༢༠༡༡ ཟླ་ ༡༢ ཚེས་ ༡༧ རེས་གཟའ་སྤེན་པ།

༄༅། །ཕྱི་ལོ་ ༢༠༡༡ ཟླ་ ༡༠ ཚེས་ ༧ ཉིན་ཕྱི༝་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་གསར་འགོད་བསྒྲགས་གཏམ་ཞིག་སྤེལ་སྐབས་དབྱིན་ཇིའི་གྲོས་ཚོགས་ཀྱི་འཐུས་མི་སྐུ་ཞབས་ས་ཡི་མོན་ཧུ་ཇེ་སི་(Simon Hughes)མཆོག་གིས་དབུ་ཁྲིད་པའི་དབྱིན་ཡུལ་གྲོས་ཚོགས་ཀྱི་འཐུས་མི་སྐུ་ཞབས་ཕེ་བི་ཡན་ཧེ་མིལ་ཊོན་(Fabian Hamilton)མཆོག་དང་། སྐུ་ཞབས་ནིག་ཌ་ཀིན་(Nic Dakin)མཆོག སྐུ་ཞབས་གྷེ་རེ་(Gray)མཆོག ཀེ་ཐེ་ཇ་མི་སོན་མཆོག་(Cathy Jaimieson) བཅས་ཀྱིས་དབྱིན་ཇིའི་གྲོས་ཚོགས་སུ་བོད་དོན་སྐོར་གླེང་སློང་གནང་རྒྱུའི་ཁས་ལེན་གནང་བ་བཞིན། ཕྱི་ལོ་ ༢༠༡༡ ཟླ་ ༡༢ ཚེས་ ༧ རེས་གཟའ་ལྷག་པའི་ཉིན་སྐུ་ཞབས་ས་ཡི་མོན་ཧུ་ཇེ་སི་མཆོག་གིས། འདི་ལོ་ཕྱི་ཟླ་ ༣ ནས་བོད་ནང་གི་བོད་མི་དགེ་འདུན་པ་དང་བཙུན་མ་གཙོ་བོར་གྱུར་བའི་བོད་མི་ཚོས་རང་ལུས་མེར་སྲེག་བཏང་བའི་ཛ་དྲག་གི་གནས་སྟངས་མཚམས་འཇོག་ཡོང་ཆེད་རྒྱ་ནག་གཞུང་གིས་བོད་མི་ཚོའི་སྐད་ཡིག་དང་ཆོས་དད། རིག་གཞུང་བཅས་ཀྱི་རང་དབང་ལ་སྲུང་བརྩི་ཞུས་ཐོག་བོད་ཀྱི་གནད་དོན་སེལ་ཆེད་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ལྷན་གྲོས་མོལ་བྱེད་དགོས་པའི་རེ་འདུན་ཤུགས་ཆེ་བཏོན་ཡོད། སྐབས་དེར་ཁོང་གིས་གསུང་དོན། ང་རང་ད་བར་བོད་དུ་འགྲོ་མྱོང་མེད། འོན་ཀྱང་ཕྱི་ལོ་ ༡༩༥༩ ལོར་ང་རང་ཕྲུ་གུ་ཆུང་ཆུང་ཞིག་ཡིན་ནའང་སྐབས་དེར་བོད་ནང་རྒྱ་མིས་བཙན་འཛུལ་བྱས་པ་དང་བོད་མི་ཚོས་རྒྱ་ནག་གི་དབང་བསྒྱུར་ལ་ཞི་བའི་སྒེར་ལངས་བྱས་པ། མཐར་བོད་མི་རྣམས་བཙན་བྱོལ་དུ་བྲོས་སུ་ཡོང་དགོས་ཐུག་པ་སོགས་ཀྱི་གནས་ཚུལ་བྱུང་བ་ངས་གསལ་པོ་དྲན་གྱི་འདུག བོད་དེ་ང་དང་འདྲ་བའི་དབྱིན་ཡུལ་གྱི་ཡུལ་མི་མང་པོར་གལ་ཆེན་པོ་ཆགས་ཡོད་ཅེས་སོགས་ཀྱི་གསུང་བཤད་གནང་ཡོད་པ་བཅས།།