཚོའི་བྱམས་བརྩེ་དང་རེ་བ་ནམ་ཡང་རྩ་མེད་བཟོ་ཐུབ་ཐབས་མེད། འཛམ་གླིང་མི་མང་གིས་རང་དབང་ལོངས་སུ་སྤྱད་དང་སྤྱོད་མུས་ཡིན་པ་ལྟར། ཉིན་ཞིག་བོད་མི་ཚོས་ཀྱང་དེ་ལྟར་ལོངས་སུ་སྤྱོད་ཐུབ་ངེས་ཡིན་ཞེས་གསུངས་ཡོད།
དེ་ནས་བོད་རིགས་མཐུན་ཚོགས་ཀྱི་ཚོགས་གཙོས་གསུང་བཤད་གནང་དོན། ང་ཚོའི་མི་རིགས་ཀྱི་ཉག་ཕྲ་བའི་དུས་སྐབས་འདིར་ཁྱེད་རྣམས་ཀྱི་རྒྱབ་སྐྱོར་འོག་ང་ཚོར་རང་ཉིད་ཁེར་རྐྱང་དུ་ལུས་པའི་ཚོར་སླེབས་ཀྱི་མི་འདུག ཁྱེད་རྣམས་ནས་དེ་རིང་འདིར་སྨོན་ལམ་གོ་སྒྲིག་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་ཡོད་པ་བཅས། །