༢༠༡༡ ཟླ་ ༡༢ ཚེས་ ༡ རེས་གཟའ་ཕུར་བུ།
༄༅། །ལོ་ལྟར་ཕྱི་ཟླ་ ༡༢ ཚེས་ ༡ ཉིན་མོ་འདི་ནི་ (World AIDS Day) འཛམ་གླིང་ཨེཊས་ཉིན་མོར་སྲུང་བརྩི་ཞུ་ཡི་ཡོད་ཅིང༌། དེ་རིང་ཕྱི་ལོ་ ༢༠༡༡ ཕྱི་ཟླ་ ༡༢ ཚེས་ ༡ འཛམ་གླིང་ཨེ་ཌས་ཉིན་མོ་འདིར་བོད་མི་ཡོངས་ལ་འཚམས་འདྲི་དང་སྦྲགས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ནད་གཞི་འདིར་ཡོངས་གྲགས་གཉན་ནད་རེག་དུག་ཅེས་འབོད་ཀྱི་ཡོད། ནད་གཞི་འདིའི་ངོ་བོ་ཐོག་མར་ངོ་འཕྲོད་ཕྱི་ལོ་ ༡༩༨༡ ལོར་བྱུང་བ་དང༌། དེ་ནས་ཚན་རིག་བརྒྱུད་བརྟག་དཔྱད་རིམ་པར་བྱས་ཏེ་དེང་སང་འཛམ་གླིང་ནང་ (HIV/AIDS) ཞེས་པའི་མིང་ཚིག་ཐ་སྙད་ཐོག་ནས་ཡོངས་གྲགས་སུ་གཅིག་གྱུར་ངོས་འཛིན་བྱེད་བཞིན་པ་རེད། དེ་རིང་གི་ཉིན་མོར་འཛམ་གླིང་མི་རིགས་ཡོངས་ནས་འགན་འཁུར་མཉམ་རུབ་ཐོག་སྤྱི་ཚོགས་ནང་གཉན་ནད་རེག་དུག་གི་ནད་གཞི་ངོ་སྤྲོད་དང༌། སློབ་གསོ་ལམ་སྟོན། གོ་རྟོགས་ལས་འགུལ་སོགས་སྣ་ཚོགས་སྤེལ་བཞིན་ཡོད་པ་དང༌། གཞུང་སྒེར་གཉིས་ཕྱོགས་ནས་ནད་གཞི་སྔོན་འགོག་དང༌། བཅོས་ཐབས། སྤྱི་ཚོགས་ཁྲོད་ནད་གཞི་དེ་དག་ཁྱབ་གདལ་མི་འགྲོ་བའི་ཆེད་རྒྱལ་སྤྱི་ནས་ཀུན་ཁྱབ་འགན་འཁུར་ཆེན་པོས་གཉན་ནད་རེག་དུག་ཉིན་མོ་སྲུང་བརྩི་ཞུ་བཞིན་ཡོད།
ཕྱི་ལོ་ ༢༠༡༡ ནས་ ༢༠༡༥ བར་གྱི་འཛམ་གླིང་གཉན་ནད་རེག་དུག་ཉིན་མོའི་བརྗོད་གཞི་ནི། ༼ཀླད་ཀོར་མདུན་བསྐྱོད༽ ཨེཌས་ནད་པ་གསར་པ་ཀླད་ཀོར། ནད་པར་དབྱེ་འབྱེད་ཀླད་ཀོར། ཨེཌས་རྐྱེན་འདས་ཀླད་ཀོར། “Getting to Zero: zero new HIV infections, Zero discrimination, Zero AIDS related deaths” བརྗོད་གཞི་འདིའི་བརྒྱུད་ཨེ་ཌས་ནད་པ་རྣམས་ལ་སྨན་བཅོས་མཐུན་རྐྱེན་བཟང་དུ་གཏོང་རྒྱུར་རྒྱལ་ཁབ་སོ་སོའི་གཞུང་ནས་བསྐུལ་བརྡ་གཏོང་གི་ཡོད། ཕྱི་ལོ་ ༡༩༨༨ ལོ་ནས་འགོ་འཛུགས་ཀྱིས་འཛམ་གླིང་ཨེཌས་ཉིན་མོའི་ལས་གཞི་འདིའི་ཆེད་རོགས་དངུལ་ཐབས་འཚོལ་དང༌། སློབ་གསོ་ལམ་སྟོན། ནད་གཞི་འདི་ཐོག་འཛིན་པའི་རྣམ་རྟོག་མེད་པ་བཟོ་རྒྱུ། དེ་བཞིན་གོ་རྟོགས་ལས་འགུལ་སྣ་ཚོགས་ལག་བསྟར་བྱས་ཡོད། འཛམ་གླིང་ཨེ་ཌས་ཉིན་མོ་ལོ་ལྟར་སྲུང་རྩི་ཞུ་དགོས་རྒྱུ་མཚན་གཙོ་བོ་ནི་ (HIV) ནད་འབུ་འདི་བཞིན་མིའི་སྤྱི་ཚོགས་ཁྲོད་ནས་རྩ་མེད་དུ་འགྱུར་མེད་པར་ནད་གཞི་འདིའི་ཐད་ལས་འགུལ་ལག་བསྟར་བྱས་པ་ལས་བྱ་རྒྱུ་མང་བ་བསྡད་ཡོད་པར་བརྟེན་མང་ཚོགས་ལ་དུས་ནས་དུས་སུ་དྲན་བསྐུལ་ཆེད་དུ་དམིགས་པ་ཞིག་ཡིན།
རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱི་ ༢༠༡༠ ལོའི་སྙན་ཐོར་ད་ལྟའི་ཆར་མི་གྲངས་ས་ཡ་ ༣༤ ཙམ་ལ་ (HIV) ནད་འབུ་ཡོད་བཞིན་པ་དང༌། ནད་གཞི་འདི་ཕོག་པའི་ནད་པ་གསར་པ་མི་གྲངས་ས་ཡ་ ༢་༧ བྱེད་བཞིན་པར་གསར་སྐྱེས་ཕྲུ་གུ་གྲངས་ ༣༩༠༠༠༠ ཡོད་ལུགས་འཁོད་འདུག དེ་ཙམ་དུ་མ་ཟད། ནད་གཞི་དེས་ལོ་ལྟར་མི་གྲངས་ས་ཡ་ ༢་༨་རྐྱེན་འདས་སུ་འགྱུར་བཞིན་ཡོད། གཉན་ནད་རེག་དུག་གི་ནད་གཞི་ཕོག་པའི་མི་འབོར་ཕལ་མོ་ཆེ་ཡར་རྒྱས་འགྲོ་བཞིན་པའམ། དབུལ་ཕོངས་རྒྱལ་ཁབ་ནང་ཡོད་པར་ངོས་འཛིན་བྱེད་ཀྱི་ཡོད་རུང༌། ནད་གཞི་འདི་སའི་གོ་ལ་འདིའི་ནང་གནས་བཞིན་ཡོད་པས་ཕོ་མོ་རྒན་གཞོན་དབྱེར་མེད་ལ་ཉེན་ཚབས་ཆེ་བའི་ངོ་བོར་གྱུར་ཡོད། རང་རིགས་རྣམས་ས་གནས་གང་སར་ཁ་ཐོར་དུ་ཡོད་པ་དང༌། འཚོ་བའི་འདུ་འགོད་ཆེད་དབྱར་དགུན་མེད་པར་གྲོང་ཁྱེར་གང་སར་འགྲུལ་བཞུད་བྱེད་བཞིན་པར་སོང༌། རང་རེའི་སྤྱི་ཚོགས་ནང་ནད་གཞི་འདི་མངོན་མེད་དུ་བསླེབ་གཞི་དང༌། ཉེན་ཁ་ཧ་ཅང་ཆེན་པོར་མངོན་བཞིན་ཡོད། ལྷག་པར་ (HIV) ནད་འབུ་འདི་བཞིན་ཐོག་མར་འགོས་ནས་ལོ་བཅུ་ཕྲག་གཅིག་རིང་མངོན་རྟགས་གང་ཡང་མེད་པར་སྡོད་ཀྱི་ཡོད་པར་སོང༌། ནད་འབུ་འགོས་ཡོད་མེད་བརྟག་དཔྱད་མ་བྱས་བར་ནད་རྟགས་གང་ཡང་མངོན་གྱི་མེད་པས་སྤྱི་ཚོགས་ནང་སྣང་མེད་དུ་ཁྱབ་གདལ་འགྲོ་སྟངས་ཀྱི་བརྒྱུད་ལམ་འགའ་ཞིག་ཡོད་པ་ནི། ཉེན་སྲུང་མེད་པའི་འཁྲིག་སྤྱོད་དམ་ལུས་འབྲེལ། ཕན་ཚུན་ཟུངས་ཁྲག་སྤྲོད་རེས། སྨན་ཁབ་བེད་སྤྱོད་མཉམ་དུ་བྱེད་པ། གཟུགས་པོར་གཙག་ཁབ་འདྲ་མིན་མཉམ་སྤྱོད་བྱེད་རེས། ནད་གཞི་འགོས་ཟིན་པའི་ཨ་མ་ནས་མངལ་ཆགས་ཕྲུ་གུ་བཅས་ཕན་ཚུན་གཅིག་ནས་གཅིག་ལ་འགོས་ཀྱི་ཡོད། སྤྱིར་བཏང་ནད་གཞི་འདི་ཡོད་པ་སྔོན་ནས་ཤེས་རྟོགས་བྱུང་ན། སྨན་བཅོས་དུས་ཐོག་འགོ་འཛུགས་ཐུབ་ཚེ་སོ་སོའི་ལོ་ཚད་ཇི་ཡོད་རིང་ཐང་པོ་བྱས་ཏེ་འཚོ་གནས་ཐུབ་ཀྱི་ཡོད་པ་ཕྱི་རྒྱལ་ཉམས་ཞིབ་པ་མང་ཆེ་བས་ངོ་སྤྲོད་བྱེད་ཀྱི་ཡོད། རང་རེ་ཚང་མས་ནད་གཞི་འདི་ཡོད་མེད་བརྟག་དཔྱད་དང་སྔོན་འགོག་གི་ཐབས་ལམ་རྒྱུན་མར་བསྟེན་དགོས་པ་དང༌། ལྷག་པར་ནད་གཞི་ཕོག་ཟིན་པ་ནས་གཞན་ལ་མི་འགོས་པའི་བསམ་ཤེས་འགན་འཁུར་དང་ལེན་དགོས་པ་དང༌། འཕྲོད་བསྟེན་སྨན་ཁང་བརྒྱུད་རྒྱ་གར་གཞུང་གི་གཉན་ནད་རེག་དུག་ལྟེ་གནས་ཁག་ནས་རིམ་པས་བརྟག་དཔྱད་དང༌། སྨན་དུས་ཐོག་ཞུ་ཐུབ་ན་ནད་གཞི་ཇེ་སྡུག་ཏུ་མི་འགྲོ་བ་ཙམ་དུ་མ་ཟད། ལུས་སྟོབས་མ་རྒུད་པར་ཇི་སྲིད་འཚོ་བའི་བར་འཚོ་གནས་ཐུབ་ཀྱི་ཡོད། དེ་བཞིན་གཉན་ནད་རེག་དུག་ནད་པར་མཐོང་ཆུང་དང་ཁྱད་གསོད་དབང་དུ་མ་སོང་བར་བྱམས་བརྩེ་ཐོག་ནས་ངོས་ལེན་གནང་དགོས། མཐའ་དོན་ནད་གཞི་འདི་ལ་འཐབ་འཛིང་བྱ་རྒྱུར་ང་ཚོ་ཚང་མས་ཕྱ་གྲུ་མཉམ་འདེགས་ངེས་གནང་ཡོང་བའི་འབོད་སྐུལ་ནན་པོ་ཞུ་རྒྱུ་བཅས། འཕྲོད་བསྟེན་བཀའ་བློན་གྱིས།
ཕྱི་ལོ་ ༢༠༡༡ ཕྱི་ཟླ་ ༡༢ ཚེས་ ༡ ལ།།
