༢༠༡༡ ཟླ་ ༡༡ ཚེས་ ༡༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༨།༩།༡༠ བཅས་ཉིན་གྲངས་གསུམ་རིང་ལྷོ་ཨ་ཕི་རི་ཀའི་གྲོས་ཚོགས་འཐུས་མི་སྐུ་ཞབས་མཱ་རིའོ་མཆོག་དང་སྐུ་ཞབས་སི་ཊིབ་མོ་ཀ་ལ་པ་མཆོག་གིས་གྲོས་ཚོགས་སུ་རྒྱ་ནག་གཞུང་གིས་བོད་མི་ཚོར་འཛིན་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་ཆེད་རང་ལུས་མེར་སྲེག་བཏང་བའི་དོན་རྐྱེན་སྐོར་གླེང་ཡོད་པ་མ་ཟད། རང་ལུས་མེར་སྲེག་གཏོང་མཁན་བཙུན་མ་དཔལ་ལྡན་ཆོས་མཚོག་ལགས་ལ་གུད་འདུད་ཞུ་སྐབས་སྐུ་ཞབས་མཱ་རིའོ་ལགས་ཀྱིས་གསུང་དོན། བཙུན་མ་དཔལ་ལྡན་ཆོས་མཚོས་རང་ལུས་མེར་སྲེག་མ་གཏང་གོང་བོད་ལ་རང་དབང་དགོས། ༸གོང་ས་ཏཱ་ལའི་བླ་མ་མཆོག་སྐུ་ཚེ་བརྟན་པ་ཤོག ༸གོང་ས་ཏཱ་ལའི་བླ་མ་བོད་དུ་གདན་ཞུ་དགོས་ཞེས་སྐད་འབོད་བྱས་ཏེ་རང་ལུས་མེར་སྲེག་བཏང་ཡོད། དེར་བརྟེན་ང་ཚོས་རྒྱ་ནག་གཞུང་ལ་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་རྒྱུ་མཚམས་འཇོག་གིས་བོད་མིར་སྨྲ་བརྗོད་དང་ཆོས་དད་རང་དབང་སྤྲོད་དགོས་པའི་ཛ་དྲག་གི་རེ་འདུན་འདོན་དགོས། ཕྱོགས་མཚུངས་བོད་རིགས་གནས་སྡོད་ས་ཁུལ་ཁག་གི་ནང་རྒྱལ་སྤྱིའི་སྐུ་ཚབ་འཐུས་མི་དང་གསར་འགོད་པ་གཏང་སྟེ་དངོས་ཡོད་བོད་མི་ཚོའི་གནས་སྟངས་ཇི་ཡིན་རྟོག་ཞིབ་བྱེད་དགོས་ཞེས་གསུང་འདུག གཞན་ཡང་སྐུ་ཞབས་སི་ཊིབ་མཆོག་གིས་གསུང་དོན། རང་ལུས་མེར་སྲེག་བཏང་བའི་དོན་རྐྱེན་སླར་ཡང་བྱུང་བ་དེས་བོད་མི་ཚོ་དངོས་གནས་འུ་ཐུག་གི་གནས་སྟངས་འོག་གནས་ཡོད་པ་ར་སྤྲོད་གསལ་པོ་ཐུབ། ང་ཚོའི་ཡུལ་དུ་མི་རིགས་དབྱེ་འབྱེ་སྐབས་རྒྱལ་སྤྱིའི་ནུས་ཤུགས་ལ་བརྟེན་ནས་མི་རིགས་དབྱེད་འབྱེད་ཀྱི་ལམ་སྲོལ་མཇུག་སྒྲིལ་ཐུབ་པ་བྱུང་ཡོད། ད་ཆ་ང་ཚོས་རྒྱལ་ཁབ་གཞན་གྱི་རང་ཐག་རང་གཅོད་ཀྱི་ཐོབ་ཐང་རྩོད་མཁན་རྣམས་ལ་རྒྱབ་སྐྱོར་བྱེད་དགོས་ཞེས་སོགས་ཀྱི་གསུང་བཤད་གནང་ཡོད་པ་བཅས།།