༢༠༡༢ ཟླ་ ༣ ཚེས་ ༡༩ རེས་གཟའ་ཟླ་བ།
༄༅། །འདི་གར་ཨ་རིའི་སྐུ་ཚབ་དོན་གཅོད་ཁང་ནས་ ༢༠༡༢ ཟླ་ ༣ ཚེས་ ༡༨ ཉིན་བཏང་གནས་ནང་འཁོད་དོན། ཨ་རིའི་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང༌། དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ཕྱི་ལོ་ ༢༠༡༢ ཟླ་ ༣ ཚེས་ ༡༥ ཉིན་ཨ་རིའི་རྒྱལ་ས་ཝ་ཤིང་ཊོན་ཉེ་འདབས་ཝི་ཇི་ནི་ཡ་མངའ་སྡེའི་ནང་ཡོད་པའི་( Williamsburg) སློབ་གྲྭ་ཆེན་མོར་ཆེད་ཕེབས་ཀྱིས་རྒྱ་རིགས་དང་ཕྱི་རྒྱལ་སློབ་མ་ ༡༥༠ ཙམ་ལ་བོད་དོན་སྐོར་གསུང་བཤད་གནང་ཡོད།
དེ་ཡང་ཐོག་མར་སློབ་ཕྲུག་ཚོགས་པའི་རིག་གཞུང་འགན་འཛིན་གྱིས་སྐུ་ཚབ་དོན་གཅོད་དེར་འདུས་སློབ་ཕྲུག་སོགས་ལ་ངོ་སྤྲོད་སྙིང་བསྡུས་གནང༌། དེ་ནས་སྐུ་ཚབ་དོན་གཅོད་ཀྱིས་གསུང་བཤད་ཀྱི་བརྗོད་གཞི་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱལ་སྤྱིའི་ཐོག་གི་ཐུགས་འགན་གཙོ་བོ་ག་རེ་ཡིན་པའི་སྐོར་གསུང་བཤད་གནང་སྐབས། ༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་བཟང་པོའི་ཡོན་ཏན་གོང་སྤེལ་གཏོང་གནང་མཛད་རྒྱུ་དང༌། ཆོས་ལུགས་ནང་ཁུལ་འཆམ་མཐུན་ཡོང་ཐབས། འགྲོ་བ་མིའི་རིགས་སྤྱི་ལ་འཁྲི་བའི་འགན་འཁུར་གྱི་འདུ་ཤེས་གོང་སྤེལ། འཛམ་གླིང་སྤྱིའི་ཁོར་ཡུག་སྲུང་སྐྱོབ། མང་གཙོ་དང་ཁྲིམས་ལུགས་དབང་འཛིན་བཅས་ཀྱི་ཐོག་ལ་རླབས་ཆེན་གྱི་མཛད་འཕྲིན་རྒྱ་ཆེ་བསྐྱངས་དང༌སྐྱོང་བཞིན་ཡོད་པ་ནི་མགོན་པོ་གང་ཉིད་མཆོག་གི་ཐུགས་འགན་གཙོ་བོ་ཡིན་སྐོར་དང༌། དེ་བཞིན་བོད་མིའི་ཆབ་སྲིད་དགོས་འདུན་དབུ་མའི་ལམ་གྱི་བྱུང་རབས་སྐོར་དེང་དུས་གློག་ཀླད་དྲྭ་གནས་ཀྱི་ཐོག་ནས་འགྲེལ་བརྗོད་དང༌ངོ་སྤྲོད་ཞིབ་ཕྲ་གནང་ཡོད།
ཐེངས་འདིའི་ལས་རིམ་དེ་ནི་གོང་ཞུས་སློབ་གྲྭ་ཆེན་མོའི་རྒྱ་རིགས་སློབ་ཕྲུག་ཚོགས་པའི་ཚོགས་གཙོ་དང་དོན་ཁང་དབར་སྔ་ལོ་འབྲེལ་བ་བྱུང་བ་ཉར་འཇོག་གིས་མུ་མཐུད་མཇུག་སྐྱོང་བྱས་པའི་ལས་རིམ་ཞིག་ཡིན་ཞིང༌། གོ་སྒྲིག་ཞུ་མཁན་གཙོ་བོ་ནི་སློབ་གྲྭ་དེའི་རྒྱ་རིགས་སློབ་ཕྲུག་ཚོགས་པས་གོ་སྒྲིག་ཞུས་པ་ཞིག་རེད།
སྐུ་ཚབ་དོན་གཅོད་ཀྱི་དུས་ཡུན་སྐར་མ་བཞི་བཅུའི་གསུང་བཤད་གནང་བར་རྒྱ་རིགས་སློབ་མ་དང༌། ཕྱི་རྒྱལ་སློབ་མ་གཙོ་བོར་གྱུར་བའི་ཁྱོན་མི་གྲངས་ ༡༥༠ ཙམ་ཕེབས་ཡོད་པ་མ་ཟད། གསུང་བཤད་གྲུབ་རྗེས་སློབ་མ་ཚོས་དོ་སྣང་ཆེན་པོའི་སྒོ་ནས་བོད་སྐོར་ལ་དྲི་བ་སྣ་ཚོགས་བཏོན་པར་སྐུ་ཚབ་དོན་གཅོད་ཀྱིས་ལན་འདེབས་དང༌གསལ་བཤད་གནང་ཡོད།
དེ་ནས་ལས་རིམ་མཇུག་བསྒྲིལ་རྗེས་སྐུ་ཚབ་དོན་གཅོད་དང༌། རྒྱ་རིགས་འབྲེལ་མཐུད་པས་སློབ་མ་ཚོ་དང་ཕན་ཚུན་ངོ་སྤྲོད་དང༌། གནས་ཚུལ་སྤེལ་རེས་གནང་བ་མ་ཟད། དབུ་མའི་ལམ་གྱི་སྲིད་བྱུས་ཀྱི་བྱུང་རབས་སྐོར་རྒྱ་ཡིག་གི་དེབ་ཆུང་དང༌། བརྙན་འཕྲིན་འོད་སྡེར་འགྲེམས་སྤེལ་ཞུས་ཡོད།
མཇུག་ཏུ་རྒྱ་རིགས་སློབ་ཕྲུག་ཚོགས་པའི་ཚོགས་གཙོས་དེ་རིང་སྐུ་ཚབ་དོན་གཅོད་མཆོག་དང༌། རྒྱ་རིགས་འབྲེལ་མཐུད་པ་གཉིས་ཆེད་ཕེབས་ཀྱིས་གསུང་བཤད་དང༌། དྲི་བ་དྲིས་ལན་གནང་བ་འདིས་རྒྱ་རིགས་སློབ་ཕྲུག་ཚོས་༸གོང་ས་ཏཱ་ལའི་བླ་མ་མཆོག་གི་མཛད་འཕྲིན་ཤེས་རྟོགས་དང༌། བོད་ཀྱི་གནས་ཚུལ་ཤེས་རྟོགས་བྱེད་རྒྱུར་ཕན་ཐོགས་ངེས་ཅན་ཞིག་ཡོང་ཐུབ་ཀྱི་རེད་བསམ་པའི་ཡིད་ཆེས་ཡོད་ཅེས་གསུངས།
ཕྱི་ཚེས་ ༡༦ ཉིན་གྱི་སྔ་དྲོ་སྐུ་ཚབ་དོན་གཅོད་ཀྱིས་ཝ་ཤིང་ཊོན་དུ་སྐོང་ཚོགས་གནང་བའི་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཞིག་ལ་ཕེབས་ནས་བོད་སྐོར་གསུང་བཤད་གནང་ཡོད་པ་དང༌། རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ལགས་ཀྱིས་ཝ་ཤིང་ཊོན་དུ་ཡོད་པའི་རྒྱ་རིགས་མཁས་པ་ཁག་གཅིག་ཐུག་འཕྲད་ཀྱི་ཕན་ཚུན་བཀའ་མོལ་གནང་ཡོད། གོང་འཁོད་ཀྱི་བརྗོད་གཞི་དེ་ནི་སློབ་གྲྭ་དེའི་རྒྱ་རིགས་སློབ་མ་ཚོས་རེ་འདུན་བྱས་པ་ཞིག་ཡིན་འདུག་པ་བཅས། །