༢༠༡༢ ཟླ་ ༤ ཚེས་ ༡༡ རེས་གཟའ་ལྷག་པ།
༄༅། །ཨོ་སི་ཊོ་ལི་ཡའི་མེལ་བོན་གྲོང་ཁྱེར་ནང་བོད་མིའི་ལྷན་ཚོགས་ཤིག་ཚོགས་ཏེ་གྲོས་ཆོད་དོན་ཚན་ལྔ་ཅན་ཞིག་བཞག་འདུག དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཨོ་སི་ཊོ་ལི་ཡའི་བོད་རིགས་ཚོགས་པས་གོ་སྒྲིག་འོག་ཕྱི་ལོ་ ༢༠༡༢ ཟླ་ ༤ ཚེས་ ༦ ཉིན་དབུ་འཛུགས་ཀྱིས་ཉིན་གྲངས་གསུམ་རིང་ཁུལ་དེའི་བྱང་ཕྱོགས་ཧི་སི་ཝེལ་ཞེས་པའི་ས་གནས་སུ་ཨོ་སི་ཊོ་ལི་ཡ་དང་ནིའུ་ཛི་ལན་ཌིར་གནས་སྡོད་བོད་མིའི་སྐུ་ཚབ་ཁྱོན་མི་གྲངས་ ༢༥༠ ལྷག་ལྷན་འཛོམས་ཐོག་རྒྱལ་ཡོངས་ཚོགས་ཆེན་ཐེངས་ལྔ་པ་ཚོགས་འདུག
ཚོགས་ཆེན་དེའི་ཐོག་སྐུ་མགྲོན་གཙོ་བོ་ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་གདན་ཞུས་ལྟར་ཆེད་ཕེབས་གནང་ཡོད་པ་མ་ཟད། ཁོང་གིས་བོད་མི་རྣམས་བཙན་བྱོལ་ལ་ཡོང་དགོས་དོན་དང་། ད་ལྟ་ཁུལ་དེར་གནས་སྡོད་བོད་མི་རྣམས་ནས་ཕན་ཚུན་མཐུན་སྒྲིལ་རྡོག་རྩ་ཆིག་སྒྲིལ་བྱས་ཏེ་བོད་ཀྱི་རྩ་དོན་ཆེད་ནུས་པ་མཉམ་སྤུངས་བྱེད་དགོས་པའི་ལམ་སྟོན་གསུང་བཤད་གནང་འདུག
ད་ཐེངས་ཨོ་སི་ཊོ་ལི་ཡ་དང་ནིའུ་ཛི་ལན་ཌིའི་ནང་གནས་སྡོད་བོད་མི་རྣམས་ནས་རྒྱལ་ཡོངས་ཚོགས་ཆེན་ཐེངས་ལྔ་པ་ཚོགས་ནས་བོད་མི་རང་ལུས་མེར་སྲེག་གཏོང་མཁན་གྱི་གནས་སྟངས་ཛ་དྲག་ཆེ་རུ་འགྲོ་བཞིན་ཡོད་པར་བརྟེན། རྒྱལ་སྤྱིའི་སྟེང་དྲིལ་བསྒྲགས་བྱ་རྒྱུ་སྤྱི་དང་། ཡང་སྒོས་བོད་མི་སུ་ཞིག་གིས་མ་འོངས་པར་རྒྱ་མིའི་གཞུང་ཚབ་ཁང་དང་རྒྱ་མིའི་ལོ་གསར། མཛད་སྒོ། དེ་བཞིན་རྒྱ་ནག་གཞུང་གི་སྐུ་ཚབ་མཉམ་ཐུག་རྒྱུའི་གནས་ཚུལ་དེ་རིགས་ལ་མཉམ་ཞུགས་བྱེད་མཁན་བྱུང་ཚེ། ཨོ་སི་ཊོ་ལི་ཡའི་བོད་མིའི་སྐྱིད་སྡུག་ནས་ཕྱིར་ཕུད་བྱ་རྒྱུ་སོགས་ཀྱི་དོན་མཚན་ལྔ་ཅན་གྱི་གྲོས་ཆོད་ཅིག་ཀྱང་བཞག་འདུག་པ་བཅས། །