༢༠༡༢ ཟླ་ ༣ ཚེས་ ༦ རེས་གཟའ་མིག་དམར།
༄༅། །བོད་མིའི་དྲང་བདེན་ལ་རྒྱབ་སྐྱོར་གནང་མཁན་ཐེ་ཝན་བོད་ཀྱི་གྲོགས་པོ་ཚགས་པས་ཕྱི་ལོ་ ༢༠༡༢ ཟླ་ ༣ ཚེས་ ༤ ཉིན་བོད་ནང་རང་ལུས་མེར་སྲེག་གཏོང་མཁན་རྣམས་དང་ཤར་ཏུར་གྷི་སེ་ཐན་གྱི་མི་གསོད་དོན་རྐྱེན། རྒྱ་ནག་གཞུང་དང་དེའི་ཉེ་འབྲེལ་ཞེས་པའི་གསར་འགོད་ལྷན་ཚོགས་ཤིག་ཚོགས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། གསར་འགོད་ལྷན་ཚོགས་དེའི་སྐབས་སུ་ཐེ་ཝན་བོད་ཀྱི་གྲོགས་པོ་ཚོགས་པའི་ངོས་ནས་རྒྱ་ནག་གཞུང་གིས་བོད་ནང་གི་དགོན་སྡེ་ཁག་ནང་འགྲེམས་འཇོག་བྱས་ཡོད་པའི་དམག་མི་རྣམས་ཕྱིར་འཐེན་བྱེད་དགོས་པའི་རེ་འདུན་བཏོན་ཡོད་པ་མ་ཟད། ཐེ་ཝན་བོད་ཀྱི་གྲོགས་པོ་ཚོགས་པའི་འགན་འཛིན་མཆོག་གིས་གསུང་དོན། དེང་སྐབས་བོད་དང་ཡུ་གུར་མི་རིགས་ཀྱིས་ཞི་རྒོལ་དང་འདུ་ཚོགས་ཀྱི་གནས་ཚུལ་ཛ་དྲག་ཏུ་འགྲོ་བཞིན་ཡོད། འོན་ཀྱང་རྒྱ་ནག་གཞུང་ཕྱོགས་ནས་བདེ་འཇགས་སྲུང་སྐྱོབ་དང་སྤྱི་ཚོགས་བརྟན་ལྷིང་། འཆམ་མཐུན་བཅས་ལ་ཁ་གཡར་ཏེ་བོད་མི་སོགས་ལ་དྲག་གནོན་བྱས་དང་བྱེད་མུས་རེད། དེར་བརྟེན་ང་ཚོ་ཐེ་ཝན་བོད་ཀྱི་གྲོགས་པོ་ཚོགས་པའི་ངོས་ནས་ཚོར་ཤུགས་ཆེན་པོའི་ཐོག་རྒྱ་ནག་གཞུང་ལ་རེ་འདུན་ཞུ་རྒྱུར། དོན་རྐྱེན་དེ་དག་བྱུང་བའི་གཞི་རྩའི་རྒྱུ་རྐྱེན་གང་ཡིན་ཞིབ་འཇུག་དང་མགྱོགས་ནས་མྱུར་དུ་བོད་ནང་གི་ཆོས་སྡེ་ཁག་ནང་འགྲེམས་འཇོག་བྱས་ཡོད་པའི་རྒྱ་ནག་གཞུང་གི་དམག་མི་རྣམས་ཕྱིར་འཐེན་བྱེད་དགོས་ཞེས་གསུངས་འདུག་པ་བཅས། །