༢༠༡༢ ཟླ་ ༤ ཚེས་ ༢ རེས་གཟའ་ཟླ་བ།
༄༅།  །འདི་གའི་ཕྱི་དྲིལ་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པ་སྐལ་བཟང་མཁས་གྲུབ་ལགས་ཀྱིས་གུ་རུའི་གནས་མཆོག་མཚོ་པདྨ་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༤ ཚེས་ ༡ ཉིན་གྱི་སྔ་དྲོ་ཆུ་ཚོད་ ༡།༤༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གུ་རུའི་གནས་མཆོག་མཚོ་པདྨར་༸ཞབས་སོར་བདེ་བར་འཁོད་ཡོད།
དེ་ཡང་མཚོ་པདྨར་རྟེན་གཞི་བྱས་པའི་འོག་མིན་འཛི་སྒར་ཨོ་རྒྱན་ཆོས་འཁོར་གླིང་དགོན་དང་ཟངས་མདོག་དཔལ་རིའི་ཕོ་བྲང་བརྟེན་དང་རྟེན་པ་གསར་བཞེངས་ལེགས་གྲུབ་བྱུང་བའི་དབུ་འབྱེད་རབ་གནས་དང་དེ་བཞིན་མི་མང་ལ་འཕགས་པ་སྤྱན་རས་གཟིགས་ཀྱི་བཀའ་དབང་བཀའ་དྲིན་ཆེ་བ་བསྐྱང་ཆེད་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་པ་བཞིན་གོང་ཚེས་ཉིན་མགོན་པོ་གང་ཉིད་མཆོག་བཞུགས་སྒར་ནས་མཚོ་པད་མར་ཕེབས་འགྲོ་བརྒྱུད་ཆིབས་སྒྱུར་བསྐྱངས་སྐབས་མཚོ་པདྨ་ནས་ཀི་ལོ་མི་ཊར་བརྒྱད་ཀྱི་སར་མི་མང་དང་དགོན་སྡེ་ཁག་གི་ཕེབས་བསུའི་རྒྱལ་སྒོ་དང་པོ་དང་། དེ་བཞིན་ཨ་མར་གྷ་རུ་ཞེས་པའི་ས་གནས་སུ་བོད་མི་མང་སྤྱི་འཐུས་ཚོགས་གཙོ་མཆོག་དང་འཐུས་མི་གཞན་གཉིས། ཆོས་རིག་བཀའ་བློན་མཆོག་དང་དྲུང་ཆེ།  འཛི་སྒར་རིན་པོ་ཆེ་མཆོག་དང་རི་མགོ་སྤྲུལ་སྐུ་མཆོག  རྙིང་མའི་དགོན་པ་ཁག་གི་འགོ་འཛིན་དང་དྲུང་ཆེ། མན་ཌི་ས་གནས་འགོ་འཛིན་དང་ས་གནས་གྲོས་ཚོགས་ཀྱི་ཚོགས་གཙོ་སོགས་ཕེབས་བསུར་བཅར་ཡོད། དེ་ནས་ཕེབས་བསུའི་རྒྱལ་སྒོ་ཁག་བརྒྱུད་ཆིབས་སྒྱུར་བསྐྱངས་སྐབས་སེར་སྐྱ་མི་མང་རྣམས་ཀྱིས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་དང་སྦྲགས་ཐོག་མར་མཚོ་པདྨའི་ཉེ་འདབས་སུ་ཆགས་པའི་འབྲི་གུང་བཀའ་བརྒྱུད་དགོན་པ་འོག་མིན་ཐུབ་བསྟན་བཤད་སྒྲུབ་གླིང་དུ་གནས་གཟིགས་མཛད་བསྟུན་དགོན་དེའི་དབོན་སྤྲུལ་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་དཀོན་མཆོག་རྗེས་དྲན་གསུང་མུར་གསོལ་ཇ་དང་འབྲས་སིལ་འདེགས་འབུལ་གྲུབ་རྗེས་བྱང་ཆུབ་སེམས་དཔའི་སྡོམ་པ་འབོགས་ཆོག་མཛད་པ་དང་ཆབས་ཅིག་དགོན་དེར་རབ་གནས་བཀའ་དྲིན་ཆེ་བ་སྩལ་ཏེ་འཛི་སྒར་དགོན་པར་ཆིབས་ཞལ་བསྒྱུར།  དགོན་དེར་༸ཞབས་སོར་འཁོད་སྐབས་འཛི་སྒར་རིན་པོ་ཆེ་མཆོག་དང་མཁན་ཆེན་འཕྲིན་ལས་རྡོ་རྗེ་སོགས་ཀྱིས་གདན་ཞུས་དང་ལྷན་དགོན་དེའི་གྲྭ་དམངས་ཀྱིས་མཆོད་རྫས་སྣ་ཚོགས་ཐོགས་ཏེ་ཕེབས་བསུ་དང་མི་མང་ཁག་གཅིག་གིས་གླུ་དབྱངས་ཀྱི་མཆོད་པ་ཕུལ་ཏེ་འཛི་སྒར་དགོན་པའི་གཟིམ་ཆུང་དུ་གདན་འདྲེན་ཞུས་ཡོད།
ཐེངས་འདིར་༸གོང་ས་མཆོག་གིས་གསར་དུ་བཞེངས་པའི་ལྷ་ཁང་དང་སྐུ་བརྙན་དབུ་འབྱེད་དང་ཆོས་འབྲེལ་བཅས་པར་སྐུ་མགྲོན་དུ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་མཆོག་དང་བདེ་སྲུང་བཀའ་བློན་མཆོག  དེ་བཞིན་བོད་མི་མང་སྤྱི་འཐུས་ཚོགས་གཙོ་མཆོག་དང་ཚོགས་གཞོན་མཆོག གཞན་ཡང་སྤྱི་འཐུས་རྒྱུན་ལས་རྣམས་དང་སྤྱི་འཐུས་གཞན་ཁག་གཅིག  བོད་མིའི་སྒྲིག་འཛུགས་ཀྱི་དྲུང་ཆེ་ཁག་གཅིག  དེ་མིན་དགོན་པའི་སྐུ་མགྲོན་དང་སྦྱིན་བདག་ཁག་གཅིག གྭར་ཞ་དང་སྤྱི་ཏི། ཁུ་ནུ། སྦིར་དང་ཅོན་ཊ་ར་སོགས་ནས་ཆོས་ཞུ་བ་མི་མང་སྟོང་ཚོ་མང་པོ་ཆེེད་བཅར་ཞུས་འདུག་པ་དང། ཕྱི་ཚེས་ ༢ ཉིན་མགོན་པོ་གང་ཉིད་མཆོག་གིས་དེར་འདུས་མི་མང་ལ་སྤྱན་རས་གཟིགས་ཀྱི་བཀའ་དབང་ཆོས་འབྲེལ་དབུ་འཛུགས་མཛད་རྗེས་ཟངས་མདོག་དཔལ་རིའི་ཕོ་བྲང་དབུ་དབྱེ་མཛད་རྒྱུ་ཡིན་འདུག་པ་བཅས།།