༢༠༡༢  ཟླ་  ༣ ཚེས་ ༧ རེས་གཟའ་ལྷག་པ།
༄༅། །བོད་རྒྱལ་ལོ་ ༢༡༣༩ རབ་བྱུང་ ༡༧ པའི་ཆོ་འཕྲུལ་ཟླ་བའི་ཚེས་ ༡༤ ཕྱི་ལོ་ ༢༠༡༢ ཟླ་ ༣ ཚེས་ ༧ གཟའ་ཚེས་དགེ་བའི་ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་གངས་ལྗོངས་ས་ལའི་སྨན་ལྗོངས་ཀྱི་ཤར་ངོས་སུ་ཆགས་པའི་མདོ་ཁམས་འབའ་ཐང་གཞིས་བྱེས་སེར་སྐྱ་མི་མང་སྤྱི་མགྲིན་གྱིས་ཇི་ལྟར་སྔོན་ནས་གསོལ་འདེབས་ཞུས་དོན་བཞིན་བཀའ་ཞེས་བཟང་པོ་སྨིན་སྩལ་ཐོབ་པ་ལྟར། སྒ་རྗེ་ཁམས་སྤྲུལ་རིན་པོ་ཆེ་འཇམ་དབྱངས་དོན་འགྲུབ་མཆོག་སྒྲུབ་ཞག་སློབ་དཔོན་དུ་དབུ་བཞུགས་ཐོག་རྣམ་གྲྭ་མཁན་ཟུར་འབྲས་བློ་གླིང་གོ་བོ་བློ་བཟང་བསྟན་འཛིན་མཆོག་དང་། ལཱ་ཁ་རིན་པོ་ཆེ་མཆོག རྣམ་གྲྭ་སློབ་དཔོན་གསུང་ཞབས་རྣམ་པ། བླ་སྤྲུལ་དགེ་བཤེས་སོགས་དགེ་འདུན་ཞལ་གྲངས་ ༡༢༠ སྐོར་ནས་ཐེག་ཆེན་ཆོས་གླིང་ཕོ་བྲང་ནང་ཉིན་གསུམ་རིང་སྒྲོལ་དཀར་ཡིད་བཞིན་འཁོར་ལོའི་སྒོ་ནས་སྐུ་ཚེའི་སྒྲུབ་ཆོག་སྔོན་དུ་གྲུབ་པ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྗེ་བཙུན་སྒྲོལ་དཀར་ཡིད་བཞིན་འཁོར་ལོའི་སྒོ་ནས་མཁའ་ཁྱབ་བསྟན་འགྲོའི་མགོན་དཔུང་དམ་པར་སྐུ་ཚེ་༸ཞབས་པད་བསྐལ་བརྒྱར་བརྟན་པའི་གསོལ་འདེབས་སུ་བརྟན་བཞུགས་རྒྱས་པ་བསྟར་འབུལ་ཞུས་ཡོད་པར་མང་གཙོའི་ཀ་བ་གསུམ་གྱི་མཛད་གཙོ་དཔལ་ལྡན་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ་གཞན།  བཀའ་བློན་ཁྲི་པ་བློ་བཟང་སེང་གེ་མཆོག་གིས་དབུས་བཀའ་བློན་གཞན་རྣམ་པ། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་སྤྱི་འཐུས་རྒྱུན་རྒྱུན་ལས་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ།  ཟུང་དྲུང་ཡན་གྱི་སྲི་ཞུ་བ། དེ་བཞིན་སེར་སྐྱ་མི་མང་ཁྱོན་མི་གྲངས་ ༢༠༠༠ བརྒལ་བ་བཅར་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༥།༣༠ ནས་ ༧ བར་སྐུའི་ཚེ་སྒྲུབ་སྔོན་དུ་བཏང་སྟེ་ཆུ་ཚོད་ ༨ ཐོག་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གི་གཟིམ་ཆུང་ནས་ལཱ་ཁ་རིན་པོ་ཆེ་ངག་དབང་བློ་བཟང་བསྟན་པའི་རྒྱལ་མཚན་མཆོག་དང་། ཟངས་གླིང་མཆོག་སྤྲུལ་རིན་པོ་ཆེ་འཇིགས་མེད་བསྟན་པའི་རྒྱལ་མཚན་རྣམ་གཉིས་ཀྱིས་སྤོས་སྣེས་སྔོན་བསུས་ཏེ་གདན་དྲངས་ཐོག་གཙུག་ལག་ཁང་གི་བཞུགས་ཁྲི་རིན་པོ་ཆེར་༸ཞབས་སོར་འཁོད། ཆུ་ཚོད་ ༨།༣༠ ཐོག་ཞལ་འདོན་དབུ་ཚུགས་རྗེས་བརྟན་བཞུགས་ཀྱི་རྣམ་གྲྭ་མཁན་ཟུར་འབྲས་བློ་གླིང་གོ་བོ་བློ་བཟང་བསྟན་འཛིན་མཆོག་གིས་མཇལ་དར་རྐྱང་འབུལ་ཞུས།  ཆོས་སྤྱོད་ཀྱི་རིམ་པ་རྣམས་གསུང་མུར་གསོལ་ཇ་འབྲལ་སིལ་རིམ་པར་འདེགས་འབུལ་ཞུས། གསོལ་འདེབས་མནྜལ་སྐབས་དབུ་བཞུགས་ཀྱིས་མཎྜལ་ལྗགས་བཤད་གནང་སྐབས་སྦྱིན་བདག་འཐུས་མི་སྐུ་ཚབ་སྐལ་བཟང་རྒྱལ་མཚན་མཆོག་དང་། སྤྱི་འཐུས་སྐལ་བཟང་རྒྱལ་མཚན་རྣམ་གཉིས་ཀྱིས་གཡས་གཡོན་ཚོམ་འདེགས་འབུལ་ཞུས། ལྗགས་བཤད་གནང་ཡོད་པར། རང་རྒྱལ་གཞན་ཕམ་གྱི་འགྲན་རྩོད་ཁོ་ནར་རྩེ་གཅིག་ཏུ་འབད་ཅིང་འབུངས་པའི་སྐྱེ་འགྲོ་ཡོངས་མཐར་ཐུག་བདེ་བའི་ལམ་དུ་འགོད་མཁན་བྱམས་སྙིང་རྗེ་དང་གཞན་ཕན་གྱི་བདག་ཉིད་ཆེན་པོར་སྐུ་ཚེ་༸ཞབས་པད་བསྐལ་བརྒྱར་བརྟན་པ་དང་། ལྷག་པར་དུ་བཙན་འཛུལ་བའི་དབང་བསྒྱུར་འོག་རང་དབང་དང་བདེ་སྐྱིད་ཀྱི་གོ་སྐབས་རྩ་བྲལ་དུ་གྱུར་བའི་གཞིས་ལུས་སྤུན་ཟླ་མི་མང་བྱིངས་དང་། ཡང་སྒོས་ཉེ་བའི་ཆར་སྐུ་སྲོག་རྒྱལ་བསྟན་མི་རིགས་ཀྱི་ཆེད་དུ་བློས་བཏང་ཟིན་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་འདོད་དོན་སླད་དུ་སྐུ་ཚེ་༸ཞབས་པད་བསྐལ་བརྒྱར་བརྟན་པ། འཛམ་གླིང་འདིར་ངོམ་རིང་ཆོག་པའི་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་ཉམས་པ་སོར་ཆུད་དང་མི་ཉམས་གོང་འཕེལ་གྱི་སླད་དུ་སྐུ་ཚེ་༸ཞབས་པད་བསྐལ་བརྒྱར་བརྟན་པ་སོགས་ཀྱི་མཎྜལ་ལྗགས་བཤད་གྲུབ་པ་དང་དབུ་བཞུགས་མཆོག་གིས་ཚོམ་བུ་ཕུལ། དེ་མུར་ཚིག་བསྟུན་གྱིས་སྐུ་རྟེན་དང། གསུང་རྟེན། ཐུགས་རྟེན། བུམ་པ། ཚེ་ཆང། ཚེ་རིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། བཀྲ་ཤིས་རྫས་བརྒྱད་བཅས་ཕུལ་རྗེས་གསར་བཞེངས་༸གོང་ས་ལྔ་པ་ཆེན་པོའི་སྣང་བརྙན་མཐོང་གྲོལ་རིན་པོ་ཆེ་འབུལ་ལམ་ཞུས། དབུ་བཞུགས་མཆོག་མཇལ་ཁ་དང་། སྦྱིན་བདག་མི་འཐུས་ལཱ་ཁ་རིན་པོ་ཆེ་ངག་དབང་བློ་བཟང་བསྟན་པའི་རྒྱལ་མཚན་མཆོག་གིས་མཎྜལ་རྟེན་གསུམ་འདེགས་འབུལ་དང་། བོད་ནས་ཕེབས་པའི་འཐུས་མི་སུམ་ཅུ་ཙམ་ཡོད་པ་རྣམས་ཀྱིས་མཇལ་བཅར་ཞུས། འབུལ་དངོས་རྣམས་སྤྱན་ལམ་དུ་བསྟར། དེ་ནས་༸གོང་ས་མཆོག་གིས་གཞིས་བྱེས་འབའ་ཐང་མི་མང་སོགས་དང་བྲེལ་བའི་བཀའ་སློབ་བཀའ་དྲིན་ཆེ་བ་ཕེབས་རྗེས་༸རྒྱལ་བའི་ཞབས་བརྟན་གསུང་མུར་ཚོགས་དང་ཡོན་འགྱེད་ཧིན་སྒོར་སྟོང་རེ་ཕུལ། དེ་རྗེས་གཏང་རག་མཎྜལ་འདེགས་འབུལ་དང་བོད་ནས་ཕེབས་པའི་རིས་སུ་མ་མཆིས་པའི་དགོན་པ་ཁག་གཅིག་གི་སྐུ་ཚབ་དང་ཕྱོགས་མཐའ་ཁག་གི་འབྲེལ་མཐུད་སྐུ་ཚབ། གདན་ས་ཁག་ནང་ཡོད་པའི་སྦག་ས་ནས་ཕེབས་པའི་དགེ་འདུན་བགྲེས་སོང་ཁག་གཅིག་བཅས་ཀྱིས་མཇལ་བཅར་ཞུས། དེ་ནས་ཚེ་བསྟོད་ཉི་གཞོན་འཆར་ཀ་མ་དང་རིས་མེད་བསྟན་རྒྱས་སྨོན་ལམ་སོགས་གསུང་སྐབས་ཀ་ཁྲི་སྒྲོག མཆོག་གསུམ་ཤིས་བརྗོད་དང་བདེན་ཚིག་སྨོན་ལམ་བཅས་གསུངས་ཏེ་དངོས་གཞིའི་མཛད་སྒོ་ཡོངས་སུ་གྲུབ། ༸གོང་ས་མཆོག་གཙུག་ལག་ཁང་ནས་གཟིམ་ཆུང་དུ་སྤྱན་རྒྱ་སྤོས་སྣེས་གདན་དྲངས་ཏེ་བརྟན་བཞུགས་ལེགས་པར་གྲུབ་ཡོད་པ་བཅས། །