༢༠༡༢ ཟླ་ ༤ ཚེས་ ༡༡ རེས་གཟའ་ལྷག་པ།
༄༅། །འདི་གར་ཐེ་ཝན་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༢ ཟླ་ ༤ ཚེས་ ༡༡ ཉིན་བཏང་གནས་ནང་འཁོད་དོན། ཐེ་ཝན་དབུས་གྲོང་ཁྱེར་ཐེ་ཀྲུང་ཁུལ་དུ་ཆགས་པའི་ཏུང་ཧའེ་གཙུག་ལག་སློབ་གྲྭ་ཆེན་མོའི་སྤྱི་ཚོགས་རིག་པ་ཚན་ཁག་ནས་གདན་ཞུ་གནང་དོན་བཞིན་ཕྱི་ཟླ་ ༤ ཚེས་ ༡༠ ཉིན་དོན་གཅོད་ལས་ཁུངས་ཀྱི་དྲུང་ཆེ་བསོད་ནམས་རྡོ་རྗེ་ལགས་ཀྱིས་སློབ་ཕྲུག་མི་གྲངས་དགུ་བཅུ་སྐོར་ཞིག་ལ་ཆུ་ཚོད་གསུམ་ཙམ་རིང་བོད་ཕྱི་ནང་གཉིས་ཀྱི་བོད་མིའི་གནས་སྟངས་སྐོར་ངོ་སྤྲོད་གནང་ཡོད། སློབ་ཕྲུག་དེ་དག་གི་ཁྲོད་རྒྱ་ནག་སྐམ་ས་ནས་སློབ་སྦྱོང་བྱེད་པར་སླེབས་པའི་སློབ་མ་རེ་ཟུང་ཡང་ཡོད་འདུག་ལ་ཐོག་མར་བོད་ནང་གི་བོད་མིའི་གནས་སྟངས་སྐོར་ངོ་སྤྲོད་གནང་སྐབས། རང་ཉིད་བོད་ནང་སློབ་སྦྱོང་བྱེད་རིང་སློབ་གྲྭ་གཅིག་ནང་བོད་རྒྱའི་སློབ་ཕྲུག་དབར་ཐོབ་ཐང་འདྲ་མཉམ་མེད་པ་དང་། བོད་ནང་གཞི་རྒྱ་ཆེ་བའི་ཕྱིའི་རྣམ་པ་མཛེས་པའི་འཛུགས་སྐྲུན་མང་པོ་ཞིག་བྱེད་ཀྱི་ཡོད་ཀྱང་། འཛུགས་སྐྲུན་དེ་དག་གིས་བོད་མིའི་རྒྱུན་གཏན་གྱི་འཚོ་བར་ཕན་ཐོགས་གང་ཡང་ཡོང་གི་མེད་པའི་སྐོར་དངོས་མཐོང་མྱོང་ཚོར་དཔེ་མཚོན་དང་སྦྲགས་ནས་འགྲེལ་བཤད་གནང་བ་མ་ཟད། བོད་ནང་གི་བོད་མི་ཚོས་རང་སྲོག་ཚུན་ཆད་བློས་བཏང་ནས་རྒྱ་ནག་གཞུང་ལ་ངོ་རྒོལ་བྱས་དང་བྱེད་མུས་ཡིན་པའི་རྒྱུ་མཚན་སོགས་དངོས་དོན་འགྲེལ་བཤད་གནང་རྗེས། ཕྱི་དྲིལ་ལས་ཁུངས་ནས་ཕྱོགས་སྒྲིག་གནང་བའི་དུས་ཡུན་སྐར་མ་ལྔ་ཙམ་ཡོད་པའི་བོད་ནང་གི་བོད་མིའི་གནས་སྟངས་ཀྱི་བརྙན་འཕྲིན་སློབ་མ་རྣམས་ལ་བསྟན་ཡོད། དེ་རྗེས་བཙན་བྱོལ་བོད་མིའི་མང་གཙོའི་འཕེལ་རིམ་དང་། བོད་མིའི་སྒྲིག་འཛུགས། བོད་ཀྱི་གནད་དོན་ཐག་གཅོད་བྱེད་པའི་དབུ་མའི་ལམ་སོགས་ངོ་སྤྲོད་གནང་ཡོད། མཐར་སློབ་ཕྲུག་རྣམས་ཀྱིས་བོད་ཕྱི་ནང་གཉིས་ཀྱི་བོད་མིའི་སྐོར་གྱི་དྲི་བར་ལན་འདེབས་གྲུབ་བསྟུན་དོན་གཅོད་ལས་ཁུངས་ནས་ཕྱོགས་སྒྲིག་གནང་བའི་བོད་མིའི་ངོ་སྤྲོད་དེབ་ཆུང་རེ་སློབ་མ་རྣམས་ལ་འགྲེམས་སྤེལ་གནང་ཡོད་པ་བཅས།