༢༠༡༢ ཟླ་ ༡ ཚེས་ ༢༣ རེས་གཟའ་ཟླ་བ།
༄༅།། ཕྱི་ལོ་ ༢༠༡༢ ཟླ་ ༡ ཚེས་ ༢༣ ཉིན་རྡ་ས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་འདི་ལོའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ཛ་དྲག་སྐོར་གྱི་སྙན་ཐོ་དེ་བཞིན་གསལ་བསྒྲགས་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༠ ཐོག་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་(TCHRD)གི་འགན་འཛིན་ཚེ་རིང་མཚོ་མོ་ལགས་དང་། འགན་འཛིན་གཞོན་པ་འཇམ་དཔལ་སྨོན་ལམ་ལགས་ཀྱིས་གསར་འགོད་པ་རྣམས་ལྷན་འཛོམས་ཐོག་འཇམ་དཔལ་སྨོན་ལམ་ལགས་ཀྱིས་སྙན་ཐོ་སྒྲོགས་སྦྱང་གནང་བའི་སྙིང་དོན་ནི།   འདི་ལོ་བོད་ནང་འགྲོ་བ་མིའི་ཐོབ་ཐང་ཐད་རྒྱུན་གཏན་མ་ཡིན་པའི་ལོ་ཞིག་བྱུང་སྟེ་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་ཤུགས་ཆེན་བཏང་བ་ལ་བརྟེན་ནས་འུ་ཐུག་བཟོད་བྲལ་གྱི་ལོ་གཅིག་ནང་ཁྱོན་བོད་མི་ ༡༢ ཡིས་རང་ལུས་མེར་སྲེག་བཏང་བའི་ཞི་རྒོལ་བྱུང་ནས་བློ་ཡུལ་ལས་འདས་པ་དང་ཧང་སངས་དགོས་པའི་ལོ་ཞིག་ལ་ངོས་འཛིན་ཞུ་གི་ཡོད། རྒྱལ་སྤྱིའི་སྤྱི་འབངས་འགྲོ་བ་མིའི་ཐོབ་ཐང་དང་། ཆོས་དད་རང་དབང་མུ་མཐུད་དེ་རྡོག་རོལ་གཏོང་བཞིན་པའི་ལོ་ཞིག་དང་། བོད་ཀྱི་བཞུགས་མོལ་ཚོགས་འདུ་ཐེངས་ལྔ་པ་ཟེར་བའི་དགོངས་དོན་གཞིར་བཟུང་བོད་འདི་མཆོངས་བསྐྱོད་ལྟ་བུའི་འཕེལ་རྒྱས་དང་། ཡུན་རིང་བདེ་འགོད་ཞེས་པའི་འོག་བོད་ཀྱི་ས་ཁུལ་མང་པོར་ཁྲིམས་དང་སྒྲིག་གཞི་མང་པོ་ཞིག་བཟོས་ཏེ་ལས་བྱེད་ཁྲི་ ༢ ཙམ་གཤམ་བསྐྱོད་ཀྱིས་ཁྱིམ་ཚང་རེ་བཞིན་བསུན་གཙེའི་ཆོས་དད་རང་དབང་དང་འགྲོ་སྐྱོད་རང་དབང་ལ་དོ་ཕོག་འགྲོ་རྒྱུའི་གནད་དོན་ཚབ་ཆེན་གྱིས་མདོ་སྨད་ཀིརྟི་དགོན་ཁུལ་དང་དཀར་མཛེས་ཁུལ་ལ་གྲྭ་བཙུན་དབུས་པའི་བོད་མི་གང་བྱུང་འཇུ་བཟུང་དང་གར་སོང་ཆ་མེད་གྱུར་པ། བོད་རང་སྐྱོང་ལྗོངས་གཅིག་པུའི་ནང་ཆབ་སྲིད་གཏན་ལྷིངས་ཀྱི་ཚོགས་འདུ་ཐེངས་ ༥ ཙམ་འཚོགས་སྟེ་དམ་བསྒྲགས་གཏིང་ཟབ་ཀྱི་རྒྱུན་གཏན་ཅན་དུ་འགྱུར་རྒྱུ་དང་། ལྷ་ས་གྲོང་ཁྱེར་གཅིག་པུའི་སྲང་ལམ་ཁག་ཏུ་སྤྱི་བདེ་ཉེན་རྟོག་པའི་ས་ཚིགས་ ༡༢༦ ཁ་གནོན་གསར་འཛུགས་དང་བོད་ཀྱི་ས་ཁུལ་ཡོངས་ལ་རྒྱ་སྐྱེད་བྱེད་འཆར་དང་། བོད་རང་སྐྱོང་ལྗོངས་འགོ་ཁྲིད་གསར་པ་ཁྲན་གོ་ཡིས། དོན་ཆེན་དང་དོན་འབྲིང་མི་ཐོན་བྱེད་དགོས་པ་མ་ཟད། དོན་ཆུང་མི་ཐོན་པ་བྱེད་དགོས་པའི་ལས་འཆར་འོག་བོད་མི་མང་པོ་ཞིག་གང་བྱུང་འཇུ་བཟུང་དང་ཉེས་པ་གང་ཡང་མེད་ཀྱང་ཆབ་སྲིད་ཀྱི་དྭོགས་གཞིའི་འོག་ང་ཚོས་འདི་ལོ་གཅིག་པུར་ཤེས་རྟོགས་བྱུང་བར་གཞིགས་ན་ཉུང་མཐར་མི་གྲངས་ ༢༣༠ བརྒལ་བ་ཆབ་སྲིད་ཀྱི་ཉེས་མིང་བཏགས་ཏེ་འཇུ་བཟུང་དང་དེའི་ནང་ནས་བོད་མི་ ༦༡ དུས་བཀག་བཙོན་འཇུག་གི་ཁྲིམས་ཆད་བཅད་ཡོད། ད་ལྟ་བོད་ཀྱི་ས་ཁུལ་ཁྱོན་ཡོངས་ལ་ཆབ་སྲིད་བཙོན་པ་བཙོན་འཇུག་བཀག་སྐྱིལ་བྱས་པ་མི་གྲངས་ ༨༣༠ ལྷག་ཡོད་པ་དང་དེའི་ནང་ནས་བོད་མི་ ༤༠༣ ཙམ་དུས་བཀག་བཙོན་འཇུག་གི་ཁྲིམས་ཆད་བཏང་འདུག དེ་བཞིན་བོད་དེ་ཡུན་རིང་བདེ་འཁོད་དང་འཕུར་མཆོངས་ལྟ་བུའི་འཕེལ་རྒྱས་ཞེས་པའི་ལས་འཆར་འོག་གང་བྱུང་གཏེར་ཁ་སྔོག་འདོན་དང་ཆུ་གློག་ལས་གཞི་ལྕགས་ལམ་བཟོ་རྒྱུ་སོགས་ཀྱི་བོད་མིའི་མངོན་འདོད་དང་མི་འཚམ་པའི་ལས་འཆར་དེ་དག་གི་བོད་མིའི་ས་གནས་ས་ཐོག་གི་ཁོར་ཡུག་གཏོར་བཤིག་བཏང་ཏེ་འཐུང་ཆུར་དཀའ་ངལ་དང་། ལྷག་པར་དུ་སྤྱི་ཚོགས་རིང་ལུགས་གྲོང་གསེབ་གསར་པ་འཛུགས་སྐྲུན།  ཞེས་པས་བོད་མིའི་མི་རབས་ནས་མི་རབས་བར་སྲོལ་རྒྱུན་འཚོ་སྡོད་རང་བཞིན་ལ་བཙན་དབང་བསྒྱུར་བཅོས་ཀྱི་ཕྱིས་འབྱུང་མི་རབས་རྣམས་ལ་ཕུགས་འཕེར་འཚོ་བའི་འཇུག་ཡུལ་མེད་པར་བཟོས་བར་མི་བཟོད་ངོ་རྒོལ་ལ་དྲག་གནོན་གྱི་མེ་མདའ་བརྒྱབ་ཏེ་མི་འགའ་བསད་པ་ཡང་བྱུང་ཡོད། བོད་མིའི་འཚོ་གནས་ཐོག་ནས་ལག་ཤེས་བཟོ་ལས་མང་པོ་རྒྱ་མིས་བདག་བཟུང་རྐྱེན་པས་བོད་མིའི་འཚོ་གནས་ལ་དཀའ་ངལ་ཆེ་ཤོས་ཀྱི་ལོ་ཞིག་དང་།
དེ་བཞིན་ཤེས་ཡོན་ཐོག་ཆ་བཞག་ན་བོད་ཕྲུག་ཚོ་ཆུང་དུས་རྒྱ་མི་དང་དམར་ཤོག་ལ་དགའ་ཞེན་བྱེད་པའི་ཤེས་ཡོན་ཞིག་ལས་བོད་ཀྱི་སྲོལ་རྒྱུན་གྱི་གོམས་སྲོལ་ལྡན་པའི་ཆོས་དང་རིག་གཞུང་གི་དྲི་མ་ཙམ་ཡང་མི་འགོས་པ་བྱེད་རྒྱུ་དང་རྒྱ་གཞུང་གིས་དུས་ཆེན་སྲུང་བརྩི་བྱེད་དགོས་པ་ལ་བོད་མིའི་ཆོས་ཕྱོགས་བྱེད་སྒོ་ཁག་ལ་ཞུགས་མི་ཆོག་སོགས་མི་རིགས་ས་ཁུལ་ནང་མི་རིགས་ཀྱི་སྐད་ཡིག་སྦྱོང་སྤྱོད་སྤེལ་གསུམ་གྱི་རང་དབང་མེད་པར་རྒྱ་མི་རིགས་ཆེན་པོའི་སློབ་གསོ་མ་གཏོགས་མི་རིགས་ཅན་གྱི་སློབ་གསོ་མིན་པར་རྒྱའི་སྐད་ཡིག་གི་སློབ་ཁྲིད་ཡིན་པ་སོགས་སྙིང་དོན་ངོ་སྤྲོད་གནང་རྗེས་གསར་འགོད་པ་རྣམས་ལ་དྲི་བ་དྲིས་ལན་ཡང་གནང་ཡོད་པ་བཅས་སུ།།