བཀའ་ཁྲི་མཁས་དབང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༡ ཟླ་ ༡༡ ཚེས་ ༤ ཉིན་ཝ་ཤིང་ཊོན་པོ་སི་ཊི་གསར་ཤོག་ཐོག་སྤེལ་བའི་ཆེད་རྩོམ།
༄༅། །འདི་ལོ་ཕྱི་ཟླ་གསུམ་པ་ནས་བཟུང་བོད་ཤར་ཕྱོགས་ཁུལ་དུ་བོད་རིགས་ན་གཞོན་བཅུ་གཅིག་གིས་རང་ལུས་མེར་སྲེག་བཏང་བས་དྲུག་འདས་གྲོངས་སུ་གྱུར་ཡོད། རྒྱ་ནག་གཞུང་གིས་དོན་རྐྱེན་དེ་དག་ལ། རྣམ་པར་འགྱུར་བའི་འཇིགས་སྐུལ་རིང་ལུགས་པ་ཡིན་ཚུལ་གྱིས་འགྲེལ་བརྗོད་བྱེད་བཞིན་ཡོད། དོན་དངོས་ནི་བོད་མི་ཚོས་འུ་ཐུག་ཐབས་ཟད་ཀྱི་བྱ་སྤྱོད་དེ་འདྲ་ཞིག་མ་སྤེལ་ཐབས་མེད་ཆགས་པ་དེས་བོད་ནང་དུ་རྒྱ་ནག་གཞུང་གིས་འཛིན་བཞིན་པའི་སྲིད་བྱུས་ངན་པ་དེ་དག་འཐེར་འདོན་བྱས་པ་མ་ཟད། བོད་མི་རིགས་ཀྱི་ཐུན་མིན་ལེགས་བྱང་དང་ངོ་བོ་ཆགས་འཇིག་གི་མཚམས་ལ་བསླེབས་པར་བརྟེན། བོད་ནང་གི་བོད་མི་ཚོའི་ཛ་དྲག་གི་དཀའ་ངལ་གང་མྱུར་སེལ་དགོས་པའི་བརྡ་ལན་གསལ་པོ་གཏོང་བཞིན་ཡོད།
བཙན་བྱོལ་བོད་མི་ཚོས་བོད་ཀྱི་ས་ཁུལ་སྤྱི་དང་། ཁྱད་པར་དོན་རྐྱེན་དེ་དག་གཙོ་ཆེ་བྱུང་ས་རྔ་པ་དང་དཀར་མཛེས་ཁུལ་གྱི་བོད་མི་ཚོ་ཡིན་པས་རང་ལུས་ཞུགས་མེར་སྒྲོན་མཁན་རྣམས་ལ་ཚོར་ཤུགས་དྲག་པོས་གདུང་སེམས་མཉམ་སྐྱེའི་ཐོག་སྐྱིད་སྡུག་མཉམ་མྱོང་བྱེད་བཞིན་ཡོད་པ་མ་ཟད། བོད་མི་དགེ་འདུན་པ་དང་བཙུན་མ་དེ་དག་གིས་རང་ལུས་ཞུགས་མེར་བསྒྲོན་ཏེ་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག བོད་མི་ཚོས་དཀའ་སྡུག་མྱོང་བཞིན་ཡོད་པ་དེ་འཛམ་གླིང་ཕྱི་ལ་ར་སྤྲོད་བྱེད་ཆེད་རང་སྲོག་བློས་གཏོང་གནང་བ་ཞིག་ཡིན།
རང་ལུས་ཞུགས་མེར་སྒྲོན་མཁན་གྱི་བོད་མི་ཚོས་བོད་དང་བོད་མིའི་དོན་དུ་རང་ལུས་མེར་སྲེག་བཏང་བ་ལས་གཞན་ལ་འཚེ་བ་བྱ་རྒྱུའི་ཀུན་སློང་ནམ་ཡང་མེད། ཁོང་ཚོས་འཇིགས་སྣང་དང་དངངས་སྐྲག་གི་གནས་སྟངས་འོག་བཟོད་ཐབས་བྲལ་ཏེ་ཧ་ཅང་བློ་ཕམ་དང་དཀའ་ཚེགས་ཆེ་བའི་བྱ་སྤྱོད་དེ་འདྲ་ཞིག་སྤེལ་རྒྱུ་ལས་གཞན་བྱ་ཐབས་གང་ཡང་རག་མེད་པ་རེད།
བཙན་བྱོལ་བོད་མིའི་འགོ་ཁྲིད་ངོས་ནས་བོད་ནང་གི་བོད་མི་ཚོར་རང་ལུས་མེར་སྲེག་གཏོང་རྒྱུ་མཚོན་ངོ་རྒོལ་རིགས་སྤེལ་རྒྱུར་བརྒྱུད་བསྐུལ་བྱེད་ཀྱི་མེད། རྒྱུ་མཚན་ནི་རྒྱ་ནག་གཞུང་གིས་བོད་མི་ཚོར་དམ་བསྒྲགས་ཤུགས་ཆེ་རུ་གཏོང་རྒྱུ་མ་ཟད། བོད་མི་ཞི་རྒོལ་བ་ཚོར་ཉེས་མིང་འདྲ་མིན་འོག་མནར་གཅོད་གཏོང་རྒྱུ་ཡིན་པར་བརྟེན་དེ་འདྲ་གང་ཡང་བྱེད་ཀྱི་མེད།
བོད་ནང་རང་ལུས་མེར་སྲེག་བཏང་བའི་དོན་རྐྱེན་ཐོག་མ་དེ་བྱུང་སྐབས་རྒྱ་ནག་གཞུང་གི་ཉེན་རྟོག་མི་སྣས་མེ་གསོད་རྒྱུའི་ཚབ་ཏུ་མེ་འབར་བཞིན་པའི་དགེ་འདུན་པར་རྡུང་རྡེག་བཏང་ཡོད། དེར་བརྟེན་ཁོང་ལ་རྡུང་རྡེག་ཚབས་ཆེན་ཕོག་པས་འདས་གྲོངས་སུ་ཕྱིན་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་ཚོར་འུ་ཐུག་གི་བྱ་སྤྱོད་དེ་རིགས་མ་སྤེལ་རོགས་ཞེས་ཡང་ཡང་འབོད་སྐུལ་མཛད་བཞིན་ཡོད། དཔེར་ན། ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ཞི་རྒོལ་ཆེན་མོ་བྱུང་རྗེས་རྒྱ་ནག་གཞུང་གིས་བོད་མི་ཚོར་དྲག་གནོན་ཚབས་ཆེ་བྱས་པ་དེར་ངོ་རྒོལ་ཆེད་བཙན་བྱོལ་བོད་མི་ཚོས་མ་འཆི་བར་གྱི་ཟས་བཅད་ངོ་རྒོལ་གྱི་ལས་འགུལ་སྤེལ་ཡོད། སྐབས་དེར་༸གོང་ས་མཆོག་གིས་ལས་འགུལ་མཚམས་འཇོག་དགོས་པའི་འབོད་སྐུལ་ཡང་ཡང་མཛད་ཡོད། ཕྱོགས་མཚུངས་ངོས་རང་བོད་མིའི་ཆབ་སྲིད་ཀྱི་འགོ་ཁྲིད་ཅིག་ཡིན་པའི་ཆ་ནས་ཀྱང་མ་འཆི་བར་གྱི་ཟས་བཅད་ངོ་རྒོལ་དེ་མཚམས་འཇོག་ཡོང་བའི་འབོད་སྐུལ་ཞུས་པ་ཡིན། གང་ཡིན་བརྗོད་ན་བོད་མི་རིགས་ཀྱི་ངོ་བོ་དང་རིག་གཞུང་སྲུང་སྐྱོབ་ཆེད་ང་ཚོར་ལྷག་བསམ་ལྡན་པའི་བོད་མི་དེ་དག་གསོན་པོར་གནས་རྒྱུ་ཧ་ཅང་གལ་ཆེན་པོ་ཆགས་ཡོད།
དེ་བཞིན་གཞིས་བྱེས་བོོད་མི་ཡོངས་ལ་གནའ་རབས་བོད་ཀྱི་རིག་གཞུང་དང་དེང་རབས་ཀྱི་ཤེས་ཡོན་ཟུང་འབྲེལ་ཐོག་བོད་མི་རིགས་ཀྱི་འཕྲལ་ཕུགས་རྒྱང་གསུམ་གྱི་ཁེ་ཕན་ཆེད་ཧུར་བརྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཤེས་ཡོན་ཅན་གྱི་མི་སྣ་གང་མང་སྐྱེད་སྲིང་ཐུབ་ན་བོད་མིའི་རང་དབང་འཐབ་རྩོད་ཀྱི་ལས་འགུལ་ད་དུང་མུ་མཐུད་གནས་དགོས་བྱུང་ཡང་རྒྱུན་གནས་ཐོག་སྲ་བརྟན་ཡོང་ཐུབ། ཉེ་ཆར་བོད་ནང་ཡ་ང་བའི་དོན་རྐྱེན་དེ་དག་བྱུང་བའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་བོད་བཙན་བཟུང་འོག་ཆབ་སྲིད་ཀྱི་དམ་བསྒྲགས་དང་བོད་ཀྱི་རིག་གཞུང་རྩ་གཏོར། དཔལ་འབྱོར་དབྱེ་འབྱེད། བོད་ཀྱི་ཁོར་ཡུག་གཏོར་བཤིག་བཏང་བའི་སྲིད་བྱུས་ལག་བསྟར་བྱེད་བཞིན་པ་དེ་དག་ཡིན་པས་ང་ཚོས་ངེས་པར་དུ་དོ་སྣང་བྱེད་དགོས། རྒྱ་ནག་གཞུང་གིས་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་སྟངས་འགྲོ་རྒྱུར་མ་ཞེད་པར་བོད་མི་ཚོར་དམ་བསྒྲགས་ཤུགས་ཆེ་རུ་བྱས་པར་བརྟེན་བོད་མི་ཚོས་རྒྱ་ནག་གཞུང་ལ་ཞི་རྒོལ་གྱི་ལས་འགུལ་སྤེལ་བཞིན་ཡོད། ཕྱི་ལོ་ ༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོ་བྱུང་རྗེས་ཕྱི་ཚུལ་ཙམ་ལས་དོན་དངོས་ཐོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མི་ཚོར་དྲག་པོའི་དམག་ཁྲིམས་བསྡམས་ཏེ་དམ་བསྒྲགས་བྱས་ཡོད་པ་མ་ཟད། ལྷག་པར་བོད་མིའི་ཆོས་བྱེད་དགོན་སྡེ་ཁག་གི་ནང་དམ་བསྒྲགས་དེ་བས་ཤུགས་ཆེ་རུ་བཏང་ཡོད།
འདི་ལོ་ཕྱི་ཟླ་ ༣ པའི་ནང་རང་ལོ་ ༢༠ སོན་པ་ཀིརྟི་དགོན་གྱི་དགེ་འདུན་པ་བློ་བཟང་ཕུན་ཚོགས་ལགས་ཀྱིས་རང་ལུས་མེར་སྲེག་བཏང་སྟེ་རྒྱ་གཞུང་ལ་ངོ་རྒོལ་བྱས་ནས་འདས་གྲོངས་སུ་གྱུར་བས། རྔ་པ་ཁུལ་དུ་དམག་དཔུང་ཤུགས་ཆེ་འགྲེམས་འཇོག་གིས་དམ་བསྒྲགས་ཇེ་ཆེར་བཏང་བ་དང་། དགོན་པ་ཡོངས་རྫོགས་དྲག་ཆས་ཉེན་རྟོག་མི་སྣའི་སྟངས་འཛིན་འོག་དགོན་པའི་ཉིན་རེའི་ཆོས་ཕྱོགས་ཀྱི་ལས་དོན་ལ་དམ་བསྒྲགས་བཀག་འགོག་དང། ༸གོང་ས་མཆོག་གི་སྐུ་པར་སྒྲིག་ཤོམ་མི་ཆོག་པའི་བཙན་བཀའ་བཏང་བ། གྲྭ་བཙུན་མང་པོ་ཉེས་མེད་འཛིན་བཟུང་འོག་དཀའ་སྡུག་མྱངས་དང་མྱོང་བཞིན་ཡོད།
བོད་མིའི་ཆོས་དང་རིག་གཞུང་སྲུང་སྐྱོབ་ཀྱི་འཐབ་རྩོད་ལས་འགུལ་ཐོག་མདུན་བསྐྱོད་བྱེད་བཞིན་པའི་སྙིང་སྟོབས་ལྡན་པའི་གཞིས་ལུས་བོད་མི་ཚོར་ང་ཚོ་བཙན་བྱོལ་དུ་གནས་པའི་བོད་མི་ཚོས་རྒྱབ་སྐྱོར་ཞུ་རྒྱུ་དང་། ཁོང་ཚོའི་མངོན་འདོད་ཀྱི་འབོད་སྒྲ་དེ་འཛམ་གླིང་མི་མང་ཚོས་གོ་ཐུབ་པ་ཞིག་ང་ཚོས་བཟོ་རྒྱུ་ཡིན། ཟླ་བ་འདིའི་ཕྱི་ཚེས་ ༡༩ ཉིན་བོད་ནང་རང་ལུས་མེར་སྲེག་གཏོང་མཁན་ཚོར་གདུང་སེམས་མཉམ་སྐྱེ་ཞུ་ཆེད་བཙན་བྱོལ་བོད་མིའི་གནས་ཡུལ་ཡོངས་ལ་ཉིན་བརྒྱ་དུས་གཅིག་ཏུ་མཆོད་འབུལ་སྨོན་ལམ་དང་སྨྱུང་གནས་གོ་སྒྲིག་ཞུས་ཡོད། བོད་ནང་རང་དབང་བསྐྱར་གསོ་དགོས་པའི་གཞིས་ལུས་བོད་མིའི་མངོན་འདོད་ཀྱི་འབོད་སྒྲ་དེ་རྒྱལ་སྤྱིའི་སྟེང་ཤེས་རྟོགས་ཐུབ་པ་བཟོས་ཏེ་ཁོང་རྣམ་པའི་རྒྱལ་ཞེན་ལྷག་བསམ་གྱིས་ཕྱུག་པའི་བློས་གཏོང་དག་ཆུད་ཟོས་སུ་མ་འགྲོ་བ་བཟོ་རྒྱུ་ང་ཚོའི་འོས་འགན་ཞིག་ཆགས་ཡོད། བོད་ནང་བོད་མི་ཚོས་རང་ལུས་མེར་སྲེག་བཏང་བའི་རྒྱུ་རྐྱེན་གཙོ་བོ་ནི་རྒྱ་ནག་གཞུང་གིས་བོད་ནང་མུ་མཐུད་བཙན་བཟུང་དབང་བསྒྱུར་བྱས་པ་ལས་བྱུང་བ་ཡིན་པ་ཧ་ཅང་གསལ་པོ་རེད། ༸གོང་ས་མཆོག་དང་དབུས་བོད་མིའི་སྒྲིག་འཛུགས་གཉིས་ནི་བོད་ནང་གི་དཀའ་ངལ་བཟོ་གཞིའི་ཚབ་ཏུ་དཀའ་ངལ་སེལ་རྒྱུའི་ཐབས་ལམ་ཉག་གཅིག་ཆགས་ཡོད། ང་ཚོས་འཛམ་གླིང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ལ་བོད་ནང་དངོས་ཡོད་གནས་ཚུལ་རྟོག་ཞིབ་ཆེད་སྐུ་ཚབ་གཏོང་དགོས་པ་དང་། རང་དབང་ཅན་གྱི་གསར་འགོད་པ། དེ་བཞིན་རྒྱ་རིགས་ཤེས་ཡོན་ཅན་ཚོ་ཡང་གཏོང་ཐུབ་པའི་འབོད་སྐུལ་ཞུ་རྒྱུ་མ་ཟད། ལྷག་པར་རྒྱལ་སྤྱིའི་སྤྱི་ཚོགས་ཀྱིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ལ་བོད་རྒྱ་མི་རིགས་གཉིས་སྨན་ཆེད་གྲོས་མོལ་གྱི་ལམ་ནས་བོད་དོན་དཀའ་རྙོག་སེལ་ཐབས་བྱེད་རྒྱུར་རྒྱ་ནག་གཞུང་ལ་རེ་འདུན་འདོན་རོགས་ཞེས་ཞུ་རྒྱུ་ཡིན།།
