༢༠༡༢ ཟླ་ ༣ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༡༠ ཉིན་ཕ་རན་སིར་གནས་སྡོད་བོད་རིགས་གཙོ་བོར་གྱུར་བའི་ཕ་རན་སི་ཡུལ་མི་དང་རྒྱ་རིགས། ཐེ་ཝན་དང་ཝི་ཏི་ནམ། དེ་བཞིན་ཨ་རབ་ཡུལ་མི་ཁག་གཅིག་བཅས་ཀྱིས་པ་ལི་སེ་ཌི་ཅེ་ལོ་ཊ་(Palais de Chaillot)ཞེས་པའི་རྒྱལ་ས་པེ་རི་སིའི་ནང་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་བོད་མིའི་གསུམ་བཅུའི་དུས་དྲན་ཐེངས་ ༥༣ དེ་བཞིན་སྲུང་བརྩི་གཟབ་རྒྱས་ཞུས་ཡོད།
དེ་ཡང་མཛད་སྒོའི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་ཕུལ་རྗེས་བཀའ་ཁྲི་བློ་བཟང་སེང་གེ་མཆོག་གི་གསུམ་བཅུའི་དུས་དྲན་གྱི་གཏམ་བཤད་སྒྲོགས་སྦྱང་ཞུས། སྐབས་དེར་ཕ་རན་སིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཚོགས་གཞོན་སྐུ་ཞབས་ལི་ནེལ་ལུ་ཀ་(Lionnel Luca)མཆོག་དང་པེ་ཊིག་བྷོ་ལོ་ཆི་(Patric Bloche)མཆོག་གིས་མཛད་སྒོ་དང་འབྲེལ་བའི་གསུང་བཤད་སོགས་གནང་སྟེ་མཛད་སྒོ་ཆུ་ཚོད་བཞི་ཙམ་ཚུགས་ཡོད།
དེ་ཉིན་སྔ་དྲོ་རྒྱལ་ས་པེ་རི་སི་ཁུལ་དུ་ནང་པའི་ཆོས་ཚོགས་(Tibet Compassion International)ཞེས་པའི་ནང་དུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དབུ་བཞུགས་ཀྱིས་
རང་ལུས་མེར་སྲེག་གཏོང་མཁན་བོད་མི་ ༢༦ རྣམས་ལ་གདུང་སེམསམ་མཉམ་སྐྱེ་ཞུ་ཆེད་མཆོད་འབུལ་སྨོན་ལམ་གསུང་འདོན་གནང་ཡོད།
ཕྱོགས་མཚུངས་ཕྱི་ཚེས་ ༩ ཉིན་ཕ་རན་སི་ལྗང་ཁུ་ཚོགས་པའི་འཐུས་མི་ལྕམ་སྐུ་ཨི་ཝ་ཇོ་ལི་ལགས་ཀྱིས་བསྒྲགས་གཏམ་ཞིག་སྤེལ་ཏེ་རྒྱ་ནག་གཞུང་གིས་བོད་མི་ཚོར་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་སྐྱོན་བརྗོད་ཤུགས་ཆེ་གནང་ཡོད་པ་བཅས།།