༢༠༡༢ ཟླ་  ༢ ཚེས་ ༢༧ རེས་གཟའ་ཟླ་བ།
༄༅། །ཨོ་སི་ཊོ་ལི་ཡའི་གྲོང་ཁྱེར་སི་ཌེ་ཎིར་དུ་གནས་སྡོད་བོད་མི་རྣམས་ནས་བོད་ནང་གི་བོད་མི་ཚོར་གདུང་སེམས་མཉམ་སྐྱེ་མཚོན་ཆེེད་ཆུ་འབྲུག་ལོའི་ལོ་གསར་དེ་བཞིན་ཆོས་ཕྱོགས་ཀྱི་བྱེད་སྒོ་ཐོག་ནས་སྲུང་བརྩི་ཞུས་འདུག
ཕྱི་ལོ་ ༢༠༡༢ ཟླ་ ༢ ཚེས་ ༢༥ ཉིན་ཨོ་སོ་ཊོ་ལི་ཡའི་སི་ཌེ་ཎིར་བོད་རིགས་མཐུན་ཚོགས་ཀྱི་གོ་སྒྲིག་འོག་སྐུ་མགྲོན་གཙོ་བོ་ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་ཀྱིས་དབུས་བོད་མི་དང་བོད་དོན་རྒྱབ་སྐྱོར་བ། དེ་བཞིན་རྒྱ་བོད་མཛའ་འབྲེལ་ཚོགས་པ་བཅས་ཁྱོན་མི་གྲངས་ ༡༠༠ ལྷན་འཛོམས་ཐོག་རྒྱ་གཞུང་གི་སྲིད་བྱུས་ལ་ཞི་རྒོལ་གནང་སྟེ་རང་ལུས་མེར་སྲེག་གཏོང་མཁན་རྒྱལ་གཅེས་པ་དཔའ་བོ་ཕོ་མོ་འདས་གསོན་རྣམས་ཀྱི་ཆེད་གདུང་སེམས་མཉམ་སྐྱེའི་མཆོད་འབུལ་སྨོན་ལམ་རྒྱ་ཆེ་གནང་ཡོད།
དེ་བཞིན་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་རྒྱ་བོད་འབྲེལ་མཐུད་པ་ཟླ་སྒྲོན་ལགས། རྒྱ་བོད་མཛའ་འབྲེལ་ཚོགས་པའི་གཙོ་འཛིན་ལྕམ་སྐུ་མེལ་ལགས་སོགས་ཀྱིས་བོད་རིགས་མཐུན་ཚོགས་དང་རྒྱ་བོད་མཛའ་འབྲེལ་མཐུན་ཚོགས་གཉིས་ནས་མ་འོངས་པའི་ལས་འགུལ་སྤེལ་ཕྱོགས་ཐོག་བཞུགས་མོལ་ཚོགས་འདུ་ཞིག་ཚོགས་ཡོད།
སྐབས་དེར་རྒྱ་བོད་མཛའ་འབྲེལ་ཚོགས་པའི་གཙོ་འཛིན་གྱིས་གསུང་བཤད་གནང་དོན། ད་ལྟ་ང་ཚོའི་ལས་འགན་དང་ཁ་ཚ་དགོས་གཏུགས་ཀྱིས་བྱེད་འདོད་པ་གཙོ་བོ་ནི་རྒྱ་ནག་གཞུང་ནས་ལོ་རྒྱུས་ཀྱི་སློབ་གསོ་བཏང་དང་གཏོང་མུས་ཡིན་པའི་རྒྱ་རིགས་གཞོན་སྐྱེས་རྣམས་ལ་རྒྱ་བོད་གཉིས་ཀྱི་དངོས་ཡོད་གནས་སྟངས་གང་ཡིན་པ་གསལ་པོ་ཤོད་རྒྱུ་དེ་ཡིན། ངར་ཆ་མཚོན་ན། དེ་སྔོན་སློབ་གསོ་དེའི་འོག་ཚུད་མྱོང་ཡོད་པའི་མི་ཞིག་ཡིན། འོན་ཀྱང་ངས་ད་ལྟ་དངོས་ཡོད་གནས་སྟངས་གང་ཡིན་གསལ་པོ་ཤེས་ཀྱི་ཡོད། དེར་བརྟེན་ང་ཚོས་དངོས་ཡོད་གནས་ཚུལ་དེ་དག་ཁོང་ཚོར་འགྲེལ་བཤད་གསལ་པོ་བརྒྱབ་རྗེས་ལམ་གང་དུ་འགྲོ་མིན་ཁོང་ཚོའི་འདམ་ག་རེད། དེ་བཞིན་རྒྱ་བོད་གཉིས་ཀྱི་དཀའ་ངལ་དང་གནས་སྟངས་རྒྱུས་ལོན་ཆེད་ང་ཚོས་སྲིད་དོན་ཁོ་ན་མ་བཤད་པར་རྒྱ་བོད་རིག་གཞུང་བརྗེ་ལེན་གྱི་ལས་འགུལ་སྤེལ་ཐུབ་ན་ཕྱོགས་གཉིས་ཀར་ཕན་ཐོགས་ཆེན་པོ་ཡོང་ངེས་ཡིན། ཞེས་སོགས་ཀྱི་གསུང་བཤད་གནང་ཡོད།
ཕྱོགས་མཚུངས་བཞུགས་མོལ་ཚོགས་འདུར་གཙོ་བོའི་དོན་ཚན་གསུམ་ཐག་གཅོད་བྱུང་ཡོད་པ་ནི། ༡༽རྒྱ་བོད་མཛའ་འབྲེལ་ཚོགས་པ་བཙུགས་ནས་ད་བར་གཞུང་འབྲེལ་གྱི་དེབ་སྐྱེལ་བྱས་མེད་པ་དེ་བཞིན་དེབ་སྐྱེལ་བྱེད་རྒྱུར་འབད་བརྩོན་བྱ་རྒྱུ།
༢༽རྒྱ་བོད་མཛའ་འབྲེལ་ཚོགས་པའི་དྲ་རྒྱ་བཟོ་རྒྱུར་སྤྱི་མཐུན་གྱིས་ཐག་གཅོད་བྱུང་བ།
༣༽སྤྱིར་བཏང་ཆབ་སྲིད་དང་འབྲེལ་བ་མེད་པའི་ཐོག་ནས་མ་འོངས་པར་བོད་རྒྱ་མི་རིགས་གཉིས་ཀྱི་རིག་གཞུང་འཁྲབ་སྟོན་གོ་སྒྲིག་ཞུ་རྒྱུ་ཡིན་འདུག་པ་བཅས། །