༢༠༡༢ ཟླ་ ༤ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༦ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབྱིན་ཡུལ་མན་ཅེ་སི་ཊར་གཞོན་སྐྱེས་ཚོར་ལམ་སྟོན་བཀའ་སློབ་སྩལ་རྒྱུ་ཡིན་འདུག
དེ་ཡང་བྱང་ཡུ་རོབ་སྐུ་ཚབ་དོན་གཅོད་ཐུབ་བསྟན་བསམ་གྲུབ་ལགས་ཀྱིས་གསར་འགྱུར་བརྒྱུད་ལམ་ཁག་ནང་འགྲེལ་བརྗོད་གནང་དོན། མ་འོངས་པའི་འཛམ་གླིང་འདི་ཇི་འདྲ་ཞིག་ཏུ་འགྱུར་མིན་ད་ལྟའི་གཞོན་ནུ་རྣམས་ཀྱི་ལག་ཏུ་ཡོད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཟིགས་ཀྱི་ཡོད། གཞོན་ནུ་ཚོའི་ངོས་ནས་ཀྱང་མ་འོངས་པའི་འཛམ་གླིང་འདི་ཞི་བདེར་གནས་ཤིང་བདེ་སྐྱིད་ཕུན་སུམ་ཚོགས་པ་ཞིག་དགོས་པ་ཤེས་ཏེ་དེ་ལྟར་ཡོང་བ་བྱ་རྒྱུའི་ཆེད་དུ་འཛམ་གླིང་འདི་བཞིན་ད་ལྟ་ནས་འགྱུར་བ་གཏོང་ཐུབ་པ་བྱེད་དགོས། ད་ལྟའི་ན་གཞོན་ཚོས་སོ་སོའི་ཕ་མའི་མི་རབས་ཚོར་རེ་བ་བཅོལ་ནས་བསྡད་ན་འགྲིག་ཐབས་མེད་པ་ཡང་མགོན་པོ་གང་ཉིད་མཆོག་གིས་གཟིགས་ཀྱི་ཡོད། དེ་བཞིན་གྲོང་ཁྱེར་མན་ཅེ་སི་ཊར་ནང་གི་འགལ་རྐྱེན་དང་བྱུས་ཉེས་ཕོག་ཅིང་རེ་བས་ཕོངས་པའི་གཞོན་ནུ་རྣམས་ལ་༸གོང་ས་མཆོག་གིས་དམིགས་སུ་བཀར་ནས་ཐུགས་བརྩེ་བ་ཆེན་པོས་གཟིགས་བཞིན་ཡོད་པར་བརྟེན། ད་ཐེངས་དབྱིན་ཡུལ་གྱི་གཞོན་ནུ་རྣམས་ལ་མ་ནོར་ལམ་སྟོན་གྱི་བཀའ་སློབ་སྩལ་གཏན་འཁེལ་ཡོད་ཅེས་འགྲེལ་བརྗོད་གནང་འདུག་པ་བཅས། །