༢༠༡༢ ཟླ་ ༣ ཚེས་ ༡༢ རེས་གཟའ་ཟླ་བ།
༄༅། །འདི་གར་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས་ཀྱི་བཏང་གནས་ནང་འཁོད་དོན། ཕྱི་ལོ་ ༢༠༡༢ ཕྱི་ཟླ་ ༣ ཚེས་ ༡༠ ནི་བོད་མི་རྣམས་ཀྱིས་ཕྱི་ལོ་ ༡༩༥༩ ལོར་རྒྱ་ནག་དམར་པོའི་དབང་སྒྱུར་ལ་ཞི་བའི་སྒེར་ལངས་བྱས་ནས་ད་བར་མི་ལོ་ཧྲིལ་པོ་ ༥༣ འཁོར་བའི་དུས་དྲན་ཉིན བྱང་ཨ་རིའི་ས་གནས་ཁག་ཉེར་བཞི་ཙམ་ནང་གནས་སྡོད་བྱེད་མཁན་གྱི་བོད་མི་ཚོས་རང་རང་གནས་ཡུལ་ས་གནས་སུ་བརྗེད་པར་དཀའ་བའི་གལ་ཆེའི་ལོ་རྒྱུས་ཀྱི་ཉིན་མོ་དེར་དྲན་གསོའི་ཆེད་འདུ་འཛོམས་ཀྱིས་ལས་འགུལ་གཞི་རྒྱ་ཆེ་ཆུང་སྣ་ཚོགས་ཤིག་སྤེལ་ཡོད།
དེ་ཡང་ཨ་རིའི་གྲོང་ཁྱེར་ནིའུ་ཡོཀ་ནང་ཡོད་པའི་གཞུང་འབྲེལ་མིན་པའི་ཚོགས་པ་ཁག་ཐུང་མོང་ནས་ཕྱི་ཟླ་ ༣ ཚེས་ ༡༠ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་དུ་གསུམ་བཅུའི་དུས་དྲན་ཐེངས་ ༥༣ པ་དྲན་གསོ་གནང་བའི་མཛད་སྒོ་ཚུགས་ཡོད་པར་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང༌། བྱང་ཨ་རིའི་སྤྱི་འཐུས་བཀྲིས་རྣམ་རྒྱལ་ལགས་ཀྱིས་དབུས་སེར་སྐྱ་མང་ཚོགས་དང༌། བོད་ལ་རྒྱབ་སྐྱོར་བྱེད་མཁན་ཕྱི་རྒྱལ་བ། མཉམ་འབྲེལ་རྒྱལ་ཚོགས་མདུན་དུས་ཚོད་ངེས་མེད་ཀྱི་ཟས་བཅད་ངོ་རྒོལ་གནང་བཞིན་པའི་ལྷག་བསམ་ཅན་གྱི་བོད་མི་གསུམ་བཅས་ཁྱོན་མི་གྲངས་ ༣༠༠༠ བརྒལ་བ་མཉམ་ཞུགས་གནང་ཡོད། དངོས་གཞིའི་མཛད་སྒོ་དབུ་འཛུགས་མ་གནང་སྔོན་མི་མང་རྣམས་ནིའུ་ཡོཀ་གྲོང་ཁྱེར་གྱི་སྤྱི་གླིང་ཞིག་ནང་ལྷན་འཛོམས་ཐོག་གངས་སེང་གི་རྒྱལ་དར་དང༌། བརྗོད་ཚིག་སྣ་ཚོགས་འཁོད་པའི་ཚོན་ཁྲ་ཅན་གྱི་འཕྲེད་དར། དེ་བཞིན་རང་ལུས་མེ་ལ་སྒྲོན་ནས་རྒྱ་གཞུང་གི་བོད་ལ་འཛིན་པའི་སྲིད་བྱུས་དེར་ངོ་རྒོལ་གནང་མཁན་ཚོའི་སྐུ་པར་འཁྱེར་བཞིན་དུ་རྔམ་སྟོན་ཁྲོམ་སྐོར་བྱེད་བཞིན་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་མདུན་ཐང་དུ་ཚང་འཛོམས་གནང་ཡོད
དེ་རྗེས་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་གུས་འདུད་སྐར་མ་གཅིག་དང༌། མི་མང་ལངས་གླུ་དང་གསུམ་བཅུའི་དྲན་གླུ་བཅས་བཏང་རྗེས་བྱང་ཨ་རིའི་སྤྱི་འཐུས་བཀྲིས་རྣམ་རྒྱལ་ལགས་དང༌། ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་རྣམ་གཉིས་ནས་ཁག་སོ་སོར་བཀའ་ཤག་དང་སྤྱི་འཐུས་ལྷན་ཚོགས་ཀྱི་གསུམ་བཅུའི་དུས་དྲན་གྱི་གསུང་བཤད་སྒྲོགས་སྦྱང་གནང་གྲུབ་མཚམས་གོ་སྒྲིག་གནང་མཁན་གཞུང་འབྲེལ་མིན་པའི་ཚོགས་པ་ཁག་གི་ལས་སྣེ་རྣམས་དང༌། རྒྱ་གཞུང་བཙོན་ཁང་དུ་དཀའ་སྡུག་མྱོང་བཞིན་པའི་གློག་བརྙན་བཟོ་མཁན་དོན་གྲུབ་དབང་ཆེན་ལགས་ཀྱི་བཟའ་ཟླ་ལྷ་མོ་མཚོ་ལགས་དང་
ཟས་བཅད་ངོ་རྒོལ་དུ་བཞུགས་པའི་ཤིང་བཟའ་རིན་པོ་ཆེ་སོགས་ནས་དུས་དྲན་དང་འབྲེལ་བའི་གསུང་བཤད་གནང་སྟེ་མཛད་སྒོ་གྲུབ་རྗེས་འདུ་འཛོམས་ནང་མཉམ་ཞུགས་གནང་མཁན་སེར་སྐྱ་མང་ཚོགས་རྣམས་ཀྱིས་ནིའུ་ཡོཀ་རྒྱ་ནག་གཞུང་ཚབ་ཁང་གི་མདུན་ངོ་རྒོལ་སྐད་འབོད་དང༌། དེ་ནས་ཕྱི་དྲོ་གྲོང་ཁྱེར་ནིའུ་ཡོཀ་ནང་གི་འཁྲུག་ཆ་ཆེ་ཤོས་དང༌། མི་ཚོགས་མང་ཤོས་ཡིན་པའི་Fourteen Union Square ས་ཁུལ་དུ་མཉམ་འཛོམས་ཀྱིས་མར་མེའི་ཁྲོམ་སྐོར་དང༌། ངོ་རྒོལ་སྐད་འབོད། གཏམ་བཤད་བཅས་སྤེལ་ནས་ལས་འགུལ་མཇུག་བསྡོམས་གནང༌།
དེ་ཉིན་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང༌། དོན་གཅོད་ཁང་གི་ལས་བྱེད་རྣམས་ནས་ཟས་བཅད་ངོ་རྒོལ་གནང་བཞིན་པའི་བོད་མི་གསུམ་ལ་འཚམས་འདྲི་དང༌། ཁོང་ཚོས་བཏོན་པའི་དགོས་འདུན་དོན་ཚན་ལྔ་ལ་རྒྱབ་སྐྱོར་མཚོན་སླད་མཉམ་འབྲེལ་རྒྱལ་ཚོགས་མདུན་ཁོང་རྣམ་པར་གཟིགས་པར་ཕེབས་ཡོད།
དམིགས་བསལ་གྱི་གནས་ཚུལ་ཞིག་ལ། འདི་ལོའི་གསུམ་དུས་སྐབས་བྱང་ཨ་རི་གཙོ་བོར་གྱུར་བའི་འཛམ་གླིང་ས་གནས་གང་སར་ཡོད་པའི་རྒྱ་རིགས་གྲོགས་པོའི་ཚོགས་པ་འདྲ་མིན་ ༧༤ ནས་གསུམ་བཅུའི་དུས་དྲན་ཉིན་ཐུང་མོང་གི་བསྒྲགས་གཏམ་ཞིག་སྤེལ་ཏེ་བོད་མིའི་ཞི་བའི་འཐབ་རྩོད་ལ་རྒྱབ་སྐྱོར་གྱི་རྣམ་པ་གསལ་པོ་མཚོན་པ་བྱས་པ་དེ་ནི་སྔར་མཐོང་དཀོན་པ་ཞིག་ཡིན་པ་མ་ཟད། རྒྱ་རིགས་ཤེས་ཡོན་ཅན་གཉིས་ཀྱིས་གཙོ་འགན་འཁུར་ཏེ་བོད་ནང་གི་བོད་མི་ཚོས་རང་ལུས་རང་གིས་སྲེག་པའི་གནས་ཚུལ་འདིས་ག་རེ་བསྟན་གྱི་ཡོད་དམ། ཞེས་པའི་རྒྱ་ཡིག་གི་དེབ་གསར་པ་ཞིག་དཔར་སྐྲུན་དང་འགྲེམས་སྤེལ་གནང་བ་དེ་ཝ་ཤིང་ཀྲོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་དུ་དབུ་འབྱེད་གནང་ཡོད་པ་བཅས།།
