༢༠༡༢ ཟླ་ ༡ ཚེས་ ༢༠ རེས་གཟའ་པ་སངས།
༄༅། །འདི་གར་སུད་སི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡༢ ཚེས་ ༢ ་ཉིན་སུད་སི་སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས་ཨོ་སི་ཊི་རི་ཡ་བོད་རིགས་ཚོགས་པས་༸གོང་ས་མཆོག་གི་སྐུ་པར་འགྲེམས་སྟོན་གོ་སྒྲིག་གནང་བ་དེར་ཕེབས་ཡོད། སྐབས་དེར་བོད་མི་མང་སྤྱི་འཐུས་ཚོགས་གཙོ་མཆོག་དང་ཕྱོགས་བཞུགས་སྤྱི་འཐུས་ཐུབ་བསྟན་དབང་ཆེན་ལགས་རྣམ་གཉིས་ཀྱང་ཕེབས་ཡོད། ཕྱི་ཚེས་ ༤ ནས་ ༦ བར་སྐུ་ཚབ་དོན་གཅོད་ཅེཀ་རྒྱལ་ས་མ་རི་བོར་དུ་འཆར་ལོའི་ཕྱི་ཟླ་ ༥ ནང་༸གོང་ས་མཆོག་ཆིབས་སྒྱུར་བསྐྱང་གཏན་འཁེལ་བ་བཞིན་ཆིབས་སྒྱུར་དང་འབྲེལ་བའི་གྲ་སྒྲིག་ཆེད་ས་གནས་སུ་ཕེབས་ཡོད། ཕྱི་ཚེས་ ༡༠ ནས་ ༡༣ བར་ཅེཀ་རྒྱལ་ས་པ་རག་ཏུ་༸གོང་ས་མཆོག་ཆིབས་སྒྱུར་བསྐྱངས་སྐབས་སྐུ་ཚབ་དོན་གཅོད་ལྷན་བཅར་ཞུས་ཡོད། སྐབས་དེར་ཡུ་རོབ་བོད་རྒྱ་འབྲེལ་མཐུད་པ་བློ་བཟང་ཉི་མ་ལགས་ཀྱང་ཆིབས་ཞབས་སུ་བཅར་ཡོད་པ་མ་ཟད། དེར་རྒྱ་རིགས་མཁས་དབང་ཡང་ཇེན་ལི་ལགས་དང་མཉམ་བོད་རྒྱ་འབྲེལ་ལམ་གཏིང་ཟབ་གཏོང་ཐབས་སྐོར་བཀའ་མོལ་ཞུས་ཡོད། ཕྱི་ཚེས་ ༢༣ ཉིན་ཅེཀ་སྲིད་འཛིན་ཟུར་པ་ཝག་ལེབ་ཧ་ཝལ་མཆོག་འདས་གྲོངས་སུ་གྱུར་བར་བརྟེན། ཁོང་གི་གཞུང་འབྲེལ་མྱ་ངན་མཛད་སྒོར་༸གོང་ས་མཆོག་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་དང་ལྷན་སྐུ་ཚབ་དོན་གཅོད་ལྷན་བཅར་ཞུས་ཡོད། ཕྱི་ཚེས་ ༩ ཉིན་དོན་ཁང་གི་ལས་བྱེད་བསྟན་འཛིན་བསམ་འཕེལ་ལགས་ཀྱིས་ཁེ་ན་ཌའི་གཞུང་ཚབ་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་ཨན་ཌེ་མ་ར་དང་རྒྱ་རིགས་ཚན་པའི་འགན་འཛིན་གཉིས་ཐུག་འཕྲད་ཀྱིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་འགྲེལ་བརྗོད་གནང། དེ་བཞིན་ཕྱི་ཚེས་ ༢ ཉིན་ཡུ་རོབ་བོད་རྒྱ་འབྲེལ་མཐུད་པ་བློ་བཟང་ཉི་མ་ལགས་ཀྱིས་འཇར་མན་རླུང་འཕྲིན་ཁང་གིས་རྒྱ་ནག་གཞུང་ནས་བོད་མིའི་ཐོག་དྲག་གནོན་གྱི་སྲིད་བྱུས་དང་འབྲེལ་བོད་ནང་རང་ལུས་མེར་སྲེག་བཏང་པའི་ཐོག་ཆེད་དོན་དྲི་བར་ཁ་པར་བརྒྱུད་ལན་འདེབས་གནང་ཡོད། ཕྱི་ཚེས་ ༡༠ ཉིན་ཡུ་རོབ་རྒྱ་ཡིག་ཚགས་ཤོག་ཐོག་༸གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་ལོ་ངོ་ ༢༢ འཁོར་བའི་དུས་དྲན་སྐོར་རྩོམ་བྲིས་ཡོོད། ཕྱི་ཚེས་ ༡༦ ཉིན་བློ་བཟང་ཉི་མ་ལགས་ཀྱིས་ཨ་རི་དོན་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་དང་ལྷན་བོད་རྒྱ་གནད་དོན་ཐོག་མ་འོངས་པར་ལས་དོན་ཚགས་ཚུད་གཏོང་ཆེད་ཁ་པར་བརྒྱུད་གྲོས་བསྡུར་གནང་ཡོད་པ་མ་ཟད། ཕྱི་ཚེས་ ༢༠ ཉིན་འཇར་མ་ནིར་གནས་སྡོད་རྒྱ་རིགས་མཁས་དབང་སྐུ་ཞབས་ཝང་ལགས་དང་མཉམ་བོད་རྒྱ་འབྲེལ་ལམ་ཐད་ཟབ་ཟབ་བྱེད་དགོས་སྐོར་ཁ་པར་ཐོག་གྲོས་བསྡུར་གནང་ཡོད། ཕྱོགས་མཚུངས་ཕྱི་ཚེས་ ༢༡ ཉིན་ཕྱི་དྲིལ་བཀའ་བློན་མཆོག་མཉམ་ཞུགས་ཐོག་ཕྱི་དྲིལ་རྒྱ་སྐད་ཚན་པའི་འགན་འཛིན་ཚེ་རིང་ལྷ་མོ་ལགས་དང། ཨོ་ཊི་རི་ཡ་དང་ཨ་རི་དོན་གཅོད་གཉིས་ཀྱི་རྒྱ་རིགས་འབྲེལ་མཐུད་པ་བཅས་ཐུན་མོང་གིས་ལོ་ལྔའི་རིང་ལས་དོན་བྱ་ཕྱོགས་ཐད་གྲོས་བསྡུར་ཞིབ་ཕྲ་གནང་ཡོད་པ་བཅས།།