༢༠༡༢ ཟླ་ ༡ ཚེས་ ༢༣ རེས་གཟའ་ཟླ་བ།
༄༅། །རྒྱལ་སྤྱིའི་བརྒྱུད་ལམ་ཁག་ནང་གནས་ཚུལ་སྤེལ་གསལ་ལྟར་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འདི་ལོ་ཕྱི་ཟླ་བཞི་པའི་ཚེས་ ༡༨ དང་ ༡༩ བཅས་ཉིན་གྲངས་གཉིས་རིང་ཨ་རིའི་སེན་ཌི་ཨེ་གྷོ་(San Diego)གྲོང་ཁྱེར་དུ་ཆིབས་སྒྱུར་སྐབས་ཁུལ་དེར་རྟེན་གཞི་བྱས་པའི་གཙུག་ལག་སློབ་ཁང་ཁག་གཅིག་གིས་གོ་སྒྲིག་འོག་ཉེ་རིང་མེད་པའི་བྱམས་བརྩེ་(Compassion without Border)ཞེས་པའི་བརྗོད་གཞིའི་ཐོག་ཆེས་མཐོའི་གཙུག་ལག་སློབ་གཉེར་ཁང་གསུམ་གྱི་ནང་དུ་བཀའ་སློབ་བཀའ་དྲིན་ཆེ་བ་བསྩལ་གཏན་འཁེལ་ཡོད།  གནས་ཚུལ་དེའི་སྐོར་སེན་ཌི་ཨེ་གྷོ་གཙུག་ལག་སློབ་གཉེར་ཁང་གི་ངོས་ནས་གསར་འགོད་གསལ་བསྒྲགས་ཤིག་སྤེལ་བའི་ནང་གསལ་ལྟར་ན། སྐབས་དེར་སེན་ཌི་ཨེ་གྷོ་གཙུག་ལག་སློབ་གཉེར་ཁང་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཞི་བདེའི་གཟེངས་རྟགས་(Medal of Peace)ཤིག་འབུལ་གཏན་འཁེལ་ཡོད།
དེ་ཡང་ཆིབས་སྒྱུར་གོ་སྒྲིག་ཚོགས་ཆུང་གི་ཁོངས་སུ་ཡོད་པའི་གཙུག་ལག་སློབ་ཁང་དེའི་འགན་འཛིན་ཇུ་ལི་སུ་ལུ་ཝན་(Julie H. Sullivan) མཆོག་གིས་གསུང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཁུལ་འདིར་ཕེབས་བསུ་ཞུ་རྒྱུར་ང་ཚོས་དགའ་སེམས་ཁོལ་བའི་ངང་གནས་ཡོད་པ་མ་ཟད། སེན་ཌི་ཨེ་གྷོ་གཙུག་ལག་སློབ་ཁང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་སྐུ་ཚེ་ཧྲིལ་པོའི་རིང་རྒྱལ་སྤྱིའི་ནང་ཞི་བདེ་སྐྲུན་རྒྱུའི་མཁས་མཛངས་ཀྱི་མཛད་རྗེས་ལ་ངོས་འཛིན་ཞུ་སླད་ཁོང་ལ་ཞི་བདེའི་གཟེངས་རྟགས་ཤིག་འབུལ་ལམ་ཞུ་རྒྱུར་ང་ཚོས་ཡུན་རིང་ནས་ངང་སྒུག་བྱེད་བཞིན་ཡོད། ཅེས་གསུངས་འདུག དེ་བཞིན་གསར་འགོད་གསལ་བསྒྲགས་གནང་སྐབས་ཆིབས་སྒྱུར་གོ་སྒྲིག་ཚོགས་ཆུང་གི་གཙོ་འཛིན་བསྟན་འཛིན་དོན་ལྡན་ལགས་ཀྱིས་གསུང་དོན། ཐེངས་འདིའི་ཆིབས་སྒྱུར་གྱི་མཛད་རིམ་ནི་ལོ་རྒྱུས་ཐོག་དོན་སྙིང་ལྡན་པ་ཞིག་ཆགས་རྒྱུ་དང། མཛད་རིམ་དེའི་ཐོག་རིས་མེད་ཆོས་ལུགས་འདྲ་མིན་གྱི་མི་སྣ་དང། དེ་བཞིན་ཆོས་ཁས་ལེན་མཁན་དང་མི་ལེན་མཁན་གྱི་མི་སྣ།  མཁས་དབང། ཚན་རིག་པ། སྒྱུ་རྩལ་བ་སོགས་མི་སྣ་འདྲ་མིན་འདུ་འཛོམས་ཀྱིས་ཐུན་མོང་གི་ཡོན་ཏན་ལ་ཕན་ཚུན་གུས་བཀུར་ཞུ་རྒྱུ་མ་ཟད། ལས་རིམ་དེའི་ཐོག་སྤྱི་ཚོགས་འདྲ་མིན་ནས་མི་སྣ་མཉམ་འདུས་ཀྱིས་དེང་སྐབས་འཛམ་གླིང་ནང་ཆེད་དགོས་མཁོར་འགྱུར་བའི་འགྲོ་བ་མིའི་བཟང་སྤྱོད་གོང་འཕེལ་ལ་དོ་སྣང་ཤུགས་ཆེ་ཞུ་རྒྱུ་ཡིན་ཞེས་གསུངས། དེ་བཞིན་གཙོ་འཛིན་གཞོན་པས་༸གོང་ས་མཆོག་གིས་སྐུ་ཚེ་ཧྲིལ་པོར་ཞི་བདེ་དང་འགྲོ་བ་མིའི་ཐོབ་ཐང་ཐོག་ཤར་བསྐྱོད་ཀྱི་སྐུ་ལས་བསྐྱོན་གནང་མཛད་པར་འཛམ་གླིང་ཁྱོན་ཡོངས་ནས་མེས་པོ་དམ་པ་གྷན་དྷི་མཆོག་དང། ཨ་མ་ཊེརེ་ས་དམ་པ་བཅས་ལྟར་ཞི་བདེའི་བང་ཆེན་མཛད་པར་སྔགས་བརྗོད་དང་ཆེ་བསྟོད་ཧ་ཅང་ཞུ་བཞིན་ཡོད་ཅེས་གསུངས།  སྤྱིར་༸གོང་ས་མཆོག་གིས་ཕྱི་ཟླ་ ༤ ནང་ཨ་རིའི་སེན་ཌི་ཨ་གྷོའི་ཁུལ་དུ་ཆིབས་སྒྱུར་སྐབས་ཆེས་མཐོའི་གཙུག་ལག་སློབ་གཉེར་ཁང་དང། གྲོང་ཁྱེར་དེའི་ནང་ཡོད་པའི་ཁེ་ལི་ཕོར་ནི་ཡ་ཆེས་མཐོའི་གཙུག་ལག་སློབ་གཉེར་ཁང་། སེན་ཌི་ཨི་གྷོ་གཞུང་གི་གཙུག་ལག་སློབ་གཉེར་ཁང་བཅས་གཙུག་ལག་སློབ་ཁང་གསུམ་གྱིས་གོ་སྒྲིག་ཐོག་ཕྱི་ཚེས་ ༡༨ དང་ ༡༩ སོ་སོར་གོ་ལའི་གནམ་གཤིས་འགྱུར་ལྡོག་གི་ཤུགས་རྐྱེན་དང། དེ་བཞིན་ཞི་བདེ་དང་དྲང་བདེན་སྐྲུན་ཐབས། དཀའ་ཚེགས་ཅན་གྱི་དུས་སྐབས་འདིར་འཇིག་རྟེན་ཀུན་ཁྱབ་ཀྱི་བཟང་སྤྱོད་ཉམས་ལེན་བྱ་རྒྱུ། ཞེས་སོགས་ཀྱི་བརྗོད་གཞིའི་ཐོག་བཀའ་སློབ་སྩལ་རྒྱུ་མ་ཟད། དེ་བཞིན་སྐབས་དེར་༸གོང་ས་མཆོག་ཆི་ཁ་གྷོ་དང་ལོངྒ་བྷིཆ་ཁུལ་དུ་ཡང་ཆིབས་སྒྱུར་བསྐྱང་རྒྱུ་ཡིན་འདུག་པ་བཅས།།