༢༠༡༡ ཟླ་ ༡༡ ཚེས་ ༡༨ རེས་གཟའ་པ་སངས།

༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༡༧ ཉིན་ཨ་རིའི་གྲོས་ཚོགས་ཀྱི་ཊོམ་ལེན་ཊོ་སིའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་མི་ཡིན་པ་ཨ་རིའི་གྲོས་ཚོགས་ཀྱི་འཐུས་མི་སྐུ་ཞབས་ཕེ་རེངྐ་ཝུལྤ་ (Frank R.Wolf) མཆོག་དང་ཇེམ་སི་མེཀ་གྷོ་ཝན་མཆོག (James P.McGovern) ཇོ་སེབ་པི་ཊི་ (joseph Pitts) མཆོག་བཅས་ཀྱིས་རྒྱ་ནག་ནང་ཡོད་ཨ་རིའི་གཞུང་ཚབ་པ་སྐུ་ཞབས་གྷེ་རི་ལོཀ་ (Gary Locke) མཆོག་ལ་བོད་ནང་གི་བོད་མི་ཚོའི་དངོས་ཡོད་གནས་སྟངས་ཇི་ཡིན་གསལ་རྟོགས་ཆེད་གཟིགས་སྐོར་དུ་ཕེབས་དགོས་པའི་ཞུ་སྙན་ཞིག་ཕུལ་འདུག  ཞུ་སྙན་དེའི་ནང་ཉེ་ལམ་བཙན་བྱོལ་བོད་མིའི་སྒྲིག་འཛུགས་ཀྱི་བཀའ་ཁྲི་བློ་བཟང་སེང་གེ་མཆོག་དང་ཀིརྟི་རིན་པོ་ཆེ་མཆོག་གཉིས་ཀྱིས་ཨ་རིའི་ཊོམ་ལེན་ཊོ་སིའི་འགྲོ་བ་མིའི་ཐོབ་ཐང་ལྷན་ཁང་དུ་བོད་དོན་ཉན་ཞིབ་སྐབས། གྲོས་ཚོགས་འཐུས་མི་རྣམས་ལ་སེམས་འགུལ་ཐེབས་ཚུལ་དང་། ཉན་ཞིབ་སྐབས་བོད་ནང་དུ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག  བོད་མི་ཚོ་དཀའ་སྡུག་མྱོང་བཞིན་པ་མ་ཟད།  ཉེ་ལམ་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་མ་བྱས་ཐབས་མེད་ཆགས་པའི་གནས་སྟངས་དེའི་འོག་ཨ་རིའི་གཞུང་ཚབ་མཆོག་གིས་བོད་ནང་དུ་གཟིགས་སྐོར་བསྐྱོད་ཐོག  བོད་མི་ཚོར་རྒྱབ་སྐྱོར་གྱི་རྣམ་པ་བསྟན་དགོས་པའི་ཛ་དྲག་གི་འབོད་སྐུལ་ཞུས་ཡོད་པ་མ་ཟད། བོད་མདོ་སྨད་རྔ་པ་ཀིརྟི་དགོན་པའི་ནང་དངོས་ཡོད་གནས་སྟངས་གསལ་རྟོགས་ཆེད་སྐུ་ཚབ་འཐུས་མི་གཏོང་དགོས་པའི་འབོད་སྐུལ་ཡང་ཞུས་ཡོད། ཕྱོགས་མཚུངས་གྲོས་ཚོགས་ཀྱི་འཐུས་མི་གསུམ་གྱིས་ཨ་རིའི་གཞུང་ཚབ་མཆོག་ལ་བོད་ནང་དུ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པའི་སྐོར་གུང་ཁྲན་ཚོགས་པའི་དཔོན་རིགས་མཐོ་གྲས་ཁྲོད་གླེང་དགོས་པའི་འབོད་སྐུལ་ཡང་ཞུས་ཡོད། དེ་བཞིན་གཞུང་ཚབ་མཆོག་ནས་རྒྱ་ནག་གཞུང་ལ་བོད་མི་ཚོར་ཆོས་དད་དང་ཆབ་སྲིད། སྤྱི་ཚོགས། རིག་གཞུང་བཅས་སྲུང་སྐྱོབས་དང་རྒྱུན་འཛིན་བྱ་རྒྱུའི་རང་དབང་སྤྲོད་དགོས་པ་བརྗོད་ཡོད་སྐོར་སོགས་འཁོད་ཡོད།།