༢༠༡༢ ཟླ་ ༤ ཚེས་ ༧ རེས་གཟའ་སྤེན་པ།
༄༅། །འདི་གར་ཁམས་བྲག་མགོའི་དགེ་འདུན་པ་དཔལ་ལྡན་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་  ༡ ཚེས་  ༢༣ ཉིན་བྲག་མགོ་མི་མང་གིས་ཡར་ལངས་ཞི་རྒོལ་བྱས་པ་ནས་བཟུང་ད་ལྟའི་བར་རྒྱ་གཞུང་གིས་དམ་བསྒྲགས་ཧ་ཅང་ཤུགས་ཆེ་བྱས་དང་བྱེད་མུས་ཡིན་འདུག
དགོན་སྡེ་ཁག་གི་དགེ་འདུན་པ་བཞི་རེ་ལ་ལས་བྱེད་མི་སྣ་གཅིག་རེ་ལྟ་སྲུང་བྱེད་མཁན་བཞག་སྟེ་དགེ་འདུན་པ་རྣམས་ཕྱོགས་ཐོན་བྱེད་དགོས་བྱུང་ན། འགྲོ་སའི་གནས་དང་ལས་དོན་ཅི་ཡིན་སོགས་གནས་ཚུལ་ཁ་གསལ་འགྲེལ་བརྗོད་བྱས་ཏེ་ཆོག་མཆན་ཞུ་དགོས་ཀྱི་ཡོད་འདུག དེ་བཞིན་ཕྱི་ལོ་ ༢༠༡༢ ཟླ་ ༤ ཚེས་ ༢ ཉིན་བྲག་མགོ་དགོན་པའི་ཕྱག་མཛོད་རྒན་པ་དགེ་བཤེས་བསྟན་འཛིན་དཔལ་བཟང་ལགས་བྲག་མགོ་རྫོང་གི་ཉེན་རྟོག་པར་ཐེ་གཏོགས་གང་ཡང་མེད་པར་གོང་རིམ་ཞིང་ཆེན་དང་ཁུལ་ནས་ཆེད་མངགས་དམག་མི་དང་ཉེན་རྟོག་པ་བཏང་སྟེ་ད་ལོ་བྲག་མགོར་བྱུང་བའི་ཞི་རྒོལ་དོན་རྐྱེན་གྱི་གོ་སྒྲིག་བྱེད་མཁན་གཙོ་བོ་ཡིན་པའི་ཉེས་མིང་འོག་དགོན་པ་ནས་འཛིན་བཟུང་བྱས་ཏེ་ད་ལྟ་གར་སོང་ཆ་མེད་དུ་གྱུར་འདུག ཉིན་དེར་བྲག་མགོར་སྔར་ཡོད་དམག་མིའི་ཐོག་སླར་ཡང་དམག་མི་ཁ་སྣོན་གྱིས་དམ་བསྒྲགས་ཆེ་རུ་བཏང་ཡོད་པ་མ་ཟད། སྲང་ལམ་གཡས་གཡོན་ཚང་མར་དམག་གིས་ཁེངས་ཡོད་འདུག སྤྱིར་ཞི་རྒོལ་བྱས་པ་ནས་བཟུང་རོང་འབྲོག་དབྱེར་མེད་ཀྱིས་ཤང་སོ་སོར་སློབ་གསོ་རུ་ཁག་ཟེར་བ་བཙུགས་ནས་ཤང་རེ་རེ་ལ་ཡང་མ་མཐར་མི་མང་བརྒྱ་ཕྲག་མང་པོ་དོན་མེད་འཛིན་བཟུང་གིས་གང་བྱུང་ཉེས་རྡུང་གཏོང་བ་དང་དེ་སྔོན་ཞི་རྒོལ་ཁྲོད་འདས་གྲོངས་སུ་གྱུར་པའི་ཕུང་པོ་ལ་དར་ཁ་བཏང་མིན་དང་། རྨས་སྐྱོན་ཕོག་པ་རྣམས་ལ་རྨས་སྐྱོན་ཇི་ཙམ་ཕོག་མིན་གྱི་དྲི་བ་བཏང་ཡོད་མེད་སོགས་ཀྱི་འདྲི་རྩད་ནན་པོ་བྱེད་པ། དེ་བཞིན་དོན་མེད་ལས་ཀ་སྤྲད་དེ་བཀག་ཉར་བྱས་དང་བྱེད་མུས་ཡིན་འདུག འགའ་ཤས་ལ་ཉེས་རྡུང་བཏང་སྟེ་ཉིན་ཤས་ཀྱི་རྗེས་ལ་གློད་བཀྲོལ་བཏང་ནའང་ཉེས་ཆད་རྒྱ་སྒོར་གཅིག་སྟོང་ལྔ་བརྒྱ་ནས་སུམ་སྟོང་བར་བཏང་འདུག ད་དུང་ཟླ་རེར་ཉེན་རྟོག་ལས་ཁུངས་སོགས་ལས་ཁུངས་ཁག་གསུམ་ལ་ས་རྟགས་རྒྱག་པར་འགྲོ་དགོས་ཡོད་འདུག ཡུལ་མི་རྣམས་རྫོང་དང་ཤང་ཐོག་ཏུ་རང་གར་སོང་ན་ཡང་ཉེན་རྟོག་པས་འཛིན་བཟུང་བཀག་ཉར་དང་། རྡུང་རྡེག་གཏོང་གི་ཡོད་སྟབས་བོད་མི་ཚོས་རྒྱུན་དུ་སྤྱོད་བཞིན་པའི་ཇ་ཚྭ་ཡང་ཉོ་སར་འགྲོ་མི་ཕོད་པར་ཉིན་གྲངས་ཉི་ཤུ་ལྷག་ཆུ་ཁོལ་ཁོ་ན་བཏུངས་ནས་སྡོད་དགོས་བྱུང་བ་དང་རྩམ་པ་སོགས་ཟ་བཅའི་རིགས་ཆད་དེ་དཀའ་ངལ་ཧ་ཅང་འཕྲད་བཞིན་འདུག་པ་བཅས། །