༢༠༡༢ ཟླ་ ༣ ཚེས་ ༡༦ རེས་གཟའ་པ་སངས།
༄༅། །སུད་སི་རྒྱལ་ཡོངས་གྲོས་ཚོགས་འཚོགས་བཞིན་པའི་སྐབས་དང་བསྟུན་ཏེ་སུད་སི་རྒྱལ་ཡོངས་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་ཚོགས་ཆུང་གི་ཚོགས་མི་རྣམས་དང་སུད་བོད་མཐུན་ཚོགས་ཟུང་འབྲེལ་ཐོག་བོད་ནང་གི་འགྲོ་བ་མིའི་ཐོབ་ཐང་གི་དཀའ་ངལ་དེ་དག་སེལ་ཐབས་ཆེད་སུད་སིའི་གཞུང་ནས་རྒྱ་ནག་གཞུང་ལ་གནོན་ཤུགས་སྤྲད་དེ་བཟང་ཕྱོགས་ཀྱི་འགྱུར་བ་ཡོང་ཐབས་ལ་འབད་བརྩོན་གནང་དགོས་པའི་རེ་འདུན་ཞུས་པ་ལྟར། སུད་སིའི་གཞུང་ནས་བོད་ནང་གི་གནས་སྟངས་ལ་གང་ཐུབ་བྱེད་ཀྱི་ཡོད་ཅེས་གཞུང་འབྲེལ་ཐོག་ལན་འདེབས་གནང་འདུག
དེ་ཡང་ཕྱི་ལོ་ ༢༠༡༢ ཟླ་ ༣ ཚེས་ ༡༥ ཉིན་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱལ་ཡོངས་གྲོས་ཚོགས་ཀྱི་འཐུས་མི་མར་ཏིང་ལགས་སོགས་འཐུས་མི་ཁག་གཅིག་གིས་ད་ལྟ་འཚོགས་བཞིན་པའི་སུད་སི་རྒྱལ་ཡོངས་གྲོས་ཚོགས་ཀྱི་ཚོགས་ཆེན་ཐོག་རྒྱ་ནག་གཞུང་ནས་བོད་མིའི་ཐོག་འཛིན་པའི་སྲིད་བྱུས་དེ་དུས་རྟག་ཏུ་ནོར་འཁྲུལ་ཁོ་ནའི་ཕྱོགས་སུ་བསྐྱོད་པར་བརྟེན། བོད་རྣམས་འུ་ཐུག་ཐབས་ཟད་ནས་རང་ལུས་མེར་སྲེག་བཏང་སྟེ་རྒྱལ་སྤྱིའི་ཐོག་ནས་རྒྱབ་སྐྱོར་ཐོབ་རྒྱུའི་རེ་འབོད་བྱེད་བཞིན་ཡོད། དེར་བརྟེན་སུད་སི་གཞུང་ནས་བོད་མིའི་གནས་སྟངས་ལ་ཐུགས་ཁུར་དང་རྒྱབ་སྐྱོར་གནང་དགོས་པ་མ་ཟད། དེའི་ཐོག་རྒྱབ་སྐྱོར་ཁ་གསལ་དགོས་སྐོར་དྲི་བ་བཏོན་པར། སུད་སི་གཞུང་གི་ཐོག་ནས་བོད་ཀྱི་གནས་སྟངས་ལ་ཧ་ཅང་བློ་འཚབ་ཆེན་པོ་བྱས་དང་བྱེད་མུས་ཡིན། དེ་བཞིན་རྒྱ་ནག་པེ་ཅིང་དུ་ཡོད་པའི་ང་ཚོའི་གཞུང་ཚབ་པས་བོད་ཀྱི་གནས་ཚུལ་གླེང་སློང་བྱེད་ཀྱི་ཡོད། སུད་སི་གཞུང་ཚབ་ནས་རྒྱ་ནག་གཞུང་ལ་བོད་དུ་ལྟ་སྐོར་འགྲོ་རྒྱུའི་ཐོབ་ཐང་ཞིག་སྤྲོད་རོགས། ང་ཚོ་དེ་གར་ཕྱིན་ཏེ་ས་གནས་ས་ཐོག་ཀྱི་དངོས་ཡོད་གནས་ཚུལ་གང་ཡིན་པ་ཤེས་རྟོགས་ཆེད་འགྲོ་འདོད་འདུག་ཅེས་རྒྱ་གཞུང་ལ་རེ་འདུན་ཞུས་ཡོད། ཅེས་ལན་འདེབས་གནང་འདུག
དེ་བཞིན་འཐུས་མི་དེ་དག་གིས་དེང་སྐབས་བལ་ཡུལ་ནང་དུའང་བོད་མི་ཚོར་དཀའ་ངལ་འཕྲད་བཞིན་ཡོད་པར་བརྟེན། སུད་སི་གཞུང་ནས་བལ་ཡུལ་གཞུང་ལ་གནོན་ཤུགས་སྤྲོད་དགོས་པའི་རེ་འདུན་ཡང་བཏོན་འདུག་པ་བཅས། །