༢༠༡༢ ཟླ་ ༤ ཚེས་ ༡༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༤ ཚེས་ ༡༣ རེས་གཟའ་པ་སངས་ཉིན་གྱི་ཕྱི་དྲོ་ཆུ་ཚོད་ ༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མངའ་སྡེ་ཧ་ཝའི་མཚོ་གླིང་གི་ཧོ་ནོ་ལུ་ལུའི་གྲོང་ཁྱེར་དུ་༸ཞབས་སོར་བདེ་བར་འཁོད་ཡོད། དེ་ཡང་ཨ་རིའི་དྲ་རྒྱའི་ཐོག་ཚོང་ལས་གཉེར་མཁན་ཨི་བྷའེ་(eBay) ཚོང་ལས་ཁང་དང༌། ཧ་ཝའི་སྤྱི་ཚོགས་ཐེབས་རྩ་ཁང་གསར་འཛུགས་གནང་མཁན་སྐུ་ཞབས་པི་ཡ་རི་ཨོ་མིཌ་ཡར་(Pierre Omidyar)དང་ཁོང་གི་སྐུ་ཟླ་པམ་ཨོ་མིཌ་ཡར་བཅས་ནས་གདན་ཞུའི་གསོལ་འདེབས་ཞུས་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་མངའ་སྡེ་དེའི་རྒྱལ་ས་ཧོ་ནོ་ལུ་ལུའི་གནམ་ཐང་དུ་༸ཞབས་སོར་འཁོད་སྐབས་མངའ་སྡེའི་སྲིད་སྐྱོང་ནིལ་ཨ་བར་ཁོམ་བེ་ (Neil Abercrombie) མཆོག་དང་ཁོང་གི་སྐུ་ཟླ། དེ་བཞིན་གྲོང་སྡེའི་སྤྱི་ཁྱབ་པ་པི་ཊར་ བྷི་ (Peter B Carlisle) མཆོག ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས། ཆིབས་སྒྱུར་གདན་ཞུ་བ་སོགས་གནད་ཡོད་ཀྱི་མི་སྣ་མང་པོ་ཞིག་གནམ་ཐང་དུ་བཅར་ཏེ་ཕེབས་བསུ་གཟབ་རྒྱས་ཞུས་ཡོད།
དེ་ནས་ཕེབས་འགྲོའི་ཐོག་བཞུགས་གནས་མགྲོན་ཁང་དུ་ཆིབས་སྒྱུར་གྱི་༸ཞབས་སོར་འཁོད་སྐབས་ཧ་ཝའི་མཚོ་གླིང་ཁག་དྲུག་དང་དེ་མིན་ས་གནས་ཁག་གི་མི་མང་། ཁུལ་དེར་རྟེན་གཞི་བྱས་པའི་ནང་པའི་ཆོས་ཚོགས་ཁག་གི་བླ་མ་དང་དགེ་འདུན་པ། ཁུལ་དེར་གནས་སྡོད་བོད་མི་དང་བལ་པོ། འབྲུག་པ། རྒྱ་གར་བ་སོགས་མི་མང་མང་དག་ཅིག་གིས་ཕེབས་བསུ་གཟབ་རྒྱས་ཞུས་ཡོད། སྐབས་དེར་བཞུགས་གནས་མགྲོན་ཁང་དུ་ཆིབས་སྒྱུར་གོ་སྒྲིག་ཚོགས་ཆུང་ནས་གོ་སྒྲིག་ཞུས་པའི་ཕེབས་བསུའི་མཛད་སྒོར་དབུ་བཞུགས་མཛད་སྐབས་ཁུལ་དེའི་སློབ་གྲྭ་ཁག་ནས་འདེམས་སྒྲུག་བྱས་པའི་སློབ་ཕྲུག་ཁག་གཅིག་གིས་༸གོང་ས་མཆོག་ལ་འཚམས་འདྲིའི་ཆེད་དུ་ཧ་ཝའི་མི་རིགས་ཀྱི་སྲོལ་རྒྱུན་གླུ་དབྱངས་ཁག་གཅིག་འཁྲབ་སྟོན་གྱི་ལམ་ནས་གཟིགས་འབུལ་ཞུས་ཡོད།
རྒྱལ་པོའི་སྲས་མོའི་གདུང་བརྒྱུད་ལྕམ་སྐུ་ཨ་བྷི་གེལ་མཆོག་དང་ལྷན།
སྐབས་དེར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་སློབ་ཕྲུག་རྣམས་ལ་ཐུགས་རྗེ་ཆེ་ཞེས་བཀའ་སློབ་སྩལ་ཡོད་མ་ཟད། ཧ་ཝའི་ཁུལ་གྱི་སྤྱི་ཚོགས་གནས་སྟངས་དང་ལུགས་སྲོལ་འདི་རྣམས་ང་ཚོ་བོད་མི་རིགས་ཀྱི་རིག་གཞུང་དང་ཧ་ཅང་མཐུན་པོ་འདུག རྩ་བའི་མི་རིགས་ཀྱི་རིན་ཐང་དེ་གལ་ཆེན་པོ་ཡིན། ཕན་ཚུན་མཛའ་བརྩེའི་ཐོག་ནས་མཐུན་ལམ་ཡག་པོ་ཡོང་བ་བྱ་རྒྱུ་དང་། ཁྱིམ་ཚང་སྤྱི་དང་མི་མང་ཕན་ཚུན་བར་བདེ་སྐྱིད་ཡོང་བ་བྱ་རྒྱུ་གལ་ཆེན་པོ་ཡིན། ངོས་རང་ད་རེས་སླར་ཡང་ཧ་ཝའི་ས་ཁུལ་འདིར་ཡོང་རྒྱུ་བྱུང་བར་དགའ་ཚོར་ཆེན་པོ་བྱུང་། ཞེས་བཀའ་སློབ་ཕེབས་ཡོད།
ཐེངས་འདིར་༸གོང་ས་མཆོག་ཁུལ་དེར་གདན་འདྲེན་ཞུས་ཐུབ་པ་དེ་ནི་ཚོགས་པ་དེའི་ཞི་བདེའི་ཀ་བ་ཞེས་པའི་ལས་གཞིའི་ཐོག་འཛམ་གླིང་སྟེང་གི་དབུ་ཁྲིད་ཧ་ཝའི་མཚོ་གླིང་དེར་གདན་ཞུས་དང་སྦྲགས་མང་ཚོགས་ཀྱི་ཉིན་རེའི་འཚོ་བ་དང་དེ་ནས་ཁྱིམ་ཚང་དང་འཛམ་གླིང་རིམ་པའི་ཐོག་ཞི་བདེ་གོང་འཕེལ་ཡོང་ཐབས་ཀྱི་ལས་གཞི་ཐོག་མ་དེ་ཆགས་ཡོད་འདུག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༡༩༨༠ ལོར་ཁུལ་དེར་ཐོག་མར་༸ཞབས་སོར་འཁོད་ཡོད་པ་དང་། དེ་རྗེས་ཕྱི་ལོ་ ༡༩༩༤ དང་ ༢༠༠༧ སོ་སོར་ཆིབས་སྒྱུར་བསྐྱངས་ཡོད་པ་མ་ཟད། ཐེངས་འདི་ནི་ཆིབས་སྒྱུར་བསྐྱངས་ཐེངས་བཞི་པ་དེ་ཆགས་ཡོད།།
