༢༠༡༢ ཟླ་ ༣ ཚེས་ ༡༢ རེས་གཟའ་ཟླ་བ།
༄༅། འདི་གར་ཐེ་ཝན་སྐུ་ཚབ་དོན་གཅོད་ཁང་གི་ཕྱི་ཟླ་ ༣ ཚེས་ ༡༠ ཉིན་བཏང་གནས་ནང་འཁོད་དོན། དེ་ཉིན་ཐེ་སྡོད་བོད་རིགས་ཚོགས་པ་དང་། ས་གནས་བོད་ཀྱི་གཞོན་ནུ་དང་བུད་མེད་ཚོགས་པ། སློབ་ཕྲུག་བོད་དོན་རྒྱབ་སྐྱོར་ཚོགས་པ། དེ་བཞིན་ཐེ་ཝན་བོད་ཀྱི་གྲོགས་པོའི་མཐུན་ཚོགས། ཐེ་ཝན་བོད་རྒྱ་མཐུན་ཚོགས་སོགས་གཞུང་འབྲེལ་མིན་པའི་ཚོགས་པ་དང་། བོད་དོན་རྒྱབ་སྐྱོར་བ་མི་གྲངས་ ༡༠༠༠ བརྒལ་བ་མཉམ་འཛོམས་ཐོག་ཐེ་ཝན་རྒྱལ་ས་ཐེ་པེ་གྲོང་ཁྱེར་གྱི་མི་ཚོགས་མང་བའི་ལམ་ཆེན་ཐོག་གཞི་རྒྱ་ཆེ་བའི་རྔམ་སྟོན་ཁྲོམ་སྐོར་ཞིག་གནང་ཡོད།
དེ་ཡང་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་མཛད་སྒོ་འགོ་འཛུགས་གནང་བ་དང་།
བོད་རིགས་དཔའ་བོ་དཔའ་མོ་རྣམས་ལ་གུས་འདུད་དང་གདུང་སེམས་མཉམ་སྐྱེའི་མྱ་ངན་ངག་བཅད་སྐར་མ་གཅིག་རིང་གནང་གྲུབ་རྗེས་མཁན་པོ་དང་དགེ་བཤེས་རྣམ་པས་སྨོན་ལམ་གསུང་འདོན་གྲུབ་མཚམས། བོད་ཀྱི་དགུ་བཅུ་གསུམ་ལས་འགུལ་ཚོགས་པས་རྒྱ་དམར་དམག་དཔུང་གིས་བོད་མིར་ཉེས་རྡུང་བཏང་བའི་འཁྲབ་སྟོན་ཐུང་ངུ་ཞིག་གཟིགས་འབུལ་ཞུས་ཡོད་པ་མ་ཟད། ཐེ་སྡོད་བོད་རིགས་ཚོགས་པ་སོག
ས་ལས་འགུལ་གོ་སྒྲིག་གནང་མཁན་གྱི་སྐུ་ཚབ་རྣམས་དང་། བོད་དོན་རྒྱབ་སྐྱོར་གནང་མཁན་ཐེ་ཝན་གྲོས་ཚོགས་ཀྱི་འཐུས་མི་ལྕམ་གྲན་ཇའེ་རུའུ་ལགས་དང་།ལྕམ་ཡུའུ་མེའེ་ཉུའུ་ལགས། སྐུ་ཞབས་ཏོན་ཁང་དབྱི་ལགས། དེ་བཞིན་དམངས་གཙོ་ཡར་ཐོན་ཚོགས་པའི་དྲུང་ཆེ་གཞོན་པ་སྐུ་ཞབས་ཀའོ་ཅན་ཀྲེ་ལགས། ཀའོ་ཞུང་རྫོང་གི་རྫོང་དཔོན་ཟུར་པ་སྐུ་ཞབས་སུའུ་ཧོན་ཀྲེ། ཐེ་པེ་གྲོང་ཁྱེར་གྲོས་ཚོགས་འཐུས་མི་ལྕམ་ཇན་ཡུས་ཨན་ལགས་དང་ལྕམ་ཞུའུ་ཅཱ་ཆིང་ལགས། གཞན་ཡང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་ནས་གསུང་བཤད་གྲུབ་རྗེས་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཀའ་ཤག་གི་གསུམ་དུས་གསུང་འཕྲིན་སྙིང་བསྡུས་རྒྱ་ཡིག་ཐོག་ཕབ་བསྒྱུར་ཞུས་པ་དེ་སྒྲོགས་སྦྱང་གནང་རྗེས་རྔམ་སྟོན་ཁྲོམ་སྐོར་འགོ་འཛུགས་གནང་ཡོད།
བོད་བསྟན་སྲིད་མི་རིགས་ཆེད་རང་ལུས་མེར་སྲེག་གཏོང་མཁན་རྒྱལ་གཅེས་དཔའ་བོ་དཔའ་མོ་ཉེར་དྲུག་གི་སྐུ་པར་དང་། དེའི་ཁོངས་བོད་མི་ ༡༨ འདས་གྲོངས་ཕྱིན་ཡོད་པ་ཁོང་རྣམས་མཚོན་ཆེད་སྤུར་སྒམ་གྲངས་ ༡༨ ས་སྟེང་དུ་བཞག་སྟེ་སྤུར་སྒམ་རེ་རེའི་ཐོག་བོད་ཀྱི་རྒྱལ་དར་གཡོགས་པ་དང་། མདུན་དུ་དཔའ་བོ་དཔའ་མོ་རྣམས་ཀྱི་སྐུ་པར་སྒྲིག་གཤོམ་བྱས་པ་དང་། རྒྱབ་ཏུ་རྒྱ་ཡིག་ཐོག་རྒྱལ་ཁབ་ཀྱི་དོན་དུ་རང་སྲོག་བློས་བཏང་བའི་མི་ཞེས་གཡས་གཡོན་དུ་འབོད་ཚིག་བཅས་སྦྱར་ཡོད། རྔམ་སྟོན་ཁྲོམ་སྐོར་སུན་ཀྲུང་ཧྲན་དྲན་གསོའི་ཁང་ཆེན་མདུན་སླེབས་སྐབས། ཁྲོམ་སྐོར་ནང་ཞུགས་མཁན་ཡོངས་ནས་ལམ་ཆེན་ཐོག་སྐར་མ་གསུམ་ཉལ་ནས་དཔའ་བོ་དཔའ་མོ་རྣམས་ལ་མྱ་ངན་མཚོན་པར་བྱས་ཤིང་། གྲོས་ཚོགས་འཐུས་མི་ལྕམ་གྲན་ཇའེ་རུའུ་ལགས་དང་། ཐེ་པེ་གྲོང་ཁྱེར་གྲོས་ཚོགས་འཐུས་མི་ལྕམ་ཇན་ཡུས་ཨན་ལགས་ཁྲོམ་སྐོར་འགོ་ནས་མཇུག་བར་མཉམ་དུ་ཕེབས་གནང་ཡོད། ཆུ་ཚོད་གཉིས་ཙམ་གོམ་པ་སྤོས་རྗེས་མཐའ་མ་ཐེ་ཝན་གྱི་ཁང་ཆེན་མཐོ་ཤོས་མདུན་འཛོམས་ནས་ལས་འགུལ་མཇུག་བསྡོམས་གནང་ཡོད། དེ་ཉིན་གསར་འགོད་པ་མང་པོ་སླེབས་ཡོད་པ་དང་། བོད་དོན་ཁྱབ་བསྒྲགས་རྒྱ་ཆེ་བྱུང་ཐུབ་ཡོད་པ་བཅས།
