༢༠༡༢ ཟླ་ ༣ ཚེས་ ༢ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༠ ཉིན་བོད་མིའི་རང་དབང་སྒེར་ལངས་ཀྱི་དུས་དྲན་འཆར་ལ་ཉེ་བ་དང་སྟབས་བསྟུན་འཛམ་གླིང་ས་ཕྱོགས་གང་སར་གནས་པའི་རྒྱ་རིགས་མང་གཙོ་དོན་གཉེར་བ་ཚོགས་པ་ཁག་བཅུ་གཉིས་མཉམ་འབྲེལ་གྱིས་བོད་དོན་ལ་རྒྱབ་སྐྱོར་ཆེད་ས་རྟགས་བསྡུ་རུབ་ཀྱི་ལས་འགུལ་ཞིག་དབུ་འཛུགས་གནང་འདུག
དེ་ཡང་གསར་འགྱུར་ལམ་ཁག་ནང་གནས་ཚུལ་ཐོན་གསལ་ལྟར་ན། ལས་འགུལ་དེ་དང་འབྲེལ་བའི་གསལ་བསྒྲགས་ཤིག་སྤེལ་ཡོད་པ་དེའི་ནང་བོད་མིའི་སྒེར་ལངས་ཀྱི་ཉིན་མོ་ངོ་སྤྲོད་སྙིང་བསྡུས་ཤིག་གནང་ཡོད་པ་དང་ཆབས་ཅིག་ད་ལྟའི་བོད་ནང་གི་ཛ་དྲག་གནས་སྟངས་ཀྱི་རྒྱབ་ལྗོངས་ངོ་སྤྲོད་གནང་སྟེ་སྐབས་བབ་ཀྱི་དགོས་མཁོར་གཞིགས་པའི་རྒྱ་ནག་མི་མང་ལ་དེའི་ཐོག་གདུང་སེམས་མཉམ་སྐྱེའི་རྣམ་འགྱུར་སྟོན་རྒྱུའི་རང་དབང་མེད་ཀྱང་ཕྱི་སྡོད་རྒྱ་མི་རིགས་རྣམས་ལ་དེ་ལྟའི་དཀའ་ངལ་མེད་སྟབས། གསུམ་བཅུའི་དུས་དྲན་སོགས་ཀྱི་སྐབས་སུ་བོད་དོན་ལ་རྒྱབ་སྐྱོར་གནང་སྟེ་མཉམ་ཞུགས་བྱེད་དགོས་པའི་འབོད་སྐུལ་ཞུས་ཡོད་པ་མ་ཟད། རྒྱ་མི་ཚོས་དུས་རྒྱུན་དུ་བོད་མི་ཚོར་བོད་རིགས་སྤུན་ཟླ་ཞེས་འབོད་ཀྱི་ཡོད་པ་ལྟར། བོད་ནང་གི་བོད་མིར་དཀའ་ངལ་འཕྲད་བཞིན་ཡོད་པའི་ད་ལྟའི་དུས་ཚོད་འདིར་སྤུན་ཟླ་ཚོར་རོགས་སྐྱོར་བྱེད་དགོས་པའི་དུས་ལ་བབས་ཡོད། ཕྱོགས་མཚུངས་ཕྱི་སྡོད་རྒྱ་མི་རིགས་ཚོས་རང་ཉིད་གནས་ཡུལ་གྱི་ལུང་པ་དང་རྒྱལ་ཁབ་ཁག་གི་གཞུང་། གྲོས་ཚོགས་ཀྱི་འཐུས་མི་སོགས་ལ་དེ་ཉིན་བོད་དོན་དང་འབྲེལ་བའི་གནས་དོན་འབོད་སྐུལ་དང་ར་སྤྲོད་གནང་སྟེ་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་བསྐུལ་མ་གནང་རྒྱུའི་རེ་འདུན་ཡང་བཏོན་འདུག་པ་བཅས།།