ལྕམ་སྐུ་པི་ལོ་སི་མཆོག་དང་ལྷན།
༢༠༡༡ ཟླ་ ༡༡ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༣ ཉིན་བཀའ་ཁྲི་བློ་བཟང་སེང་གེ་མཆོག་གིས་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སིའི་འགྲོ་བ་མིའི་ཐོབ་ཐང་ལྷན་ཚོགས་སུ་བོད་དོན་ཉན་ཞིབ་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་སྐུའི་ཡང་སྲིད་སྐོར་བཀའ་སློབ་དང་ད་ལྟའི་བོད་ནང་གི་ཛ་དྲག་གནས་སྟངས། བཙན་བྱོལ་བོད་མིའི་མང་གཙོའི་འཕེལ་རིམ། ཊོམ་ལེན་ཊོ་སི་དམ་པ་ཁོང་གིས་༸གོང་ས་མཆོག་དང་བོད་མིར་གདུང་སེམས་མཉམ་སྐྱེའི་རྒྱབ་སྐྱོར་གནང་བར་བཀའ་དྲིན་རྗེས་དྲན། དེ་བཞིན་ཨ་རི་གཞུང་མང་གཉིས་ནས་བོད་མི་ཚོར་ད་བར་སེམས་ཐག་ཉེ་པོས་རྒྱབ་སྐྱོར་གནང་བར་བོད་མི་ཡོངས་ཀྱིས་ཚབ་ཞུས་ཏེ་བཀའ་དྲིན་རྗེས་དྲན་ཞུས་ཡོད།
ཕྱོགས་མཚུངས་སྐབས་དེར་ཀིརྟི་རིན་པོ་ཆེ་མཆོག་གིས་ད་ལྟའི་བོད་མི་གཞོན་སྐྱེས་ཚོས་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་བྱེད་དགོས་པ་དེ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ནང་བཙན་འཛུལ་བྱས་པ་ནས་བཟུང་བོད་མི་སྤྱི་དང་ལྷག་པར་བོད་མདོ་སྨད་རྔ་པའི་ཁུལ་དུ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་ཕྱི་ལོ་ ༡༩༣༥ ལོར་དམར་དམག་རྒྱང་བསྐྱོད་ཆེན་མོའི་སྐབས་རྔ་པའི་ཁུལ་དུ་སླེབས་ཏེ་བོད་མིའི་དགོན་སྡེ་ཁག་གཏོར་བཤིག་བཏང་བ་མ་ཟད། བོད་མི་མང་པོ་དམར་གསོད་བཏང་བ་སོགས་ཀྱི་བྱ་སྤྱོད་ལ་བརྟེན་བོད་མིའི་སེམས་ནང་རྨ་ཁ་ཆེན་པོ་བཟོས་ཡོད། དེ་རྗེས་རྔ་པའི་ཁུལ་དུ་ཕྱི་ལོ་ ༡༩༥༨ ལོར་དམངས་གཙོ་བཅོས་བསྒྱུར་ཟེར་བ་དང་ཕྱི་ལོ་ ༡༩༦༦ ལོར་རིག་གནས་གསར་བརྗེ་སྐབས་རྔ་པའི་ཁུལ་དུ་བོད་མི་མང་པོ་དམར་གསོད་བཏང་བ་དང་།
ཨ་རིའི་གྲོས་ཚོགས་འཐུས་མི་དང་ལྷན།
མུ་གེས་ཤི་བ་སོགས་ཀྱི་དཀའ་ངལ་ཚད་མེད་སྤྲད་དེ་རྨ་ཁ་གཉིས་པ་བཟོས་ཡོད། དེ་རྗེས་ཕྱི་ལོ་ ༡༩༩༨ ལོར་རྒྱ་ནག་གཞུང་གིས་རྔ་པའི་ཁུལ་དུ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་ཏེ་དགོན་སྡེ་ཁག་ནང་ཆོས་དད་རང་དབང་ལ་རྩིས་མེད་རྡོག་རོལ་བཏང་བའི་བྱ་སྤྱོད་སྤེལ་བར་བརྟེན། བོད་མི་ཚོའི་སེམས་ནང་རྨ་ཁ་གསུམ་པ་བཟོས་པ་ལས་བྱུང་བ་ཞིག་ཡིན་སྐོར་ཞིབ་ཕྲ་གསལ་བཤད་གནང། ཉན་ཞིབ་སྐབས་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོའི་ལས་རོགས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་སི་མེཀ་གྷོ་ཝན་(James MCGovern)མཆོག་དང་གྲོས་ཚོགས་འོག་མའི་འཐུས་མི་སྐུ་ཞབས་ཕེ་རེངྐ་ཝུལྤ་(Frank Wolf)མཆོག་གིས་བཀའ་ཁྲི་མཆོག་དང་ཀིརྟི་རིན་པོ་ཆེ་མཆོག་ལ་དགའ་བསུའི་འཚམས་འདྲི་ཞུས།
གཞན་ཡང་དེ་ཉིན་བཀའ་ཁྲི་མཆོག་གིས་ཨ་རིའི་ཕོ་ལོ་རི་ཌ་མངའ་སྡེའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཀོ་རུ་བྷི་ཡོ་(Marco Rubio)མཆོག་དང་གྲོས་ཚོགས་འོག་མའི་འཐུས་མི་སྐུ་ཞབས་སི་ཊིབ་ཅ་བྷོཊ་(Steve Chabot)མཆོག གྲོས་ཚོགས་འོག་མའི་འཐུས་མི་ལྕམ་སྐུ་ནི་ཏ་ལོ་ཝེ་(Nita Lowey)མཆོག་དང་མཇལ་འཕྲད་གནང་ཡོད། སྐབས་དེར་གྲོས་ཚོགས་འོག་མའི་འཐུས་མི་སྐུ་ཞབས་མར་ཀོ་རུ་བྷི་ཡོ་མཆོག་གིས་བོད་དོན་འཐབ་རྩོད་ལ་རྒྱབ་སྐྱོར་བྱེད་ཐུབ་པར་དགའ་སྤོབས་བྱུང་ཚུལ་དང་། བཀའ་ཁྲི་མཆོག་གིས་ཁོང་ལ་མགྲོན་འབོད་ལྟར་རྡ་སར་བཅར་རྒྱུའི་ཁས་ལེན་ཡང་གནང་ཡོད། ཕྱོགས་མཚུངས་གྲོས་ཚོགས་འོག་མའི་འཐུས་མི་སྐུ་ཞབས་སི་ཊིབ་ཅ་བྷོཊ་མཆོག་གིས་བལ་ཡུལ་ཁུལ་གྱི་བོད་མི་ཚོའི་གནས་སྟངས་ཐོག་སེམས་འཚབ་ཡོད་སྐོར་དང་། ཁོང་རང་ཉིད་ཉེ་ལམ་བལ་ཡུལ་ཁུལ་དུ་རྒྱལ་དོན་མཚམས་གཟིགས་ནས་ཕྱིར་འབྱོར་འཕྲལ་ཡིན་འདུག ཁོང་ནི་དཀྱིལ་ཤར་དང་ལྷོ་ཨེ་ཤི་ཡའི་ཚོགས་ཆུང་གི་ཚོགས་གཙོ་ཡིན་འདུག དེ་བཞིན་གྲོས་ཚོགས་འོག་མའི་འཐུས་མི་ལྕམ་སྐུ་ནི་ཏ་ལོ་ཝེ་མཆོག་དང་མཇལ་འཕྲད་སྐབས་རྡ་སར་མགྲོན་འབོད་ཞུས་ཡོད། གཞན་ཡང་གྲོས་ཚོགས་འོག་མའི་འཐུས་མི་སྐུ་ཞབས་ཕེ་རེངྐ་ཝུལྤ་མཆོག་གིས་རྒྱ་ནག་གཞུང་གིས་བོད་ནང་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་དེར་སྐྱོན་བརྗོད་ཤུགས་ཆེ་གནང་བ་དང་སྦྲགས། བལ་ཡུལ་གཞུང་གིས་བོད་མི་ ༥༠༠༠ ཙམ་ལ་བལ་ཡུལ་ནས་ཨ་རིར་ཕྱིར་བསྐྱོད་ལག་འཁྱེར་མ་སྤྲད་པར་སྐྱོན་བརྗོད་ཐོག་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་བལ་ཡུལ་གཞུང་ཚབ་པ་འབོད་དེ་བལ་ཡུལ་དུ་གནས་སྡོད་བོད་མི་རྣམས་ལ་བལ་ཡུལ་ནས་ཕྱིར་བསྐྱོ༞ད་ལག་འཁྱེར་སྤྲོད་དགོས་པའི་རེ་འདུན་འདོན་རྒྱུ་ཡིན་སྐོར་གསུངས་པ་མ་ཟད། གལ་ཏེ་བལ་ཡུལ་གཞུང་གིས་ཉན་འཇོག་མ་གནང་ཚེ་ཨ་རིའི་གཞུང་གིས་ཁུལ་དེར་རོགས་རམ་མཚམས་འཇོག་བྱ་རྒྱུའི་ཉན་བརྡ་ཡང་བཏང་ཡོད།
བོད་དོན་ཉན་ཞིབ་གྲུབ་བསྟུན་བཀའ་ཁྲི་མཆོག་གིས་ཨ་རིའི་གྲོས་ཚོགས་འོག་མའི་འཐུས་མི་ལྕམ་སྐུ་ནན་སི་པི་ལོ་སི་(Nancy Pelosi)མཆོག་དང་མཇལ་འཕྲད་གནང་། སྐབས་དེར་༸གོང་ས་མཆོག་དང་བོད་མི་ཚོར་ཧ་ཅང་སེམས་ཐག་ཉེ་བའི་བོད་ཀྱི་གྲོགས་མོ་རྙིང་པ་ལྕམ་སྐུ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་མང་ཚོགས་ཀྱིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་མཛད་པའི་མཛད་རྗེས་ལ་བསྔགས་བརྗོད་ཞུས་ཡོད། དེ་ཉིན་བཀའ་ཁྲིི་མཆོག་གིས་ཨལ་ཇ་ཛི་རའི་གསར་འགྱུར་བརྒྱུད་ལམ་ཁག་གི་གསར་འགོད་པའི་དྲི་བར་ལན་འདེབས་གནང་ཡོད་པ་མ་ཟད། ཨ་རིའི་ཝི་ཨོ་ཨེ་བོད་སྐད་བརྙན་འཕྲིན་གྱི་ཀུན་གླེང་ལས་རིམ་གྱི་ཆེད་དོན་དྲི་བར་ལན་འདེབས་གནང་ཡོད། གཞན་ཡང་བཀའ་ཁྲི་མཆོག་གིས་ཝ་ཤིང་ཊོན་པོས་ཊིའི་གསར་འགོད་ལྷན་ཁང་དུ་མགྲོན་འབོད་ལྟར་ཕེབས་ཏེ་བོད་ནང་རང་ལུས་མེར་སྲེག་བཏང་བའི་དོན་རྐྱེན་དང་འབྲེལ་བའི་ཆེད་རྩོམ་ཞིག་བྲིས་ཡོད་པ་དེ་གསར་ཤོག་ཐོག་ཐོན་ཡོད། དེ་ཉིན་གྱི་ལས་རིམ་མཐའ་མར་བཀའ་ཁྲི་མཆོག་དང་ཀིརྟི་རིན་པོ་ཆེ་མཆོག་ལ་ཝ་ཤིང་ཊོན་ས་གནས་བོད་རིགས་ཚོགས་པས་གསོལ་སྟོན་ཞིག་ཀྱང་བཤམས་ཡོད་པ་བཅས།།
