༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། །རྒྱ་ནག་གཞུང་ཕྱོགས་ནས་བོད་ནང་གི་བོད་མིར་འཛིན་བཞིན་པའི་ནོར་འཁྲུལ་ཅན་གྱི་སྲིད་བྱུས་འོག་བོད་མི་རྣམས་འ་ཆད་འུ་ཐུག་གིས་གནས་སུ་གྱུར་བར་བརྟེན། བོད་མི་གཅིག་རྗེེས་གཉིས་མཐུད་ཀྱིས་རང་ལུས་མེར་སྲེག་བཏང་བའི་གནད་དོན་ཐོག་ཨ་རིའི་གཞུང་ཕྱོགས་ལ་བློ་འཚབ་ཡོད་སྐོར་གསུངས་པ་མ་ཟད། དེ་ལྟ་བུའི་དོན་རྐྱེན་དེ་དག་མ་ཡོང་བའི་ཆེད་བོད་མིའི་གནས་ཡུལ་ས་གནས་ཁག་ཏུ་འཛིན་བཞིན་པའི་ནོར་འཁྲུལ་ཅན་གྱི་སྲིད་བྱུས་དེ་དག་བཅོས་བསྒྱུར་གཏོང་དགོས་པའི་འབོད་སྐུལ་ཞུས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ལོ་འདིའི་ནང་རྒྱ་ནག་གི་བཙན་གནོན་འོག་ཡོད་པའི་བོད་ཤར་ཕྱོགས་ཁུལ་དུ་བོད་མི་ན་གཞོན་ཁག་གཅིག་གིས་རང་ལུས་མེར་སྲེག་བཏང་བའི་གནད་དོན་ཐོག་ཕྱི་ལོ་ ༢༠༡༡ ཟླ་ ༡༡ ཚེས་ ༤ ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ལྕམ་སྐུ་ཝེག་ཊོ་རི་ནོ་ལམ་ལགས་ཀྱིས་གསུང་དོན། ང་ཚོའི་ངོས་ནས་རྒྱ་ནག་གཞུང་ལ་ཞི་རྒོལ་ཆེད་བོད་མིས་རང་ལུས་མེར་སྲེག་གཏོང་བཞིན་པའི་ཐད་སེམས་འཚབ་ཡོད་པ་དེ་བཞིན་རྒྱུན་སྲིང་ནས་གླེང་སློང་བྱ་རྒྱུ་ཙམ་མ་ཟད། རྒྱ་ནག་གཞུང་ལ་ཡང་སྐོར་བསྐྱར་སྐོར་ཐོག་བོད་མི་གནས་ཡུལ་ཁག་ཏུ་བོད་མིར་སྡུག་བསྔལ་ཆེན་པོ་བཟོས་དང་བཟོ་བཞིན་པའི་སྲིད་བྱུས་དེ་དག་ལ་བཟང་ཕྱོགས་ཀྱི་བསྒྱུར་བཅོས་ཤིག་གཏོང་དགོས་པའི་འབོད་སྐུལ་ཞུ་བཞིན་ཡོད།  རྒྱ་ནག་གཞུང་ཕྱོགས་ནས་ས་ཁུལ་དེ་དག་ནང་གསར་འགོད་པ་དང་གཞུང་འབྲེལ་མི་སྣ་མཐོ་གྲས་འགྲོ་བསྐྱོད་བྱེད་འཇུག་དགོས། དེ་བཞིན་ང་ཚོའི་ངོས་ནས་རྒྱ་ནག་གཞུང་ལ་མི་སེར་ཡོངས་ཀྱི་ཐོབ་ཐང་ལ་བརྩི་བཀུར་བྱེད་དགོས་པའི་གནོན་ཤུགས་མུ་མཐུད་དེ་སྤྲོད་བཞིན་ཡོད། རྒྱ་གཞུང་གིས་བོད་མིའི་ས་ཁུལ་ཁག་ཏུ་ཆོས་ཕྱོགས་ཀྱི་བྱེད་སྒོ་ཁག་ལ་གནོད་སྐྱོན་གྱི་སྲིད་བྱུས་དེས་བོད་ཀྱི་ཆོས་དང་རིག་གཞུང་ལ་གཏོར་སྐྱོན་གྱིས་དཀའ་ངལ་འཕྲད་བཞིན་ཡོད་པའི་ཐོག་ཨ་རིའི་གཞུང་ཕྱོགས་ལ་སེམས་འཚབ་ཆེན་པོ་ཡོད། ཅེས་གསུངས་འདུག་པ་བཅས། །