༢༠༡༢ ཟླ་ ༣ ཚེས་ ༣ རེས་གཟའ་སྤེན་པ།
༄༅། །རྒྱལ་སྤྱིའི་འབྲེལ་མཐུད་པ་བསྟན་འཛིན་འཇིགས་མེད་ལགས་དང་བྱང་ཨ་མི་རི་ཀའི་མངའ་ཁུལ་འབྲེལ་མཐུད་པ་ཨྐེཛ་མེན་ཌེཛ་(Exa Mendez)ལགས་གཉིས་ཀྱིས་གོ་སྒྲིག་འོག་བྱང་ཨ་མེ་རི་ཀར་གནས་སྡོད་བོད་མིའི་སྒྲིག་འཛུགས་བོད་འབྲེལ་མཐུད་པ་ཚེ་དབང་ཕུན་ཚོགས་ལགས་གིས་མཐུན་རྐྱེན་བསྐྲུན་ཐོག་ཕྱི་ཟླ་ ༢ ཚེས་ ༡༧ ནས་ ༡༩ བར་མེཀ་སི་ཀོ་གྲོང་ཁྱེར་ནང་ཉིན་གསུམ་རིང་བོད་དོན་རྒྱབ་སྐྱོར་ཆེད་གལ་ཆེའི་ཟབ་སྦྱོང་ཞིག་ཚོགས་འདུག
དེ་ཡང་ཟབ་སྦྱོང་ནང་མེཀ་སི་ཀོ་གྲོང་ཁྱེར་དང་མོ་རེ་ལི་ཡ།(Morelia) གྷོ་ལྡ་ལ་ཇ་ར།(Guadalajara) མོན་ཊེ་རི།(Monterrey) ཀར་ན་ཝ་ཀ(Cuernavaca) ཨོ་གྷ་ས་ཀེ་ལེན་ཊེས་(Aguascalientes)བཅས་ནས་ཁྱོན་མི་གྲངས་སུམ་ཅུས་མཉམ་ཞུགས་གནང་ཡོད།  སྐབས་དེར་ཨེཛ་མེན་ཌེཛ་མཆོག་གིས་ཟབ་སྦྱོང་འགྲེལ་བརྗོད་དང་འབྲེལ་དབུ་འཛུགས་གནང་ཡོད། དེ་ནས་ཚེ་དབང་ཕུན་ཚོགས་ལགས་ཀྱིས་དུས་ཡུན་ཆུ་ཚོད་གཅིག་རིང་ད་ལྟའི་བོད་ཀྱི་ཛ་དྲག་གནས་སྟངས་དང་ཉེ་ཆར་བོད་ནང་གི་རྒྱལ་གཅེས་དཔའ་བོ་རྣམ་པས་རང་སྲོག་བློས་གཏོང་གི་བྱ་སྤྱོད་དང་བོད་ནང་འཛིན་པའི་རྒྱ་གཞུང་གི་སྲིད་བྱུས། དེ་བཞིན་བོད་ནང་ཚབས་ཆེའི་དྲག་གནོན་བྱས་དང་བྱེད་མུས་ཡན་པའི་ཐོག་བགྲོ་གླེང་ལྷུག་པོ་གནང་ཡོད། ཉིན་གསུམ་རིང་གི་ཟབ་སྦྱོང་དེ་འཐབ་བྱུས་ཀྱི་འཆར་གཞི་དང་གསར་འགོད་བརྒྱུད་ལམ་ལག་བསྟར། ཕྱོགས་མཚུངས་འཚེ་མེད་ཞི་བའི་བྱ་སྤྱོད་བཅས་ཀྱི་ཐད་སྦྱོང་བརྡར་སོགས་ལ་དོ་སྣང་དམིགས་འཛུགས་གནང་ཞིང་། འཐབ་བྱུས་འཆར་གཞིའི་སྐོར་ཟབ་སྦྱོང་དེ་མེན་ཌེཛ་ལགས་དང་བསྟན་འཛིན་འཇིགས་མེད་ལགས་གཉིས་ཀྱིས་ད་ལྟའི་མེཀ་སི་ཀོ་ནང་གི་གནས་སྟངས་ལ་དཔྱད་ཞིབ་དང་ལས་གཞིའི་འཆར་གཞིའི་ནང་གི་དམིགས་ཡུལ་དང་འཐབ་བྱུས། དེ་བཞིན་དམག་བྱུས་སོགས་ཀྱི་གོ་རྟོགས། ཡུལ་ལུང་སོ་སོར་འཚམ་པའི་བྱ་སྤྱོད་སོགས་ལ་དོ་སྣང་ཆེད་འཛུགས་གནང་ཡོད། ཁོང་རྣམ་པས་ལས་དོན་འཆར་གཞི་་ཞིབ་ཕྲའི་འཆར་གཞི་དང་ལྡན་པར་ནན་བརྗོད་ཆེན་པོ་གནང་ཡོད། ཁོང་གི་གསར་འགོད་བརྒྱུད་ལམ་དང་ལྷན་འབྲེལ་བ་བྱེད་ཚུལ་ཐད། སྐུ་ཞབས་ཨེ་སི་སན་ཏ་ན་ཁོ་རང་གིས་ཐོག་མའི་གསར་འགོད་མགྲོན་འབོད་འགོད་ཚུལ་དང་། གསར་འགོད་གསལ་བསྒྲགས། དེ་བཞིན་གནས་ཚུལ་མཁོ་སྤྲོད། གསར་འགོད་པ་དང་ལྷན་རྒྱུན་གཏན་གྱི་འབྲེལ་བ་ཉར་སྟངས་སོགས་ཀྱི་ལམ་སྟོན་གནང་ཞིང་། ཁོང་གིས་ནན་བརྗོད་བྱེད་དོན་ལ་གསར་འགོད་བརྒྱུད་ལམ་ཐོག་ལ་གནས་ཚུལ་ཕྱི་སྤེལ་བྱེད་སྐབས་དོན་བསྡུས་ཤིང་གནད་དུ་འཁེལ་བ་ཁ་གསལ་ལ་གོ་སླ་བ་དགོས་ཤིང། ཁོང་གིས་གསར་འགོད་པ་དང་ལྷན་རྟག་ཏུ་འབྲེལ་གནང་རྒྱུ་གལ་འགངས་ཡིན་པ་ནན་བརྗོད་གནང་། ཁོང་གིས་ཟབ་སྦྱོང་བ་དག་ལ་གྲགས་ཆེ་བའི་མེཀ་སི་ཀན་གསར་འགོད་པ་དག་གི་མིང་གཞུང་ཁ་བྱང་ཕྱོགས་སྒྲིག་བྱེད་དུ་འཇུག་ཡོད། ཟབ་སྦྱོང་མཇུག་མ་བསྒྲིལ་གོང་མེཀ་སེ་ཀོ་གྲོང་ཁྱེར་ནང་གི(Pensando en Tibet)ཚོགས་མི་སྐུ་ཞབས(Ricardo Villogomez)ལགས་ཀྱིས་(Pensando en Tibet )སྒྲོམ་གཞི་དང་ལག་ལེན་བསྟར་ཕྱོགས་ཀྱི་འཆར་གཞིའི་ཐད་འགྲེལ་བརྗོད་ཟབ་རྒྱས་གནང་ཡོད་པ་བཅས།།