༢༠༡༢ ཟླ་ ༤ ཚེས་ ༢༤ རེས་གཟའ་མིག་དམར།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་ཕྱི་ལོ་ ༢༠༡༢ ཟླ ༤ ཚེས་ ༢༤ ཉིན་བཏང་གནས་ནང་འཁོད་དོན། སྔ་ལོའི་ལོ་མཇུག་ཏུ་ཐེངས་དང་པོར་ཐེ་ཝན་ནང་བོད་བརྒྱུད་ནང་བསྟན་ཆོས་ཚོགས་ཁག་གི་བླ་སྤྲུལ་དགེ་འདུན་རྣམ་པའི་བགྲོ་གླེང་ཚོགས་འདུ་ཐེངས་དང་པོའི་ཐོག་གྲོས་འཆམ་བྱུང་བ་ལྟར། ཕྱི་ཚེས་ ༢༣ ཉིན་ཐེ་ཝན་བོད་ཀྱི་སྐུ་ཚབ་དོན་ཁང་གི་མཆོད་ཁང་དུ་སྔ་དྲོ་ཆུ་ཚོད་ ༡༠ ནས་ཕྱི་དྲོ་ཆུ་ཚོད་ ༥ བར་བགྲོ་གླེང་ཚོགས་འདུ་ཐེངས་གཉིས་པ་བསྐོང་ཚོགས་གནང་ཡོད། དེ་ཡང་ཐོག་མར་ཐེ་ཝན་སྐུ་ཚབ་དོན་གཅོད་ཀྱིས་གསལ་བསྒྲགས་སྔོན་སོང་ནང་གསལ། ༡༽བོད་བརྒྱུད་ནང་ཆོས་ཐེ་ཝན་ནང་ཁྱབ་སྤེལ་གནང་ཕྱོགས། ཆོས་བརྒྱུད་ཁག་ནང་ཁུལ་མཐུན་སྒྲིལ་ཡོང་ཐབས་སྐོར། ༢༽དོན་གཅོད་ལས་ཁུངས་དང་ཆོས་ཚོགས་ཁག་དབར་འབྲེལ་མཐུད་གང་ཟབ་གཏོང་ཐབས་སྐོར། ༣༽ཐེ་ཝན་ནང་བོད་ཀྱི་ནང་ཆོས་ལ་སྐྱོན་འཛུགས་བྱེད་མཁན་དབར་ཁྲིམས་གཏུག་སྐོར་གྱི་གནས་སྟངས་ངོ་སྤྲོད། གཞན་ཡང་ཚོགས་བཅར་བ་རྣམས་ནས་དགོངས་འཆར་ཇི་ཡོད་ལ་བགྲོ་གླེང་གནང་རྒྱུ། ཞེས་པའི་བརྗོད་གཞིའི་ཐོག་བགྲོ་གླེང་གནང་རྒྱུའི་གསལ་བཤད་གནང་། བགྲོ་གླེང་ཚོགས་འདུའི་ཐོག་བོད་ཀྱི་ཆོས་བརྒྱུད་ཁག་བཞིའི་ཆོས་ཚོགས་ཁག་གི་བླ་སྤྲུལ་དགེ་འདུན་རྣམ་པ་དང་། ཐེ་ཝན་དུ་གནས་སྡོད་བོད་རིགས་ཚོགས་པའི་ཚོགས་གཙོ་སོགས་མི་གྲངས་ཉི་ཤུ་ཙམ་མཉམ་འཛོམས་ཐོག་ཚང་མས་སྤྱི་སྨན་དགོངས་འཆར་ལྷུག་པོ་གནང་ཞིང་། ཐེངས་འདིའི་བགྲོ་གླེང་ཚོགས་འདུར་མང་མོས་ཐག་གཅོད་བྱུང་བའི་དོན་ཚན་གཅིག་ནི། བོད་ཀྱི་ཆོས་བརྒྱུད་རིས་མེད་ཀྱི་ནང་པའི་ལྟ་གྲུབ་ཐེ་ཝན་ནང་ཁྱབ་སྤེལ་ཆེད་དྲ་རྒྱའི་བརྙན་འཕྲིན་ཞིག་གསར་འཛུགས་བྱ་རྒྱུ་དང་། ལས་གཞི་འགོ་འཛུགས་ཀྱི་གྲ་སྒྲིག་ཚོགས་ཆུང་ཞིག་བཙུགས་གནང་བ་མ་ཟད་། ཚོགས་ཆུང་གི་ཚོགས་གཙོ་དང་ཚོགས་མི་སོགས་འདེམས་ཐོན་བྱུང་བ་ལྟར་ལས་བགོས་བྱས་ཏེ་རིམ་བཞིན་ལས་དོན་འགོ་འཛུགས་གནང་རྒྱུ་ཡིན་འདུག་པ་བཅས།།