༢༠༡༢ ཟླ་ ༡ ཚེས་ ༢ རེས་གཟའ་ཟླ་བ།
༄༅། །འདི་ག་བོད་ཡིག་ཚན་པའི་གསར་འགོད་པས་ས་གནས་ནས་བཏང་གནས་ནང་འཁོད་དོན། གནས་མཆོག་རྡོ་རྗེ་གདན་དུ་ྋགོང་ས་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་བསྐྱང་ཉེ་དང་སྟབས་བསྟུན་སྨན་རྩིས་ཁང་གིས་སྨན་རྩིས་ཁང་བཙན་བྱོལ་དུ་མི་ལོ་ལྔ་བཅུ་ཕྱིན་པའི་འགྲེམས་སྟོན་ཞིག་མཆོད་རྟེན་གྱི་ཉེ་འགྲམ་དུ་གོ་སྒྲིག་ཞུས་ཡོད་པ་དེ་བཞིན་ཕྱི་ལོ་ ༢༠༡༡ ཟླ་ ༡༢ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༩ པའི་ཐོག་སྐུ་མགྲོན་གཙོ་བོ་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་གྱི་བློན་ཆེན་པདྨ་མཁའ་འགྲོ་མཆོག་གིས་དབུ་འབྱེད་གྲུབ་མཚམས། ནང་དུ་ཕེབས་ཏེ་སྣང་གསལ་ཞལ་ཕྱེ་གནང་རྗེས་གཡུ་ཐོག་སྨོན་ལམ་གསུང་འདོན་གནང༌། དེ་ནས་སྨན་རྩིས་ཁང་གི་དྲུང་ཆེ་ཚེ་རིང་ཕུན་ཚོགས་ལགས་ཀྱིས་འགྲེམས་སྟོན་དང་སྨན་རྩིས་ཁང་གི་ལོ་རྒྱུས་སྙིང་བསྡུས་ཤིག་ངོ་སྤྲོད་ཞུས་གྲུབ་མཚམས་སྐུ་མགྲོན་གཙོ་བོ་མཆོག་དང་ཆོས་རིག་བཀའ་བློན་མཆོག དེ་བཞིན་འཕྲོད་བསྟེན་དྲུང་ཆེ་སོགས་སྐུ་མགྲོན་རྣམས་གཟིགས་སྐོར་དུ་ཕེབས་སྐབས་དྲུང་ཆེས་བློན་ཆེན་སོགས་ལ་འགྲེམས་སྟོན་ངོ་སྤྲོད་ཀྱི་འགྲེལ་བཤད་ཞུས་ཡོད། དེ་རྗེས་བློན་ཆེན་མཆོག་གིས་གསར་འགོད་པའི་དྲི་བར་ལན་འདེབས་གནང་དོན། ང་རང་འདི་གར་སྨན་རྩིས་ཁང་གི་མི་ལོ་ལྔ་བཅུ་ཕྱིན་པའི་འགྲེམས་སྟོན་དབུ་འབྱེད་དུ་ཡོང་རྒྱུ་བྱུང་བ་དགའ་པོ་བྱུང༌། འབྲེལ་ཡོད་ལས་བྱེད་ཀྱིས་ལས་ཀ་ཧ་ཅང་ཡག་པོ་གནང་འདུག སྤྱིར་བཏང་སྤྱི་ཚོགས་ནང་སྐྲན་ནད་སོགས་ཀྱི་ཐོག་ལ་འབྲེལ་ཡོད་ལས་བྱེད་ཀྱིས་ཉམས་ཞིབ་ཡག་པོ་གནང་འདུག་ལ་མ་འོངས་པ་ཡང་དེ་དེ་བཞིན་ཉམས་ཞིབ་མཐར་ཕྱིན་པ་གནང་རྒྱུའི་ངས་རེ་བ་བྱེད་བཞིན་ཡོད་ཅེས་སོགས་འགྲེལ་བརྗོད་གནང་ཡོད། ད་ཐེངས་འགྲེམས་སྟོན་ནང་དབུས་འཛིན་སྐྱོང་སྡེ་ཚན་དང༌། ཡན་ལག་སྤྱི་ཁྱབ་སྡེ་ཚན། སོགས་ཀྱིས་ཐང་ཀ་དང་དེ་བཞིན་སྨན་སྦྱོར། སོགས་ཀྱི་པར་རིགས་སྟོང་ཕྲག་བརྒལ་བ་བཤམས་སྟོན་གནང་འདུག
དེ་བཞིན་བོད་ཀྱི་ཟློས་གར་ཚོགས་པས་དད་ལྡན་ཆོས་ཞུ་བ་རྣམས་ལ་ལྷ་མོ་འཁྲབ་གཞུང་གཙོ་བོར་གྱུར་བའི་འཁྲབ་གཞུང་ཁག་སྟོན་འགོ་ཚུགས་ཡོད་པ་དང་ཕྱི་དྲོ་ཆུ་ཚོད་ ༦ པའི་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་མ་གྷ་ངྷ་མཐོ་སློབ་དང་སྣེ་ལེན་ཁང་དུ་མི་མང་ལ་༼སྐྱེད་མ་ལམ་ནོར་གྱི་སྐྱོ་གདུང་།༽ཞེས་པའི་མྱོས་རྫས་ངན་གོམས་དང་འབྲེལ་བའི་གློག་བརྙན་སྟོན་ཡོད་པ་བཅས། །
