༢༠༡༢ ཟླ་ ༣ ཚེས་ ༣ རེས་གཟའ་སྤེན་པ།
༄༅། །འདི་གར་ཕྱི་ལོ་ ༢༠༡༢ ཟླ་ ༣ ཚེས་ ༣ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། རྒྱ་གར་དུ་གནས་མཇལ་དང་དུས་འཁོར་དབང་ཆེན་ཞུས་ཏེ་རང་ཡུལ་བོད་དུ་ཕྱིར་ལོག་བྱེད་མཁན་རྣམས་ལ་རྒྱ་ནག་གཞུང་གི་འབྲེལ་ཡོད་ཚན་པས་མགྲོན་ཁང་དང༌།  སློབ་གྲྭ་སོགས་ས་གནས་འདྲ་མིན་དུ་བཀག་ཉར་གྱིས་ཆབ་སྲིད་ཀྱི་སློབ་སྦྱོང་སྤྲོད་མུས་ཡིན་པ་ལྟར། ཉེ་དུས་ཨ་མདོ་བསང་ཆུ་རྫོང་ཁོངས་དང༌མཚོ་བྱང་ཚ་འདམ་ཆེ་བ་ས་ཁུལ་གཞུང་འབྲེལ་ཐོག་ཞིབ་བཤེར་ནན་པོ་བྱ་རྒྱུའི་ཚོགས་ཆུང་བཙུགས་ཡོད་པའི་གནས་ཚུལ་ཐོན་འདུག
དེ་ཡང་ཕྱི་ལོ་ ༢༠༡༢ ཟླ་ ༣ ཚེས་ ༣ ཉིན་བསང་ཆུ་རྫོང་གཞུང་འབྲེལ་དྲ་ཚིགས་ཐོག་གནས་ཚུལ་སྤེལ་བར་གཞིག་ན། ཟླ་ ༣ ཚེས་ ༢ ཉིན་སྲིད་ཁྲིམས་ཨུ་ཡོན་ལྷན་ཁང་གི་ཚོགས་འདུ་ཚོགས་ཏེ་བསང་ཆུ་རྫོང་ནས་དུས་འཁོར་དབང་ཆེན་ལ་ཞུགས་ཏེ་ཕྱིར་ལོག་བྱེད་མཁན་རྣམས་ལ་ཆེད་དམིགས་བརྟག་དཔྱད་དོ་དམ་གྱི་ལས་དོན་སྤེལ་རྒྱུའི་གཏན་འབེབས་བྱས་ཡོད་འདུག
དེ་བཞིན་མཚོ་བྱང་ཁུལ་ཚ་འདམ་ཆེ་བ་ཁུལ་གྱི་མི་དམངས་སྲིད་གཞུང་གི་དྲ་རྒྱའི་ཐོག་བཀོད་པའི་ཕྱི་ལོ་ ༢༠༡༢ ལོའི་ཡིག་ཆ་ཨང་གཉིས་པ་ལྟར་ན།  ས་ཁུལ་དེར་དུས་འཁོར་དབང་ཆེན་ལ་ཞུགས་ནས་ཕྱིར་ལོག་བྱེད་མཁན་གྱི་མི་སྣར་ཞིབ་བཤེར་ཐོ་འགོད་བྱ་རྒྱུའི་ཆེད་ལས་དོན་ཚོགས་ཆུང་ཆེད་བཙུགས་བྱས་ཡོད་པ་ལྟར།  སྒྲིག་ཁྲིམས་ཞིབ་ཤེར་ཨུ་ཡོན་ལྷན་ཁང་གི་ཧྲུའུ་ཅི་དབྱིས་ཕུན་ཧ་ཚོགས་གཙོ་དང༌། རྩ་འཛུགས་དང་དྲིལ་བསྒྲགས་པུའི་པུའུ་ཀྲང་ཏན་ཧུ་པིང། སྤྱི་བདེ་ཅུས་ཀྱི་ཅུས་ཀྲང་གུང་ཞོ་ཉིན་གྱི་ཚོགས་གཞོན་དུ་བསྐོ་གཞག་བྱས་པ་མ་ཟད། དེ་མིན་ཚོགས་མིར་མི་དྲུག་ཙམ་བསྐོ་གཞག་བྱས་ཏེ་ལས་དོན་ཨུ་ཡོན་ལྷན་ཁང་གི་རྩ་འཛུགས་དང་དྲིལ་བསྒྲགས་པུའུ་ཡིས་སྤྱི་ཡོངས་ཀྱི་ལས་དོན་ཚོགས་ཆུང་གི་བྱེད་སྒོ་གོ་སྒྲིག་དང་མཐུན་སྦྱོར་འབྲེལ་གཏུགས་ཀྱི་འགན་འཁུར་རྒྱུ་དང༌། སྲིད་ཁྲིམས་ཨུ་ཡོན་ལྷན་ཁང་སྤྱི་བདེ་ཅུས་དང་མི་རིགས་ཆོས་ལུགས་ཅུས། གྲོང་བརྡལ་གཉིས་ཀྱིས་ཞིབ་བཤེར་ཐོ་འགོད་ཀྱི་འགན་འཁུར་རྒྱུ་དང༌། ཆེད་དམིགས་མི་སྣ་བཀོད་སྒྲིག་བྱས་ཏེ་ལས་དོན་སྤེལ་དགོས་པ་དང༌། འབྲེལ་ཡོད་ཀྱི་གནས་ཚུལ་དུས་ཐོག་ལས་དོན་ཨུ་ཡོན་ལྷན་ཁང་དང༌།  རྩ་འཛུགས། དྲིལ་བསྒྲགས་པུའུ་བཅས་ལ་ཞུ་དགོས་པའི་གཏན་འབེབས་བྱས་འདུག་པ་ལྟར། དུས་འཁོར་དབང་ཆེན་ཞུས་ཏེ་བོད་ནང་ཕྱིར་ལོག་བྱེད་མཁན་བོད་ཀྱི་ས་ཁུལ་ཁག་གི་བོད་མི་ཚང་མར་རྒྱ་ནག་གཞུང་གིས་འཆར་གཞི་དང་ལྡན་པའི་ཐོག་ནས་དམ་བསྒྲགས་དང་བསུན་གཙེར་ཤུགས་ཆེ་བཟོ་བཞིན་ཡོད་འདུག་པ་བཅས། །