༢༠༡༡ ཟླ་ ༡༢ ཚེས་ ༣ རེས་གཟའ་སྤེན་པ།
༄༅། །རྒྱ་གར་ནང་རྟེན་གཞི་བྱས་པའི་ཌ་ཡ་ཝ་ཏི་མོ་ཌི་སྒྱུ་རྩལ་དང་ཤེས་ཡོན་ཅན་ཐེབས་རྩ་ཁང་ནས་སྤྱི་ནོར་༸གོང་ས་༸སྐྱབས་མགོན་ཆེན་པ་མཆོག་ལ་ཕྱི་ལོ་ ༢༠༡༡ ལོའི་(Dayawati Modi Award)ཌེ་ཡ་ཝ་ཊི་མོ་ཌེའི་གཟེངས་རྟགས་འབུལ་ལམ་ཞུས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༡ ཟླ་ ༡༢ ཚེས་ ༢ ཉིན་གྱི་ཕྱེད་ཡོལ་ཆུ་ཚོད་ ༢ པའི་ཐོག་ཐེབས་རྩ་ཁང་དེ་ནས་རྒྱ་གར་རྒྱལ་ས་ལྡི་ལིིའི་རྒྱལ་སྤྱིའི་བསྟི་གནས་ཁང་ཞེས་པའི་ཚོགས་ཁང་དུ་མཛད་སྒོ་ཚོགས་ཏེ་མགོན་པོ་གང་ཉིད་མཆོག་ལ་གཟེངས་རྟགས་འབུལ་དེ་འབུལ་ལམ་ཞུས་ཡོད། སྐབས་དེར་མཛད་སྒོར་ཌ་ཡ་ཝ་ཏི་མོ་ཌི་ཐེབས་རྩའི་འགན་འཛིན་(Satish Kumar Modi)མཆོག་གིས་གསུང་བཤད་གནང་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་འཛམ་གླིང་ཡོངས་ལ་ཞི་བདེ་དང་བཟོད་བསྲན། སྤྱི་དམངས་ཀྱི་ཐོབ་ཐང་གོང་འཕེལ་གཏོང་ཐབས། དེ་བཞིན་སྤྱི་ཚོགས་བདེ་དོན་ཆེད་སྐུ་ཚེ་ཧྲིལ་པོ་མཛད་འཕྲིན་རྒྱ་ཆེ་བསྐྱངས་དང་སྐྱོང་བཞིན་པར་རྗེས་སུ་ཡི་རང་ཞུ་ཆེད་གཟེངས་རྟགས་འདི་༸གོང་ས་ཏཱ་ལའི་བླ་མ་མཆོག་ལ་འབུལ་ལམ་ཞུ་རྒྱུ་བྱུང་བ་དེ་ནི་ང་ཚོ་ཌ་ཡ་ཝ་ཏི་མོ་ཌིའི་རིག་གཞུང་ཐེབས་རྩ་ཁང་གི་གཟི་བརྗིད་ཡིན། ཞེས་སོགས་ཀྱི་གསུང་བཤད་གནང་ཡོད།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོར་ཕེབས་པའི་སྐུ་མགྲོན་དང་མང་ཚོགས་ལ་བཀའ་སློབ་སྩལ་དོན། ངོས་ལ་ཌ་ཡ་ཝ་ཏི་མོ་ཌིའི་ཐེབས་རྩ་ཁང་ནས་གཟེངས་རྟགས་འདི་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོ་འགྲོ་བ་མིའི་རིགས་ཡིན་པའི་ཆ་ནས་བྱམས་བརྩེ་ལྡན་པའི་མི་ཞིག་བྱེད་དགོས། སྤྱི་ཚོགས་ཁྲོད་ཤེས་ཡོན་སློབ་སྦྱོང་དང་ཉམ་ཐག་དབུལ་ཕོངས་ལ་རོགས་རམ་བྱས་ཏེ་ཞི་བདེ་དང་མཛའ་བརྩེ་ལྡན་པའི་འཛམ་གླིང་ཞིག་བསྐྲུན་ཐབས་བྱེད་དགོས། ཞེས་བཀའ་སློབ་ཕེབས་ཡོད། ལྷག་པར་༸གོང་ས་མཆོག་གིས་བུད་མེད་ཀྱི་ནུས་པའི་སྟོབས་ཤུགས་ཞེས་པའི་བརྗོད་གཞི་དང་འབྲེལ་བའི་ཐོག་བཀའ་སློབ་སྩལ་དོན། བྱམས་བརྩེ་དང་ལྡན་པའི་སྤྱི་ཚོགས་ཤིག་བསྐྲུན་ཐབས་སུ་བུད་མེད་ཚོར་རང་བཞིན་ལྷན་སྐྱེས་ཀྱི་ནུས་པ་ཡོད་པ་མ་ཟད། སྐྱེས་པ་ལས་བུད་མེད་བྱམས་བརྩེ་ཆེ་བ་ཡོད། དེང་སྐབས་འཛམ་གླིང་ནང་བུད་མེད་ཀྱི་འགོ་ཁྲིད་འཕེལ་རྒྱས་འགྲོ་མུས་ཡིན། སྤྱིར་བཏང་སྐྱེས་པ་ལས་བུད་མེད་ཀྱི་འགོ་ཁྲིད་ཉེན་ཁ་ཆུང་བ་ཡོད། རྒྱ་གར་གྱི་མི་མང་ཚོས་སྤྱི་ཚོགས་ནང་ལྐོ་ཟ་རུལ་སུངས་མེད་པ་བཟོ་ཐབས་སུ་དོ་སྣང་ཆེ་ཙམ་བྱེད་དགོས་པ་ལས་ལྐོག་ཟ་རུལ་སུངས་ཀྱི་དོན་རྐྱེན་དེ་དག་མི་ཚེའི་ཆ་ཤས་ལྟ་བུར་ངོས་འཛིན་བྱས་ན་ནོར་འཁྲུལ་རེད། དེར་བརྟེན་ཉེ་ལམ་ཨ་ན་ཧ་ཛ་རིས་སྣེ་ཁྲིད་བྱས་པའི་ལྐོག་ཟ་རུལ་སུངས་མེད་པ་བཟོ་ཐབས་ཀྱི་ལས་འགུལ་དེར་ངོས་ཀྱིས་རྒྱབ་སྐྱོར་བྱེད་བཞིན་ཡོད། དུས་རབས་དེ་བཞིན་གཞོན་སྐྱེས་ཀྱི་དུས་རབས་ཤིག་ཡིན་པར་བརྟེན། རྒྱ་གར་གྱི་གཞོན་སྐྱེས་ཕོ་མོ་ཚོས་རང་ཉིད་ཀྱི་རྒྱལ་ཁབ་ཡག་པོ་ཡོང་ཆེད་འགན་ཁུར་མང་ཙམ་ལེན་དགོས། ལྷག་པར་རྒྱ་གར་གྱི་གཞོན་སྐྱེས་བུད་མེད་ཚོས་རྒྱལ་ཁབ་དང་ཁྱིམ་ཚང་གཉིས་ཀའི་ནང་འགན་ཁུར་བླང་སྟེ་རྒྱལ་ཁབ་ནང་བྱམས་སྙིང་རྗེ་ལྡན་པའི་སྤྱི་ཚོགས་ཤིག་བསྐྲུན་ཐབས་ཆེད་འབད་བརྩོན་གང་ཐུབ་བྱེད་དགོས། ཞེས་སོགས་ཀྱི་བཀའ་སློབ་སྩལ་ཡོད།
སྤྱིར་བཏང་ཌ་ཡ་ཝ་ཏི་མོ་ཌི་ཞེས་པའི་གཟེངས་རྟགས་དེ་ནི་ཞིང་གཤེགས་ལྕམ་སྐུ་རའེ་སྦ་ཧ་རྡུར་གུ་ཇར་མལ་མོ་ཌིའི་རྗེས་དྲན་དུ་ཐོག་མར་ཕྱི་ལོ་ ༡༩༩༤ ལོར་གནང་འགོ་བཙུགས་པ་ཞིག་ཡིན་འདུག ཞིང་གཤེགས་ལྕམ་སྐུ་དེ་ཉིད་ནི་སྐུ་འཚོ་བཞུགས་སྐབས་རྒྱ་གར་གྱི་སྤྱི་ཚོགས་ནང་ཤེས་ཡོན་གོང་འཕེལ་ཐད་ལས་དོན་ཤུགས་ཆེ་སྤེལ་གནང་མཁན་ཞིག་དང་སྟོང་ཕོད་ཅན་གྱི་བུད་མེད་གཅིག་ཡིན་འདུག
གཟེངས་རྟགས་དེ་བཞེས་མཁན་གྲགས་ཅན་མི་སྣ་མང་དག་ཅིག་བྱུང་བ་ཡོད་པའི་ཁོངས་ནས་རྒྱ་གར་ནང་ཉམ་ཐག་མགོན་མེེད་རྣམས་ལ་རོགས་རམ་ཤུགས་ཆེ་གནང་མཁན་བྱམས་བརྩེའི་བདག་ཉིད་ཅན་ཡི་ཤུ་ཨ་མ་ཊེ་རེ་ས་(Mother Teresa)དམ་པ་དེ་ཉིད་ལ་ཡང་ཕུལ་མྱོང་ཡོད་པ་བཅས། །