༢༠༡༡ ཟླ་ ༡༢ ཚེས་ ༡ རེས་གཟའ་ཕུར་བུ།
༄༅། ཕྱི་ལོ་ ༢༠༡༡ ཟླ་ ༡༢ ཚེས་ ༡ ཉིན་རྡ་ས་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་འཕྲོད་བསྟེན་ལས་ཁུངས་ཀྱིས་གོ་སྒྲིག་ཐོག་འཛམ་གླིང་གཉན་ནད་རེག་དུག་ཉིན་མོ་སྲུང་བརྩི་ཞུས་པ་དང་སྟབས་བསྟུན་སྲི་ཞུ་བའི་ལས་བྱེད་ཡོངས་ལ་གཉན་ནད་རེག་དུག་སྐོར་ལ་གོ་རྟོགས་ཡོང་ཆེད་ལས་འགུལ་ཞིག་སྤེལ་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པའི་ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་དབུས་བོད་མི་མང་སྤྱི་འཐུས་དང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། འཕྲོད་བསྟེན་དྲུང་ཆེ་ཕ་ཟུར་དབང་ཕྱུག་ལགས། དབུས་སྨན་རྩིས་ཁང་གི་སྨན་རམས་པ་བསོད་ནམས་སྒྲོལ་མ་ལགས། ཕྱི་ལུགས་སྨན་པ་བསོད་ནམས་དོན་གྲུབ་ལགས། གཉན་ནད་རེག་དུག་ནད་པ་བློ་བཟང་དམ་ཆོས་ལགས། བོད་མི་མང་སྤྱི་འཐུས་རྒྱུན་ལས་ཁག་གཅིག་དང་། ལྷན་ཁང་ཁག་གི་དྲུང་ཆེ་ཆུང་གིས་གཙོས་སྲི་ཞུའི་ལས་བྱེད་ཡོངས་ལྷན་འཛོམས་ཐོག་འཕྲོད་བསྟེན་བཀའ་བློན་མཆོག་གིས་འཛམ་གླིང་གཉན་ནད་རེག་དུག་གི་ཉིན་མོ་དང་འབྲེལ་བའི་གསུང་བཤད་གནང་རྗེས་དབུས་སྨན་རྩིས་ཁང་གི་སྨན་རམས་པ་བསོད་ནམས་སྒྲོལ་མ་ལགས་ཀྱིས་བོད་ལུགས་གསོ་རིག་གཞུང་ལུགས་ནས་གཉན་ནད་རེག་དུག་གི་རྒྱུ་རྐྱེན་དང་འབྲེལ་ཟས་སྤྱོད་བསྟེན་སྟངས་སོགས་ངོ་སྤྲོད་གནང་། དེ་ནས་ཕྱི་ལུགས་སྨན་པ་བསོད་ནམས་དོན་གྲུབ་ལགས་ཀྱིས་ཕྱི་ལུགས་ལྟ་གྲུབ་ཐོག་ནས་གཉན་ནད་རེག་དུག་ནད་གཞི་དེ་འཛམ་གླིང་ཡོངས་ཀྱི་དཀའ་ངལ་ཆེན་པོ་ཞིག་ཡིན་པ་མ་ཟད་། ནད་འབུ་དེའི་ངོ་བོ་དང་ཁྱབ་གདལ་འགྲོ་ཚུལ་བཅོས་ཐབས་སོགས་ངོ་སྤྲོད་གྲུབ་མཚམས་གཉན་ནད་རེག་དུག་ནད་པ་བློ་བཟང་དམ་ཆོས་ལགས་ཀྱིས་རང་ཉིད་ནད་མནར་སྐབས་ཁོང་བཟའ་ཟླ་གཉིས་ལ་སྤྱི་ཚོགས་ནང་ལྟ་སྣང་དང་མཐོང་ཚུལ་ངན་པའི་འོག་འཚོ་བའི་དཀའ་ངལ་ཅི་རིགས་འཕྲད་པ་སོགས་ཀྱི་སྐོར་རང་ཉིད་ཀྱིས་དངོས་སུ་མྱངས་པའི་ཉམས་མྱོང་རྣམས་ངོ་སྤྲོད་གནང་ཡོད། དེ་རྗེས་འཕྲོད་བསྟེན་འཆར་འགོད་འགན་འཛིན་བསྟན་འཛིན་དབྱིག་གཉེན་ལགས་ཀྱིས་ཐུགས་རྗེ་ཆེ་ཞུས་ཏེ་གཉན་ནད་རེག་དུག་ཉིན་མོ་སྲུང་བརྩི་དང་གོ་རྟོགས་སྤེལ་བའི་འདུ་འཛོམས་གྲོལ། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་རྡ་ས་མེག་གྷན་ས་གནས་ཁག་གསུམ་ཙམ་ལ་གཉན་ནད་རེག་དུག་གི་ནད་གཞིའི་འདིའི་སྐོར་གོ་རྟོགས་དང་འབྲེལ་བོད་ཀྱི་གཞོན་སྐྱེས་གཏམ་བརྗོད་ཚོགས་པས་མང་ཚོགས་རྣམས་ནས་གཉན་ནད་རེག་དུག་སྐོར་ལ་གོ་རྟོགས་ཡོང་ཆེད་གཏམ་བརྗོད་ལམ་ནས་ལས་འགུལ་ཞིག་ཀྱང་སྤེལ་ཡོད་པ་བཅས། །