༢༠༡༡ ཟླ་ ༡༡ ཚེས་ ༧ རེས་གཟའ་ཟླ་བ།
༄༅། །སྐབས་བཅུ་བཞི་པའི་བཀའ་ཤག་གིས་དེ་སྔའི་སྐྱེ་ལྡན་སོ་ནམ་གྱི་སྲིད་བྱུས་མུ་ མཐུད་ལག་བསྟར་ཐོག་བོད་མིའི་གཞིས་ཆགས་ཁག་གི་སྐྱེ་ལྡན་སོ་ནམ་གྱི་ཚོགས་ཆེན་ ཐེངས་བརྒྱད་པ་སྦེལ་ཀོབ་གཞིས་ཁོངས་སུ་དབུ་འཛུགས་གནང་འདུག  ཕྱི་ ལོ་ ༢༠༡༡ ཟླ་ ༡༡ ཚེས་ ༦ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་ནང་སྲིད་ལྷན་ཁང་གིས་གོ་སྒྲིག་འོག་ བོད་མིའི་གཞིས་ཆགས་ཁག་གི་སྐྱེ་ལྡན་སོ་ནམ་གྱི་ཚོགས་ཆེན་ཐེངས་བརྒྱད་པ་སྦེལ་ ཀོབ་གཞིས་ཁོངས་ཀྱི་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དུ་དབུ་འཛུགས་ ཀྱི་མཛད་སྐྒོ་ཚོགས་ཡོད། དེ་ཡང་མཛད་སྒོའི་ཐོག་ནང་སྲིད་ བཀའ་བློན་རྒྱ་རི་སྒྲོལ་མ་མཆོག་གིས་སྐབས་བཅུ་བཞི་པའི་བཀའ་ཤག་གིས་ཤུགས་སྣོན་ བསྐྱོན་ས་གཙོ་བོ་དེ་༸གོང་ས་༸སྐྱབས་མགོན་ཆེན་པོ་མཆོག་བོད་དུ་གདན་འདྲེན་ཞུ་ རྒྱུ་དང་བོད་རང་དབང་སླར་གསོ་ཡོང་ཐབས་གནང་རྒྱུ་ཡིན་པ་འགྲེལ་བརྗོད་གནང་བ་དང་ སྦྲགས་གསུང་བཤད་གནང་དོན། བོད་མིའི་སྒྲིག་འཛུགས་ཀྱིས་སོ་ནམ་གྱི་ལས་གཞི་དང་འབྲེལ་བ་ཡོད་པའི་ཐོག་མང་ གཙོའི་འགྲོ་ལུགས་དང་མཐུན་པའི་སྒོ་ནས་བོད་མི་མང་སྤྱི་འཐུས་ལྷན་ཚོགས་ཀྱིས་ གཏན་ལ་ཕབ་པའི་སྐྱེ་ལྡན་སོ་ནམ་ཐོག་ནས་ས་ཞིང་འདེབས་ལས་བྱ་རྒྱུ་ཡིན་པའི་སྲིད་ བྱུས་དེ་དུས་ད་ལྟ་ཡིན་ནའང་འགྱུར་བ་མེད་པར་གནས་ཡོད། དེར་བརྟེན་སྐྱེ་ལྡན་སོ་ནམ་ཐོག་ལ་ཕྱག་ལས་གནང་རྒྱུ་དེ་དག་སྔར་ལྷག་ཚགས་ཚུད་དང་ ལེགས་གྲུབ་ཡོང་བའི་རེ་བ་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད། ཐེངས་འདིའི་མཛད་སྒོར་སྐུ་མགྲོན་དུ་ཕྱོགས་བཞུགས་བོད་མི་མང་སྤྱི་འཐུས་རོང་པོ་ བློ་བཟང་སྙན་གྲགས་ལགས་དང་འཇིགས་མེད་འབྱུང་གནས་ལགས། ནང་སྲིད་དྲུང་ཆེ་དངོས་གྲུབ་རྡོ་རྗེ་ལགས། ཟུང་དྲུང་འཆི་མེད་རིག་འཛིན་ལགས། དེ་བཞིན་བོད་མིའི་གཞིས་ཆགས་ཁག་བརྒྱད་ཀྱི་ས་གནས་འགོ་འཛིན་དང་སོ་ནམ་སློབ་སྟོན་པ། བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ་དང་། སྤྱི་ཁྱབ་འགན་འཛིན་སོགས་ཀྱིས་མཉམ་ཞུགས་གནང་ཡོད་པ་མ་ཟད། བོད་མི་མང་སྤྱི་འཐུས་རོང་པོ་བློ་བཟང་སྙན་གྲགས་ལགས་དང་འཇིགས་མེད་བྱུང་གནས་ ལགས། ནང་སྲིང་དྲུང་ཆེ་བཅས་ཀྱིས་ཀྱང་གསུང་བཤད་གནང་ཡོད། ད་ཐེངས་ཉིན་གསུམ་རིང་འཚོགས་རྒྱུའི་ལྷན་ཚོགས་དེའི་ཐོག་བོད་མིའི་གཞིས་ཆགས་ཁག་ ནང་སྐྱེ་ལྡན་སོ་ནམ་གྱི་ལས་གཞི་ལག་བསྟར་གནང་ཕྱོགས་ཐོག་ཕན་ཚུན་གོ་བསྡུར་གནང་རྒྱུ་ཡིན་པ་འདུག་པ་བཅས། །