༢༠༡༡ ཟླ་ ༡༡ ཚེས་ ༣༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༡༡ ཚེས་ ༢༧ ནས་ ༣༠ བར་ཉིན་གྲངས་བཞིའི་རིང་འཚོགས་བཞིན་པའི་འཛམ་གླིང་ནང་པའི་ལྷན་ཚོགས་སུ་སྒྲུབ་རྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་ཕྱི་ཚེས་ ༢༨ ཉིན་ཐུགས་སྨོན་གྱི་མཚམས་སྦྱོར་དང་སྦྲགས་ཁོར་ཡུག་སྲུང་སྐྱོབ་སྐོར་ལྷན་ཚོགས་ཐོག་གསུང་བཤད་གནང་དོན། རྒྱལ་ས་ལྡི་ལིར་ནང་པའི་ཚོགས་ཆེན་ཚོགས་པའི་སྐབས་འདིར་ཕེབས་པའི་སྐུ་མགྲོན་རྣམ་པ་དང་། མཁས་དབང་རྣམ་པ་ཚོ་ཚང་མར་ཐོག་མར་འཚམས་འདྲིའི་བཀྲིས་བདེ་ལེགས་ཞུ་གི་ཡོད། དེ་རིང་འདིར་ངོས་རང་ལ་ཁོར་ཡུག་དང་འབྲེལ་བའི་སྐོར་ལ་གཏམ་བཤད་བྱ་རྒྱུའི་གོ་སྐབས་བྱུང་བ་རེད། དངོས་གནས་བྱས་ནས་ངོས་ཀྱིས་ཁོར་ཡུག་སྐོར་ལ་དོ་སྣང་བྱས་པ་མ་གཏོགས་ཁོར་ཡུག་གི་ཤེས་བྱ་དང་དེའི་ཐོག་ལ་སྦྱང་བརྩོན་དམིགས་བསལ་གང་ཡང་བྱས་མེད་སྟབས། ཁོར་ཡུག་དང་འབྲེལ་བའི་གནས་ཚུལ་གཏིང་ཟབ་པོ་ཞུ་རྒྱུ་དཀའ་ལས་ཁག་པོ་རེད་སྙམ་གྱི་འདུག འོན་ཀྱང་འདས་པའི་ལོ་ཤས་རིང་ཁོར་ཡུག་ཐོག་དོ་སྣང་བྱས་ཏེ་མང་ཚོགས་ཁྲོད་ཁོར་ཡུག་དང་འབྲེལ་བའི་འབོད་སྐུལ་དང་སོ་སོའི་བསམ་ཚུལ་ཤོད་རྒྱུའི་གོ་སྐབས་རེ་ཟུང་བྱུང་བའི་ཉམས་མྱོང་ཕྲན་བུ་ཡོད་པ་དེ་དག་ག་ཚོད་དྲན་པ་རྣམས་ཞུ་རྒྱུ་ཡིན། ང་ཚོ་མི་བློ་ལྡན་དེ་དག་འཛམ་གླིང་འདིར་བྱུང་ནས་ལོ་ངོ་འབུམ་གཉིས་ཙམ་ཞིག་འགྲོ་གི་ཡོད། འཛམ་གླིང་འདིའི་ཐོག་སྐྱེ་དངོས་རིགས་མང་དག་ཅིག་ཡོད་པའི་ནང་ནས་མི་བློ་ལྡན་དེ་བྱེ་བྲག་པ་ཞིག་ཆགས་ཡོད། འོན་ཀྱང་མི་ལ་ཐུན་མོང་མ་ཡིན་པའི་ཁྱད་ཆོས་དང་རྣམ་དཔྱོད་ཡོད་པར་བརྟེན། ང་ཚོར་ཁོར་ཡུག་ལ་ཕན་གནོད་བསྐྲུན་རྒྱུའི་ནུས་པ་ཡོད། དེར་བརྟེན་འཛམ་གླིང་འདིའི་སའི་གོ་ལའི་སྐྱེ་དངོས་ཀྱི་ལོ་རྒྱུས་ནང་ང་ཚོ་མིའི་རིགས་དེ་སྐྱེ་དངོས་རིགས་ནང་ནས་ནུས་པ་ཆེ་ཤོས་ཆགས་ཡོད། མི་ཁས་ཤིག་གིས་མུ་མཐུད་ངོས་ལེན་བྱེད་ཀྱི་ཡོད་མེད་གང་ལྟར་ཡང་འཛམ་གླིང་འདིའི་ཐོག་དངོས་པོའི་འཕྲུལ་ཆས་ཡར་རྒྱས་དང་། དེ་བཞིན་ཕྱིའི་དངོས་པོ་ཡར་རྒྱས་ཤུགས་ཆེ་འགྲོ་བཞིན་ཡོད་པར་བརྟེན། ཕྱིའི་རང་བྱུང་ཁོར་ཡུག་དང་སྲོག་ཆགས་མང་དག་ཅིག་ལ་དོ་ཕོག་ཤུགས་ཆེན་འགྲོ་གི་ཡོད་པའི་དཔང་རྟགས་གསལ་པོ་ཆགས་ཀྱི་ཡོད། དེ་ལྟ་བུའི་གནོན་སྐྱོན་ཚབས་ཆེན་པོ་དང་མྱུར་པོ་ཡོང་རྒྱུའི་འགོ་འཛུགས་ས་དེ་ཕལ་ཆེར་ལོ་ཉིས་བརྒྱ་ལྔ་བཅུ་ཙམ་གྱི་གོང་ལ་ཡུ་རོབ་སོགས་ཀྱི་ནང་བཟོ་ལས་འཕེལ་རྒྱས་ཕྱིན་པར་བརྟེན་ནས་འགོ་བཙུགས་པ་རེད་ཅེས་བརྗོད་ཆོག་པ་ལྟ་བུ་རེད། སྤྱིར་བཏང་ག་ལེར་ག་ལེར་ཁོར་ཡུག་ལ་འགྱུར་ལྡོག་ཕྱིན་པ་དེ་ལས་ལྡོག་སྟེ་ང་ཚོ་མིའི་རྐྱེན་ལས་བརྟེན་ནས་ཁོར་ཡུག་ལ་འགྱུར་ལྡོག་ཚབས་ཆེན་ཞིག་དང་། དེ་བཞིན་དུས་ཚོད་ཉུང་ཉུང་ཞིག་གི་ནང་ཚད་མྱུར་པོ་ཞིག་འགྲོ་གི་ཡོད། དཔེར་ན།
ཕྱི་ལོ་ ༡༩༥༠ ལོ་ནས་འགོ་བཙུགས་ཏེ་ཁོར་ཡུག་ལ་སྔར་བྱུང་མྱོང་མེད་པའི་འགྱུར་ལྡོག་ཤུགས་ཆེ་ཕྱིན་པར་བརྟེན། འཛམ་གླིང་གི་ས་ཆ་མང་པོ་ཞིག་གི་རླུང་དང་ཆུ་སོགས་ལ་འབག་བཙོག་གི་ཉེན་ཁ་ཆེན་པོ་ཞིག་འཕྲད། དེ་བཞིན་སྔོ་ལྗང་གི་ནགས་ཚལ་མང་དག་ཅིག་གཅོད་འབྲེག་བྱས་ཏེ་རི་དྭགས་སོགས་སྲོག་ཆགས་མང་པོའི་རང་བྱུང་གི་གནས་ཡུལ་དེ་དག་རྩ་མེད་བཏང་བར་བརྟེན། འགྱུར་ལྡོག་ཚབས་ཆེན་ཞིག་ཕྱིན་ཡོད། དེར་བརྟེན་མ་འོངས་པར་སྲོག་ཆགས་གཞན་ཙམ་དུ་མ་ཟད། ང་ཚོ་འགྲོ་མིའི་རིགས་ལ་ཡང་རིམ་བཞིན་གནོད་འཚེ་ཆེན་པོ་ཡོང་རྒྱུའི་ཉེན་ཁ་ཆེན་པོ་ཞིག་ཆགས་ཡོད། ཚན་རིག་ཐོག་ནས་འགྱུར་ལྡོག་གང་འདྲ་ཞིག་འགྲོ་གི་ཡོད་པ་དེ་གནས་ཚུལ་དང་དན་རྟགས་སམ་དཔང་རྟགས་ཚང་མ་ཡོད་པ་རེད། སྔོན་མ་ཡིན་ན་ང་ཚོས་གནས་ཚུལ་ཧ་མ་གོ་བ་དང་མ་ཤེས་པའི་སྐྱོན་ཡོང་གི་ཡོད། ད་ལྟའི་ཆར་མ་ཤེས་པ་དང་ཧ་མ་གོ་བའི་སྐྱོན་དེ་ཕལ་ཆེར་མེད། ད་ལྟ་ང་ཚོར་སྐྱོན་ཆེ་ཤོས་ག་རེ་ཆགས་ཀྱི་ཡོད་དམ་ཞེ་ན། ཤེས་ཀྱང་འགྱུར་བ་མ་བཏང་བ་དང་ལག་ལེན་མ་བསྟར་བའི་སྐྱོན་ཆེན་པོ་ཞིག་ཡོང་གི་ཡོད། ཚང་མས་ཤེས་གསལ་རེད། ཐ་མག་འཐེན་ན་གནོད་སྐྱོན་ག་ཚོད་ཡོད་པ་དེ་ཚན་རིག་པས་ལོ་ངོ་ལྔ་བཅུའི་གོང་ནས་གསལ་བཤད་བྱས་ཟིན་ཡོད། དཔེར་ན། ཐ་མག་འཐེན་ནས་གློ་བར་སྐྲན་ནད་དང་སྙིང་གི་ན་ཚ་སོགས་ནད་རིགས་འདྲ་མིན་ཡོང་གི་ཡོད་པ་གསལ་བཤད་བྱས་ཟིན་ཡོད། ཐ་ན་ཐ་མག་གི་སྒམ་ཆུང་སྟེང་དུ་ཐ་མག་འཐེན་ན་ཉེན་ཁ་ཡོད་པའི་ཉེན་བརྡའི་ཡི་གེ་ཆེན་པོ་བྲིས་པ་དེ་འདྲ་ཡོང་གི་འདུག གང་ལྟར་ཡང་གནས་ཚུལ་ར་སྤྲོད་བྱས་ཡོད་ཀྱང་། ད་དུང་ཐ་མག་འཐེན་རྒྱུའི་གོམས་གཤིས་ཆགས་ཏེ་འགྱུར་མ་བཏང་བའི་གནས་ཚུལ་དེ་འདྲ་མང་པོ་ཡོད། དཔེར་ན། ཉེ་ཆར་ཨ་རིའི་ནང་ཞིབ་འཇུག་བྱེད་སྐབས་ཐ་མག་འཐེན་མཁན་མི་བརྒྱའི་ནང་ནས་མི་དྲུག་མ་གཏོགས་ཐ་མག་རྩ་ནས་གཅོད་རྒྱུའི་ལམ་ལྷོང་མ་བྱུང་བའི་གནས་ཚུལ་གོ་རྒྱུ་འདུག ང་ཚོར་དེས་གནོད་སྐྱོན་གང་འདྲ་ཞིག་ཡོང་གི་ཡོད་པ་དེའི་གནས་ཚུལ་ར་སྤྲོད་ཆ་ཚང་ཞིག་བྱས་ཡོད་ཀྱང་སོ་སོས་འགྱུར་བ་གཏོང་རྒྱུ་མ་འདང་བ་ཟེར་ན་མི་འདུག དངོས་སུ་བླང་དོར་བྱེད་རྒྱུ་མི་འདང་བའི་སྐྱོན་ལ་བརྟེ་ནས་མུ་མཐུད་ནས་ང་ཚོའི་ཀུན་སྤྱོད་དེ་འགྱུར་བ་མེད་པར་གནས་ཀྱི་ཡོད།
འཛམ་གླིང་གི་ནང་པ་གཅིག་པུ་མ་རེད། འཛམ་གླིང་གི་ཆོས་ལུགས་མང་ཆེ་བས་ཕྱིའི་དངོས་པོ་ཁོ་ནར་རྟེན་ན། དོན་དམ་གྱི་བདེ་སྐྱིད་དང་ཞི་བདེ་རག་གི་མེད་པའི་ཡིད་ཆེས་བྱེད་ཀྱི་ཡོད། འོན་ཀྱང་དེང་སྐབས་འཛམ་གླིང་ནང་ཉེར་སྤྱོད་པའི་རིང་ལུགས་དར་ནས་མི་ཚང་མས་ཕྱིའི་དངོས་པོ་ཡར་རྒྱས་དང་ཉེར་སྤྱོད་ག་ཚོད་ཡོད་ནའང། དེ་ཚོད་ཀྱིས་བདེ་སྐྱིད་འཐོབ་རྒྱུའི་ཡིད་ཆེས་དང་རེ་བ་བཅོལ་བཞིན་ཡོད། གང་ལྟར་ཉེར་སྤྱོད་རིང་ལུགས་དེ་ཕལ་ཆེར་ང་ཚོ་དུས་རབས་ཉེར་གཅིག་ནང་གི་ཆོས་ལུགས་ལྟ་བུ་ཆགས་ཏེ་ཚང་མས་དེར་ཡིད་ཆེས་ཆེན་པོ་བྱ་རྒྱུ་ཞིག་ཆགས་ཡོད། དོན་དམ་ལ་དཔེར་ན། ཤིང་སྡོང་ལྟ་བུར་ཆ་བཞག་ན། སྡོང་པོར་ཡལ་འདབ་རྒྱས་པ་དང་དེར་འབྲས་བུ་སྨིན་པ་དེ་དག་གཅིག་པུར་ང་ཚོས་མགོ་འཁོར་ནས་སྡོང་པོ་དེའི་རྩ་བ་བརྟན་པོ་དང་རྩ་བ་རུལ་ཡོད་མེད་ལ་དོ་སྣང་མ་བྱུང་ལྟ་བུ་རེད། གལ་སྲིད་རྩ་བ་རུལ་སོང་ན། ཤིང་སྡོང་དེར་འབྲས་བུ་དང་ལོ་འདབ་ག་ཚོད་ཀྱིས་ཕྱུག་ཀྱང་ཉེན་ཁའི་ནང་ཡོད་པ་ཆགས་ཡོད། དེ་བཞིན་དུས་རབས་ཉེར་གཅིག་ནང་ཕྱིའི་དངོས་པོ་ཡར་རྒྱས་ཕྱིན་པར་བརྟེན་ནས་མི་ཚང་མ་དེར་མགོ་འཁོར་ཏེ་ཡིད་ཚིམས་ནས་བསྡད་པ་ལས་དོན་དམ་ང་ཚོས་སྐྱོན་དང་འཐུས་ཤོར་གང་ནས་འགྲོ་གི་ཡོད་པ་སོགས་ཀྱི་ཐོག་དོ་སྣང་བྱེད་མ་ཐུབ་པའི་གནས་སྟངས་ལྟ་བུ་ཆགས་ཡོད། དེའི་རྒྱུ་མཚན་ལ་བརྟེན་ནས་ད་ལྟའི་དུས་ཚོད་འདིར་ཆོས་ལུགས་སྤྱི་དང་ལྷག་པར་ནང་པ་སངས་རྒྱས་པར་ལས་འགན་ཆེན་པོ་ཞིག་ཡོད་པ་དེ་ནི་མི་ཚང་མས་ཕྱིའི་དངོས་པོ་ཁོ་ནར་ཞེན་ཏེ་དེ་ནས་བདེ་སྐྱིད་འཐོབ་རྒྱུ་ཡོད་པ་རེད་བསམས་པའི་མ་རིག་པའི་རྨོངས་གཉིད་ལས་གསོད་རྒྱུའི་ལས་འགན་ཞིག་ང་ཚོ་ནང་པ་ཚང་མར་ཡོད་ལྟ་བུ་རེད། ང་ཚོ་ནང་པ་ཚང་མས་ཤོད་ཀྱི་ཡོད། གང་ལྟར་གཙོ་བོ་དེ་གང་ཟག་སྒེར་སོ་སོས་འཛམ་གླིང་ལ་ལྟ་སྟངས་དང་དེ་བཞིན་སོ་སོ་རང་ཉིད་ལ་ངོས་འཛིན་བྱེད་སྟངས་དེ་ཧ་ཅང་གལ་ཆེན་པོ་ཆགས་ཡོད། ད་ལྟ་ང་ཚོས་ང་ཞེས་པ་དེ་ངོས་འཛིན་དང་ལྟ་སྟངས་དེ་ནོར་འཁྲུལ་ཅན་ཞིག་བལྟས་པར་བརྟེན། ང་ཚོས་དུས་རྒྱུན་ཉིན་རེའི་འཚོ་བའི་ནང་ལྟ་བ་འཁྱེར་སྟངས་དང་ཀུན་སྤྱོད་ལག་ལེན་བསྟར་སྟངས་དེ་དག་ཡོངས་སུ་རྫོགས་པ་ཤུལ་མ་ཐུབ་ཀྱིས་སྐྱོན་འདྲེས་པ་ཞིག་དང་རང་དོན་གལ་ཆེ་ཤུལ་མ་ཐུབ་ལྟ༌བུ་ཆགས་འགྲོ་གི་ཡོད། བདག་འཛིན་ཞེས་པར་གཞུང་ལུགས་ནས་འགྲེལ་བཤད་མང་དག་ཅིག་རྒྱག་རྒྱུ་ཡོད། མཐར་གཏུག་ན། ངའམ་བདག་ཅེས་པ་འདི་ཕན་ཚུན་དངོས་པོ་གཅིག་གིས་གཅིག་ལ་རྟེན་ནས་བྱུང་བ་མ་གཏོགས་རང་ཚུགས་ཐུབ་པ་མེད། ཐ་ན་ཟས་གོས་རྣམས་ཀྱང་དངོས་པོ་གཞན་ལ་རྟེན་ནས་བྱུང་བ་ཞིག་རེད། དེ་བཞིན་མི་གཞན་ལ་རྟེན་ནས་ང་ཚོ་ཐོབ་པ་ཞིག་ཡིན་པ་ཧ་ཅང་གསལ་པོ་རེད།
ང་ཚོ་འཚོ་ཞིང་གནས་པ་དེ་དངོས་པོ་གཞན་ལ་རྟེན་པ་ཞིག་དང་འགྲོ་བ་གཞན་ལ་རག་ལུས་པ་ལྟ་བུ་གསལ་པོ་རེད། དེ་ལྟ་བུའི་དངོས་ཡོད་ཀྱི་གནས་སྟངས་དེ་ང་ཚོས་ཤེས་དགོས་པ་མ་ཟད། ཉིན་རེའི་འཚོ་བའི་ནང་བསམ་བློ་དང་ཀུན་སློང་འཁྱེར་སྟངས་དེ་དངོས་ཡོད་ཀྱི་གནས་སྟངས་དང་མཐུན་པ་ཞིག་དགོས་རྒྱུ་གལ་ཆེན་པོ་ཆགས་ཡོད། བྱམས་བརྩེའི་དཀྱིལ་འཁོར་རྒྱ་སྐྱེད་བྱ་རྒྱུ་གལ་ཆེན་པོ་ཆགས་ཀྱི་ཡོད། དེར་བརྟེན་ང་ཚོས་སེམས་ཅན་ཐམས་ཅད་རང་ལ་བཀའ་དྲིན་ཆེན་པོ་དང་ཕན་ཐོགས་མཁན་ཞིག་ཡིན་པའི་ཆ་ནས་བཀའ་དྲིན་དྲན་ཤེས་ཀྱི་ཐོག་ནས་བྱམས་བརྩེའི་དཀྱིལ་འཁོར་རྒྱ་སྐྱེད་དེ་སེམས་ཅན་གཅིག་གིས་གཅིག་ལ་མ་བུ་ལྟ་བུའི་འདུ་ཤེས་བཞག་སྟེ་ཚེ་སྲོག་གཅིག་གིས་གཅིག་ལ་གུས་ཞབས་དང་། སེམས་འཁུར་བྱེད་རྒྱུ་དེ་དག་གཞི་རྩའི་ལྟ་བ་རྟེན་འབྱུང་ཕན་ཚུན་གཅིག་གིས་གཅིག་ལ་ལྟོས་ནས་ཡོང་གི་ཡོད། ཐ་ན་ཟས་གོས་ཀྱི་མཐུན་རྐྱེན་དེ་ཚོའང་ང་ཚོས་ངོ་མ་ཤེས་པ་དང་ཐུག་མ་མྱོང་བའི་མི་མང་པོ་ཞིག་གིས་འབད་བརྩོན་བྱས་པར་བརྟེན་ནས་སོ་སོར་གོས་དྲོ་པོ་དང་ཟས་ཞིམ་པོ་བཟའ་རྒྱུ་བྱུང་ཡོད། གང་ལྟར་འཛམ་གླིང་གི་ལྟ་སྟངས་དེ་ཧ་ཅང་སྒེར་སེམས་ཅན་ཞིག་དང་མི་གཞན་ལ་བདེ་སྐྱིད་འབྱུང་མིན་ལ་མ་ལྟོས་པར་སོ་སོར་བདེ་སྐྱིད་བྱུང་ན་བསམ་པ། དེ་ལྟའི་དངོས་ཡོད་གནས་སྟངས་ལ་ཕྱིན་ཅི་ལོག་ཏུ་འགྱུར་པའི་ལྟ་བའི་ཐོག་མ་འགྲོ་བར་ལྟ་བ་གཞན་དག་གཅིག་གི་ཐོག་འགྲོ་དུས་འཛམ་གླིང་ལ་མ་འོངས་པར་ཡག་པོ་ཡོང་རྒྱུར་ང་ཚོར་རེ་བ་དང་གསོན་ཤུགས་སྦྱིན་གྱི་ཡོད། མདོར་ན་འདི་གར་ནང་པའི་ཐོག་མཁྱེན་རྒྱ་ཡོད་པ་ཞིག་དང་། ནང་པའི་རྗེས་སུ་བཞུགས་ཏེ་སྟོན་པ་ཤཱཀྱ་ཐུབ་པའི་མཛད་པ་རྣམ་ཐར་ལ་རྣམ་མཁྱེན་ཁོ་ན་ཕེབས་ཡོད་པར་སོང་། ངའི་རེ་བ་གང་ཡིན་ཟེར་ན་ང་ཚོ་ནང་པ་ཡིན་ཟེར་བ་གཅིག་པུས་ཕན་གྱི་མི་འདུག ནང་པ་ཡིན་པར་བརྟེན་ནས་འགྱུར་བ་འགྲོ་རྒྱུ་དང་ཁྱད་ཆོས་སྟོན་དགོས་རྒྱུ་དེ་ཧ་ཅང་གལ་ཆེན་པོ་རེད་འདུག དེང་སྐབས་འཛམ་བུ་གླིང་གི་གནས་སྟངས་དེ་རྙོག་གྲ་ཚ་པོ་ཞིག་གི་ནང་གནས་ཡོད། དེར་བརྟེན་ང་ཚོས་ངེས་པར་དུ་གཞི་རྩའི་བསམ་བློ་དང་ལྟ་བའི་འཁྱེར་སོ་དེ་དག་ལ་འགྱུར་བ་གཏོང་དགོས་རྒྱུ་དེ་ཧ་ཅང་གལ་ཆེན་པོ་རེད། དེ་དག་ལ་འགྱུར་བ་མ་གཏང་བ་ཡིན་ན་ཕྱིའི་ལུས་ངག་དང་དངོས་པོ་ཙམ་ལ་འགྱུར་བ་བཏང་ཡང་དོན་དམ་ལ་ཕན་ཐོགས་མེད་པ་ལྟ་བུ་ཆགས་ཀྱི་ཡོད། ཅེས་གསུང་བཤད་གནང་ཡོད་པ་བཅས། །
