༢༠༡༡ ཟླ་ ༡༡ ཚེས་ ༡༨ རེས་གཟའ་པ་སངས།
༄༅།།  འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། རྒྱ་ནག་གཞུང་གི་བོད་ནང་ཆོས་དད་རང་མོས་གཙོས་འགྲོ་བ་མིའི་ཐོབ་ཐང་སོགས་ལ་རྡོག་རོལ་བཏང་དང་གཏོང་བཞིན་པར་བརྟེན། བོད་མི་ཚོས་བོད་ལ་རང་དབང་དང་ཆོས་དད་རང་མོས་དགོས།  ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་འདྲེན་ཞུ་དགོས་སོགས་ཀྱི་སྐད་འབོད་གནང་བར། རྒྱ་གཞུང་གིས་གདུག་རྩུབ་མནར་གཅོད་ཚད་མེད་བཏང་རྐྱེན་འདི་ལོ་ཕྱི་ཟླ་   ༣   ཚེས་ ༡༤  ཉིན་ཀིརྟི་དགོན་པའི་དགེ་འདུན་པ་ཕུན་ཚོགས་ལགས་ཀྱིས་བོད་ཀྱི་བདེན་དོན་ཆེད་སྐུ་ལུས་མེར་སྲེག་བཏང་བ་དང་།  དེ་རྗེས་རྔ་པ་ཀིརྟི་དགོན་པའི་དགེ་འདུན་པས་གཙོས་རྔ་པ་ཁུལ་གྱི་ན་གཞོན་དང་བཙུན་མ། དཀར་མཛེས་ཁུལ་གྱི་གྲྭ་བཙུན་བཅས་བསྡོམས་མི་གྲངས་ ༡༡ བོད་ཀྱི་བསྟན་སྲིད་ཆེད་སྐུ་ལུས་མེར་སྲེག་བཏང་བར་སྐུ་ཚབ་དོན་གཅོད་ལས་ཁུངས་ནས་ཨོ་སི་ཊོ་ལི་ཡའི་གཞུང་དང་གྲོས་ཚོགས།  བོད་དོན་རྒྱབ་སྐྱོར་ཚོགས་པ་སོགས་ལ་བོད་ནང་གི་ཛ་དྲག་གནས་སྟངས་སྐོར་སྙན་སེང་དང་རྒྱབ་སྐྱོར་ཡོང་བའི་འབོད་སྐུལ་རིམ་ཞུས་ལྟར། ཉེ་སྔོན་ཨོ་སི་ཊོ་ལི་ཡ་གཞུང་དང་ལྗང་གུ་ཚོགས་པ།  གྲོས་ཚོགས་གོང་འོག་གི་ཚོགས་མི་བཅས་ནས་བོད་ནང་གི་ཛ་དྲག་གནས་སྟངས་ཐོག་གླེང་སློང་གནང་བ་མ་ཟད། རྒྱ་ནག་གཞུང་ནས་བོད་ནང་འགྲོ་བ་མིའི་ཐོབ་ཐང་ལ་བརྩི་སྲུང་དགོས་པའི་འབོད་བསྐུལ་ཞུས་ཡོད་པ་རེད། སླར་ཡང་ཕྱི་ཟླ་  ༡༡  ཚེས་  ༡༤  ཉིན་ཨོ་སི་ཊོ་ལི་ཡའི་གྲོས་ཚོགས་གོང་འོག་གཉིས་ཀྱི་ཕྱི་སྲིད་དང་། སྲུང་སྐྱོབས། ཚོང་འབྲེལ་བཅས་ཀྱི་ཚོགས་ཆུང་གི་ཚོགས་གཙོ་སྐུ་ཞབས་མལ་ཀེལ་ཌེན་བི་ Michael  Danby མཆོག་དང་འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་སྐུ་ཞབས་ལོའ་རི་ཕར་གུ་སེན་ Laurie Ferguson རྣམ་གཉིས་ནས་ཡོངས་གྲགས་ཐོག་གསལ་བསྒྲགས་ཤིག་སྤེལ་ཏེ་རྒྱ་ནག་གཞུང་ནས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་བརྩི་སྲུང་དང་། རྔ་པ་ཀིརྟི་དགོན་པའི་དགེ་འདུན་པ་རྣམས་ལ་མནར་གཅོད་གཏོང་རྒྱུ་དེ་མཚམས་འཇོག་དགོས་པའི་རེ་འདུན་བཏོན་ཡོད་པ་བཅས།།