༢༠༡༡ ཟླ་ ༡༢ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༢ ཚེས་ ༢ ནས་ ༡༡ བར་ཨོ་སི་ཊི་རི་ཡའི་བོད་རིགས་ཚོགས་པའི་གོ་སྒྲིག་འོག ཨོ་སོ་ཊི་རི་ཡའི་རྒྱལ་ས་ཝི་ཡ་ནའི་(Vienna)ནང་གི་(mideaspace)ཞེས་པའི་ཚོགས་ཁང་དུ། ༸གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ ༢༢ འཁོར་བའི་དུས་དྲན་སྲུང་བརྩི་ཞུ་ཆེད་མགོན་པོ་གང་ཉིད་མཆོག་གི་སྐུ་པར་མཐོང་གྲོལ་རིན་པོ་ཆེའི་འགྲེམས་སྟོན་ཞིག་གོ་སྒྲིག་གནང་ཡོད།
དེ་ཡང་གོང་ཚེས་ཉིན་གྱི་ཕྱི་དྲོའི་ཆུ་ཚོད་ ༦ པའི་ཐོག་སྐུ་མགྲོན་གཙོ་བོ་ཨོ་སོ་ཊི་རི་ཡའི་ལྗང་ཁུ་ཚོགས་པའི་གྲོས་ཚོགས་འཐུས་མི་སྐུ་ཞབས་(Dr. wolfgang zing)མཆོག་གིས་སྣང་གསལ་ཞལ་འབྱེད་དང་སྦྲགས། སྐུ་པར་འགྲེམས་སྟོན་གྱི་མཛད་སྒོ་དངོས་སུ་དབུ་འབྱེད་གནང་ཡོད།
གཞན་ཡང་སྐབས་དེར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང། ཡུ་རོབ་སྤྱི་འཐུས་དགེ་བཤེས་ཐུབ་བསྟན་དབང་ཆེན་ལགས། སུད་སི་སྐུ་ཚབ་དོན་གཅོད་ཚེ་བརྟན་བསམ་གྲུབ་ཆོས་སྐྱབས་པ་ལགས་བཅས་ཀྱང་ཕེབས་ཡོད། འགྲེམས་སྟོན་ནང་༸གོང་ས་མཆོག་ཆུང་སྲིད་སྐབས་ཀྱི་སྐུ་དཔར་དང་། དེ་བཞིན་རྒྱལ་ནང་དང་རྒྱལ་སྤྱིའི་ནང་ཆོས་སྲིད་ཀྱི་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་པ་ཁག་གི་སྐུ་དཔར། རྒྱལ་སྤྱིའི་ནང་ཆོས་སྲིད་ཀྱི་དབུ་ཁྲིད་འདྲ་མིན་ཁག་དང་མཇལ་འཕྲད་མཛད་པའི་སྐུ་དཔར་སོགས་ཡོད་འདུག དེ་ཡང་གོ་སྒྲིག་ཚོགས་ཆུང་གིས་ཕྱི་ཚེས་ ༢ ཀྱི་སྔ་དྲོ་ཆུ་ཚོད་ ༡༡ ཐོག་ས་གནས་ཚོགས་ཁང་ནང་གསར་འགོད་གསལ་བསྒྲགས་ཤིག་སྤེལ་སྐབས། ཐེངས་འདིའི་འགྲེམས་སྟོན་བརྒྱུད་ཨོ་སོ་ཊི་རི་ཡ་གཙོ་བོར་གྱུར་པའི་རྒྱལ་སྤྱིའི་མང་ཚོགས་རྣམས་ལ་༸གོང་ས་མཆོག་གི་རླབས་ཆེན་གྱི་མཛད་འཕྲིན་ངོ་སྤྲོད་དང་སྦྲགས།
བོད་མིའི་འཐབ་རྩོད་དྲིལ་བསྒྲགས་ཡོང་ཆེད་ཡིན་སྐོར་འགྲེལ་བརྗོད་གནང་འདུག་པ་མ་ཟད། གསར་འགོད་གསལ་བསྒྲགས་སྤེལ་རྗེས་སྤྱི་འཐུས་ཚོགས་གཙོ་མཆོག་དང་ཡུ་རོབ་སྤྱི་འཐུས་མཆོག སྐུ་ཚབ་དོན་གཅོད། ཨོ་སི་ཊི་རི་ཡ་ས་གནས་བོད་རིགས་མཐུན་ཚོགས་ཀྱི་རྒྱུན་ལས་བཅས་ནས་ཀྱང་མཉམ་ཞུགས་གནང་སྟེ་བོད་རིགས་མཐུན་ཚོགས་ཀྱི་ད་ལྟ་དང་འབྱུང་འགྱུར་གྱི་ལས་དོན་སྒྲུབ་ཕྱོགས། ཚོགས་པའི་ངོ་བོ་སྲ་བརྟན་ཆེད་གོ་བསྡུར་གནང་ཡོད།
ཕྱི་ཚེས་ ༣ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག སྤྱི་འཐུས་ཚོགས་གཙོ་མཆོག ཡུ་རོབ་སྤྱི་འཐུས། སྐུ་ཚབ་དོན་གཅོད་བཅས་ཀྱིས་གསུང་བཤད་གནང་ཡོད། སྐབས་དེར་སྐུ་ཚབ་དོན་གཅོད་ཀྱིས་རྒྱལ་གཅེས་དཔྱ་དངུལ་དང་འབྲེལ་བ་སོགས་ཀྱི་སྐོར་གསུང་བཤད་གནང་བ་མ་ཟད། སྤྱི་འཐུས་ཚོགས་གཙོ་མཆོག་གིས་ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་རྗེས། བོད་མིའི་སྒྲིག་འཛུགས་ཀྱི་རྣམ་པར་འཕོ་འགྱུར་ཇི་བྱུང་དང། རྒྱལ་སྤྱིའི་ནང་དེང་སྐབས་བོད་མི་ཚོའི་འཐབ་རྩོད་ལ་རྒྱབ་སྐྱོར་གྱི་རྣམ་པ་ཇི་འདྲ་ཡོད་མེད་སོགས་ཀྱི་སྐོར་ལ་གསུང་བཤད་གནང། ཕྱོགས་མཚུངས་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་བོད་རིགས་མཐུན་ཚོགས་དང་། དེ་མིན་མི་མང་གི་དཀའ་ངལ་ཇི་ལྟར་སེལ་དགོས་མིན་སོགས་ཀྱི་ཐོག་ལམ་སྟོན་གསུང་བཤད་གནང་ཡོད་པ་བཅས།།
