༢༠༡༢ ཟླ་ ༣ ཚེས་ ༢༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༣ ཚེས་ ༢༨ ཉིན་བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཆོས་རིག་ལས་ཁུངས་ནས་གོ་སྒྲིག་ཞུས་ཐོག་རྒྱལ་གཅེས་པ་འཇམ་དཔལ་ཡེ་ཤེས་ལགས་འདས་གྲོངས་སུ་གྱུར་བ་དང་དེ་བཞིན་གཞིས་བྱེས་གཉིས་སུ་གནས་པའི་དཔའ་བོ་ཕོ་མོ་འདས་གསོན་ཡོངས་ལ་གདུང་སེམས་མཉམ་སྐྱེའི་མྱ་ངན་རྗེས་དྲན་ཞུ་ཆེད་ཉིན་རྒྱབ་ཆུ་ཚོད་ ༤ པ་ནས་ལས་ཁུངས་ཁག་སྒོ་བརྒྱབ་སྟེ་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔའི་དྲུང་དུ་མཆོད་སྤྲིན་བརྒྱ་ཚར་འབུལ་ཤོམ་དང་འབྲེལ་བའི་ཚོགས་མགོན་དུ་བཀའ་ཁྲི་མཆོག་གིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང་དོན། རྣམ་གྲྭའི་མཁན་རིན་པོ་ཆེ་མཆོག་གིས་དབུས་སྐྱབས་གནས་དགེ་འདུན་གྱི་སྡེ་རྣམ་པ་དང་། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་མང་རྣམས་དང་དམིགས་བསལ་ཤེས་རབ་དགའ་ཚལ་སློབ་གླིང་གི་སློབ་ཕྲུག་རྣམ་པས་ཤེས་གསལ་ལྟར། ཕྱི་ཚེས་ ༢༦ ཉིན་རྒྱ་གར་གྱི་རྒྱལ་ས་ལྡི་ལིར་འཇམ་དཔལ་ཡེ་ཤེས་ལགས་ཀྱིས་རང་སྲོག་མེར་སྲེག་བཏང་རྗེས་སྨན་ཁང་དུ་འཁྱེར་ཏེ་སྨན་བཅོས་ཀྱི་འབད་བརྩོན་བྱས་ཀྱང་། དེ་རིང་ཞོགས་པ་བློ་ཕམ་པའི་གནས་ཚུལ་ལ་ཁོང་འདས་གྲོངས་སུ་གྱུར་འདུག དབུས་བོད་མིའི་སྒྲིག་འཛུགས་བཀའ་ཤག་ངོས་ནས་འཇམ་དཔལ་ཡེ་ཤེས་ལགས་ཀྱི་ནང་མི་སྤུན་མཆེད་ཚང་མར་གདུང་སེམས་མཉམ་སྐྱེ་ཞུ་རྒྱུ་ཡིན། རྒྱལ་གཅེས་པ་འཇམ་དཔལ་ཡེ་ཤེས་ལགས་ནི་ཕྱི་ལོ་ ༢༠༠༦ ལོར་བཙན་བྱོལ་ལ་འབྱོར་ཏེ་ཤེས་རབ་དགའ་ཚལ་སློབ་གླིང་དུ་སློབ་སྦྱོང་གནང་མྱོང་བ་དང་། ལོ་གཉིས་སྔོན་ནས་ལྡི་ལིར་བཞུགས་འདུག རང་ལུས་མེར་སྲེག་མ་བཏང་གོང་ཁོང་གིས་ཁ་ཆེམས་དོན་ཚན་འགའ་ཤས་བཞག་ཡོད་པའི་ནང་། ད་ལྟ་བར་བོད་ནང་རང་སྲོག་མེ་ལ་ཕུལ་མཁན་ཁོང་ཚོའི་དགོས་དོན་དང་། རེ་འདུན་བཞིན་རེད་འདུག ༸གོང་ས་མཆོག་བོད་ལ་གདན་འདྲེན་ཞུ་དགོས་པ། བོད་ནང་རང་དབང་དགོས་པ། དམིགས་བསལ་བོད་མི་ཡོངས་ནས་མི་རིགས་ཀྱི་ལ་རྒྱ་བརྟན་པོ་ཟིན་དགོས་པ་གསུངས་འདུག དེ་སྔོན་བོད་ནང་རང་སྲོག་མེ་ལ་ཕུལ་མཁན་ཚོའི་ནང་ཁ་ཆེམས་འཇོག་མཁན་བྱུང་ཡོད། དཔེར་ན། མགོ་ལོག་སྤྲུལ་སྐུ་བསོད་ནམས་དབང་རྒྱལ་ལགས་ཀྱིས་ཁ་ཆེམས་ནང་བོད་དང་བོད་མིའི་ཆེད་དུ་རང་སྲོག་བློས་བཏང་བ་ཡིན་ཞེས་གསུངས་ཡོད། ད་ལྟའི་གནས་སྟངས་འདིའི་སྐབས་བོད་ཕྱི་ནང་གཉིས་ཀར་ཚོར་བ་ཤུགས་ཆེ་ཡོད་སྐབས་སུ་ལས་འགུལ་གང་འདྲ་ཞིག་སྤེལ་ཡང་ཞི་བ་དང་ཁྲིམས་མཐུན། ཆེ་མཐོང་ལྡན་པའི་ཐོག་ནས་སྤེལ་རྒྱུ་དེ་ཧ་ཅང་གལ་ཆེན་པོ་ཡིན་པ་ད་ལྟ་བར་བཀའ་སྤྱི་གཉིས་ཀྱིས་ལམ་སྟོན་ཞུས་པ་དེ་དག་ཐུགས་ལ་འཇོག་རོགས་གནང་། གང་ཡིན་ཞེ་ན། རྒྱ་ནག་གཞུང་གིས་བཙན་བྱོལ་སྒྲིག་འཛུགས་འདི་ནུས་མེད་ཆགས་རྒྱུའི་རེ་བ་འཆང་བཞིན་ཡོད་པ་མ་ཟད། འཆར་གཞི་ཡང་བཏིང་དང་འདིང་མུས་རེད། བཀའ་སྤྱི་གཉིས་ནས་ད་ལྟ་བར་བོད་ནང་རང་སྲོག་མེ་ལ་ཕུལ་མཁན་དང་། དེ་བཞིན་ཁོང་ཚོའི་རེ་འདུན་ལྟར་རྒྱལ་སྤྱིའི་སྡིངས་ཆའི་སྟེང་ནས་གང་ཐུབ་ཅི་ཐུབ་ཀྱིས་འབད་བརྩོན་གནང་བཞིན་པ་རེད་ལ་གསར་འགྱུར་བརྒྱུད་ལམ་ཁག་ནང་གནས་ཚུལ་སྤེལ་ཏེ་རྒྱབ་སྐྱོར་ཡང་གང་ལ་གང་ཙམ་ཐོབ་དང་འཐོབ་མུས་རེད། ད་ལྟ་བར་མཉམ་འབྲེལ་རྒྱལ་ཚོགས་དང་འབྲེལ་བའི་ལུང་པ་ཁག་བཅུ་གཉིས་ཙམ་ནས་བོད་ཀྱི་གནས་སྟངས་ཐོག་སེམས་འཚབ་ཡོད་པའི་ཡིག་ངག་གཉིས་ནས་གསུངས་ཡོད། ཡུ་རོབ་རྒྱལ་ཁབ་འགའ་ཤས་ཀྱི་གྲོས་ཚོགས་ནང་གྲོས་ཆོད་བཞག་པ་དང་། ཨ་རི་དབུས་པའི་རྒྱལ་ཁབ་ཁག་གཅིག་གི་གྲོས་ཚོགས་ནང་གྲོས་ཆོད་འཇོག་རྒྱུའི་འབད་བརྩོན་བྱས་དང་བྱེད་མུས་རེད། དེ་བཞིན་གོ་ཐོས་བྱུང་བ་ལྟར་ན། ཨོ་སི་ཊོ་ལི་ཡའི་གཞུང་ཚབ་ཀྱིས་བོད་ནང་ཞིབ་འཇུག་ཏུ་སྐྱོད་རྒྱུའི་ཆོག་མཆན་སྤྲོད་རོགས་ཞེས་རྒྱ་ནག་ཕྱི་འབྲེལ་ལས་ཁུངས་སུ་འབོད་སྐུལ་ཞུས་པའི་གནས་ཚུལ་བྱུང་ཡོད། ད་ལྟ་བར་དུ་རྒྱལ་ཁབ་མང་པོ་ཞིག་གིས་སེམས་འཚབ་ཡོད་ཅེས་གསུང་བཤད་གནང་བར་ང་ཚོས་དགའ་བསུ་ཞུ་བཞིན་ཡོད། ང་ཚོས་རྒྱལ་སྤྱིའི་སྤྱི་ཡོངས་ཀྱི་རྒྱལ་ཁབ་མང་པོ་ཞིག་ལ་རེ་སྐུལ་བསྐྱར་ནན་ཞུ་རྒྱུར། ཁྱེད་རྣམ་པ་བོད་ནང་གི་ས་ནས་ས་ཐོག་གི་དངོས་ཡོད་གནས་སྟངས་གང་འདྲ་ཡིན་མིན་ཞིབ་འཇུག་གནང་བར་དངོས་སུ་ཕེབས་རོགས་ཞེས་འབོད་སྐུལ་ཞུ་རྒྱུ་ཡིན། དེ་བཞིན་མཉམ་འབྲེལ་རྒྱལ་ཚོགས་དང་ནོ་བེལ་གཟེངས་རྟགས་བཞེས་མཁན་ཚོར་ཡང་འབོད་སྐུལ་ཞུ་བཞིན་ཡོད། བཀའ་ཤག་གི་གྲོས་ཚོགས་ལ་གསལ་བཤད་བྱས་པ་ལྟར་ཚོགས་གཙོ་གཉིས་གྲོས་བསྡུར་བྱས་ཐོག་དམིགས་བསལ་ཚོགས་འདུ་ཞིག་སྐོང་རྒྱུའི་འབད་བརྩོན་ཞུ་གི་ཡོད། གྲོས་ཚོགས་ཀྱི་རྒྱུན་ལས་དང་གྲོས་བསྡུར་བྱས་ཏེ་དུས་ཚོད་དང་གནད་དོན་གང་འདྲ་ཞིག་གི་ཐོག་ཚོགས་དགོས་ཀྱི་ཡོད་མེད་རིམ་པས་གསལ་བསྒྲགས་ཡོང་གི་རེད་ཅེས་ཞུ་རྒྱུ་ཡིན། དེ་བཞིན་བཀའ་ཤག་ཐོག་ནས་བོད་ནང་གི་ཛ་དྲག་གནས་ཚུལ་ཆགས་སྐབས་རྒྱ་གར་དུ་ཡོད་པ་དང་རྒྱལ་སྤྱིའི་ཐོག་ནས་བོད་དོན་རྒྱབ་སྐྱོར་གནང་མཁན་ཚོགས་པ་དེ་དག་སྐོང་ཏེ་ཛ་དྲག་གནས་སྟངས་ཐོག་ག་རེ་བྱ་རྒྱུ་འདུག དེའི་ཐོག་ཚོགས་འདུ་སྐོང་རྒྱུའི་འབད་བརྩོན་རིམ་བཞིན་ཞུ་རྒྱུ་ཡིན། མཐའ་དོན་རྒྱལ་གཅེས་པ་འཇམ་དཔལ་ཡེ་ཤེས་ལགས་ཀྱིས་གཙོས་བོད་བསྟན་སྲིད་དང་མི་རིགས་ཀྱི་ཆེད་རང་སྲོག་བློས་གཏོང་གནང་མཁན་རྣམས་དལ་རྟེན་རིམ་བརྒྱུད་ཡོང་བ་དང་འཕགས་མཆོག་སྤྱན་རས་གཟིགས་ཀྱི་རྗེས་སུ་བཟུང་བའི་སྨོན་ལམ་ཤུགས་དྲག་ཞུ་རྒྱུ་ཡིན། ཞེས་གསུང་བཤད་གནང་ཡོད་པ་བཅས། །